港女耐唔耐就會執下屋，睇下以前影嘅相，寫嘅日記，抄過嘅筆記。最近執嘢，我搵到一支筆，一支 Made in UK 嘅名牌原子筆。呢支筆，其實我一直都唔捨得用，久而久之就收埋左，搵到佢果陣仲喺個盒入面未拆出黎。
窮困嘅港女點解會有支名牌原子筆呢？其實係幾年前港女 undergrad 畢業嘅時候，港女的公公送嘅。當時港女一收到件畢業袍就去左搵公公婆婆影畢業照，兩老見到孫女咁叻叻就送咗支筆俾我做紀念，叫我繼續加油。
收到嗰時其實唔知道原來支筆係名牌，亦都無留意佢 Made in 邊度，因為係公公送嘅，個份心意已經大過晒任何嘢。真係咁啱我上星期執開嘢嘅時候先睇到，仲好八卦咁上網查下個牌子，先知道原來係名牌?。
一時興起我就試下支筆，好在啲墨無乾無凝固，咁就順便寫咗封信，先發現自己原來好耐都冇正正經經寫字。平時出去做訪問、出記者會嗰啲都係用電話打字 jot notes，就算真係手寫筆記，又因為要快寫，啲字非常潦草，自己睇得明就得啦。今次揸起呢支筆寫信嘅時候有一份莫名的重量，一定係心理作用。
港女公公今年已經 90 歲，佢以前係讀「卜卜齋」，寫得一手好字，阿媽話以前佢啲兄弟姊妹結婚派帖都係公公親手用毛筆寫，好見得人㗎。其實港女細個啲字都寫得幾靚（無圖無真相 sor），不過大家知啦，經過會考高考 DSE 呢啲公開試嘅洗禮，再加上今時今日乜都電子化，港女手字已經核突咗好多，sosad。
Btw，港女去寄信嘅時候發現郵局推出咗 2016 里約奧運特別郵票，一套四款，閃添㗎，好靚，就算唔寄信都可以買黎紀念下。