暑假得番 6日就完！大家享受完陽光與海灘未呢？上年俾人鬧到乜咁，今年移師到核心內圍的中環海濱舉行，唔知又伏唔伏呢？我依莉詩今日就同娜姐出發挑戰呢條 10 米高的滑梯啦！
堅瀡到 10 米高滑梯
叫得 Slide The City，重點當然係 Slide 。上年好多人投訴條滑梯唔夠斜，瀡到一半就停係中間，所以今年就大會不但縮短滑梯到 150米，更利用 10 米高台承托起滑梯，令滑水速度感大大提升，真係可以由最高瀡到落低，非常刺激。亦因為地點移師到中環海濱，Magic hour 就可以邊瀡滑梯，邊睇維港迷人景色，享受城市的浪漫。
小感想：今次呢條滑水梯由頭斜到落尾，可以一瀡到底，夠晒爽！講刺激雖然未及早前海賊王嘉年華咁利害，唔會彈起亦唔會有離心力，不過滑梯勝在夠長，可以邊瀡邊享受維港迷人景色，又係另一番風味。
刺激度 ★★★☆☆
好玩度 ★★★★★
點先可以一瀡到尾？
今年用咗 10 米高台承托起滑梯，基本上要一瀡到底並唔難，不過用唔同的姿勢瀡的速度同感受都好唔同。如果想慢慢睇風景可以坐係水泡瀡，而講求速度感的話趴係水泡又係另一個玩法。一個人瀡可能會不停自轉，如果幾個人手拉手一齊瀡就可以自程望住前面之餘，仲會瀡得更快添！無論想點瀡，都要記得瀡的時候要重心向前，四肢盡量保持在水泡內，咁先可以減低阻力。不過，就算未能一瀡到底都唔怕，到時每 10-15米會有一個工作人員，協助各位繼續向前。
相關影片:
迷宮小心水彈重天而降
係外面見到室內沙灘的 logo 就知呢個水彈迷宮玩得過啦！係 5分鐘時間內，兩人會有 3個水彈阻止對方行動，而迷宮內亦設有水槍作為加強的武器。如果係限時內最快係迷宮中逃出而又執得最多精靈球的就贏。
小感想：雖然外表睇迷宮唔係好大，不過因為好窄，只可以一個人通過，所以要將水彈掟得中敵人都唔太易。偏偏我呢個地獄黑仔王就被重天而降的水彈擊中面部，妝都溶埋。
刺激度 ★★★☆☆
好玩度 ★★★★☆
收費：$30/位
▲ 被水彈掟中都幾痛架，大家要小心啊！
泡泡足球撞飛對手
泡泡足球好多室內地方都有得玩，今次踏到去室外就更加熱血。2個人一隊，要係 10分鐘內入球最多就贏，小心俾敵人撞到飛起啊！
小感想：坦白講，係波波足球入面本身已經好熱，依家仲要係室外，大家玩完滑梯再過嚟仲可能濕晒，可想而知入面係點啦！
刺激度 ★★★☆☆
好玩度 ★★★★☆
收費：$30/位
▲ 孭住個波波足球已經好狼狽，仲隨時會俾人撞到飛起呢！
泡泡池享受軟綿綿質感
15 分鐘內大家可與朋友於泡泡池內大戰！晚間時段更會有舞台音樂同燈光效果，氣氛更為熱烈！
小感想：呢個泡泡池無海洋公園夏水禮咁深咁大，不過泡泡就更加綿密，好似浸泡泡浴咁。而晚間仲會配合舞台表演同燈光效果，氣氛一流啊！
刺激度 ★★☆☆☆
好玩度 ★★★☆☆
收費：$30/位
▲ 呢部製雲機會定時整 D 哈哈笑出嚟，非常有趣。
▲ 見住咁大個 心心眼 emoji 飄上天，感覺好輕鬆呢！
迷你滑水梯小朋友都有得瀡
唔止大人有得瀡，小朋友一樣有得玩。瀡的時間仲有機會俾水槍攻擊，小朋友一定玩到唔捨得走。
小感想：呢個迷你版我就無玩，不過娜姐拎住支水槍玩到唔捨得放呢！
刺激度 ★☆☆☆☆
好玩度 ★★☆☆☆
收費：HK$20/位
▲ 小朋友一路玩，家長可以控制水槍的方向攻擊，大人細路都可以一齊玩呢！
迷你人造沙灘
有無諗過可以係呢個高樓林立的中環享受日光浴呢？大家可以坐係沙灘椅一邊睇住台上的表演，陽光與海灘啊！
小感想：呢個人造沙灘雖然細，不過放滿沙灘椅俾人休息，都幾嘆架！
刺激度 ★☆☆☆☆
好玩度 ★☆☆☆☆
串燒沙冰玩完醫醫肚
玩到攰係時候醫下肚，沙灘旁邊有多檔小食，串燒、芝士撻樣樣有特色，想消消暑仲有沙冰、雪條，仲有原個西瓜，非常解渴。最正的是，貴錢唔算太貴，同旺角掃街差唔多，可以放心豪食！
小感想：沙灘食串燒雖然好熱氣，不過外脆內軟的牛肉串加埋紫菜粉真係食到停唔到口。
好味度 ★★★★☆
消暑度 ★★☆☆☆
小感想：肥姐墨魚食得多，呢間第 3代肥仔墨魚都唔錯。大墨魚冷凍爽口，加埋芥末同甜醬都幾滋味架！
好味度 ★★★☆☆
消暑度 ★★★☆☆
小感想：蜂蜜酒味好特別，清甜的味道帶少少酒香，夠晒消暑。
好味度 ★★★★★
消暑度 ★★★★★
小感想：電鑽西瓜幾時都咁型，果肉同果汁一齊飲，好清涼呢！
好味度 ★★★★☆
消暑度 ★★★★★
依莉詩：「今次真係可以一瀡到尾！」
經過上年的劣評，今年的 Slide The City 總算嚟個大平反，滑梯的斜度大大提升，真係可以利用晒整條滑梯，一瀡到尾。而且今年的地點方便咗，又加咗多個 Non-Slider 活動，例如每晚會有香港一衆樂壇新人輪流表演助興，更開放舞台讓街頭音樂人走上舞台，氣氛應該會更好。雖然唔知會唔會同上年一樣排餐死，不過今次門票改以時段劃分，每日四個時段，各時段設 Slider 人數上限，相信可以有效分流 Slider，盡情瀡餐飽！
Slide The City Hong Kong
活動地點 ：中環海濱活動空間
Leave a Comment