唔知好消息定壞消息，將軍澳已經被 Pop 字頭的商場徹底包圍了！今日我依莉詩就到咗 PopWalk 天晉滙睇下呢個新商場有乜東東啦！
汽車影院齊齊睇地縛喵
既然今日係開幕，一定有 D 特別嘢！當中最吸引的就係全港首個汽車影院。只要係場內商舖以電子貨幣消費滿 $300 就可以換領入場證一張，到露天停車場睇《電影版妖怪手錶 – 誕生的秘密喵!》電影，大家可以坐係自己的私家車睇又或者係開蓬巴士上欣賞。不過就只限 8月28日 及29日兩晚放映，如果今次 miss 咗，要留意下商場方面幾時會加場啦！
▲ 雖然係開蓬巴士上面睇會被開框擋住，不過都係好特別的體驗。當然最正就係係私家車上面睇啦！
▲ 亦因為商場開幕，由 8月20日至9月11日(逢星期六、日) 會有一架雪糕車遊走將軍澳及西貢區免費派發蜜瓜味富豪雪糕。認住呢架車啊！
▲ 商場入面仲有閃燈棉花糖派，好大舊啊！
行商場只「為食」
雖然話天晉滙系列商場面積逾 240,000平方呎，不過今日開的只係第一期，所以只有兩層，而且都幾細。但就因為有多間特色餐廳進駐，加上價格相宜，都幾值得將軍澳區的居民「為食」而去。
即煲靚湯撈飯 － 湯加
小朋友愛吃湯飯，貪佢容易入口，而呢間新派健康湯飯主題店就用各種湯飯作主打，大部份都係用新鮮材料即叫即煲，每個湯都好入味。自選兩餸一菜米飯任裝都係 $39-45，方便無飯家庭晚晚飲靚湯。
▲ 紅酒牛尾湯飯 $58
秘製牛尾湯甜甜地好開胃，牛尾入味又唔過韌，送飯一流。
▲ 竹笙花膠豬肉片湯飯 $68
清湯充滿西芹材料的味道，清清地非常健康，加上花膠養顏，係不錯的家常便飯。
▲ 生菜鮮蝦滑湯飯 $42
自家手製蝦滑非常彈牙，配埋熱辣辣即煎薄餅好有酒樓的感覺。
即叫即焗農夫包 － Bakery Café by Maxim’s Cakes
怕日日食湯飯會悶？西餐的代表有 Bakery Café，多款新鮮麵包及時尚熱食，滿足晒早午晚餐的需要。
▲ 咖喱雞德州農夫包配香蒜包 $70
咖喱雞德州農夫包同香蒜包都係即叫即焗，外脆內軟，盛載著熱騰騰的咖喱雞肉，咖喱汁香濃、雞肉軟滑，配搭自家製香蒜牛油汁法包，咖喱迷絕不能錯過。
▲ 歌式全天候煙三文魚早餐 $82
食一個豐富的 all day breakfast 可以令全日都超精神。滑蛋放上軟熟的牛油麵包上口感軟軟，容易入口。薯粒同什菌炒得香口，令早餐不會太清淡。
▲ 黑松露什菌意粉 $68
濃濃的黑松露味超級香，廚師一 D 都唔孤寒落咗超多黑松露醬，黑松露迷必食啊！
▲ 粒粒柚子菠蘿橙茶、藍蝶花雪糕蘇打 $28
作為夏日特飲顏色當然要色彩繽紛，藍蝶花的紫藍神秘又夢幻，加入柚子同雪糕又好似星空一樣，打卡一流。
依莉詩：「將軍澳居民新飯堂」
雖然話天晉滙系列商場面積逾 240,000平方呎，不過今日開的只係第一期，所以只有兩層，而且都幾細。但就因為有多間特色餐廳進駐，加上價格相宜，都幾值得將軍澳區的居民「為食」而去。商場外有個大型露天停車場，就更適合有車一族去尋食啦！
PopWalk 天晉滙
地址：將軍澳唐俊街12號 (港鐵將軍澳站A出口)
查詢電話：2679 9300
Leave a Comment