如果不是為了捉小精靈，大家多久沒有到過公園？那種在公園與不同的人交流玩樂心得的感覺就好像回到小時候一大班小朋友一齊玩搖搖、陀螺一樣。到底我們由幾時開始忘記了那種玩具帶給我們的快樂？今日我依莉詩就訪問了 4位懷舊玩具愛好者，塑膠玩具收藏家 Ricky Sir、日本玩具藏家阿豪、松木玩具設計師 Bacchus 以及 懷舊玩具市集搞手 Eddie，一同分享玩具的故事。
走到 Ricky Sir 的工作室，看著牆上掛著一件件印上「Made in Hong Kong」的塑膠玩具，士兵、牛仔、膠劍… 仿佛對我們說著 50-80年代的玩具歷史。這段時期正正是香港塑膠製造業最蓬勃的時期，「基本上香港製造的玩具就係當時世界製造的玩具，只要收集香港製造的玩具差唔多可以睇晒全世界的歷史。」不過即使當時差不多全球八成的玩具都是香港製造，但因為香港人的生活水平較低，所以製造的玩具都以出口到歐美等地為主。如果現在要找，Ricky Sir 表示「除了在嘢冷店尋寶，反而好多玩具都係靠 e-bay 等外國網搵。始終外國地方大，就算普通的屋企地牢都可以收埋好多祖父母留低的玩具。」
▲ 60年代的士多非常流行抽獎，店內會有一個位置掛滿袋裝各式各樣的玩具，如果抽中就可以帶回家。
▲ 男仔會鍾意一些牛仔、士兵等的玩具，而女仔就會玩奶樽、煮飯仔等。
▲ 以前的盒裝玩具都比較昂貴，大部份都會出口歐洲，所以香港的小朋友未必接觸到。
某程度上收藏玩具就是填補童年回憶的一種方法。與不少玩具收藏家一樣，Ricky Sir 都是由玩玩具到收藏玩具，「大人儲玩具好多時都係細過丟咗，或者當時買唔到，依家想回憶番先買。」亦因為 Ricky Sir 小時候家境並不富有，「以前資源少，6兄弟姊妹攤分之後就更少」，所以廿年前他就開始收集大大小小的「香港製造」玩具，數百件收藏品都充滿著他的童年回憶。
▲ 廿年前因為秀茂坪開始清拆，有大量懷舊玩具流出市面，Ricky Sir 亦因此踏上玩具收藏家之路。而他的收藏中大部份都是士多玩具，Ricky Sir 更笑言「士多玩具對於依家的小朋友嚟講，全部都唔合格。」不過這些都是他經歷過的年代。
▲ 眾多收藏中， Ricky Sir 最喜愛四輪蠟腸車，「當時的車款十分有型，不過橡膠車轆大部份都已經變硬了，已經不能玩了。」
▲ 至於 70年代開始出現一些電力推動的玩具，「果陣有燈有聲已經好先進。」
▲ 談到保存方法，Ricky Sir 坦言「塑膠玩具出油好平常」，會放入膠箱，盡量少將塑膠玩具曝露陽光同空氣，而日本玩具收藏家阿豪反而表示「日本 70-80年代初的玩具係唔會出油，可能因為果陣無咁在意環保，所以物料無咁易溶化。」
現在的父母買玩具大多去百貨公司或者玩具反斗城，「可能因為生活水平高，要求自然高。父母多咗好多監管同安全顧慮，多數都會買有牌子的玩具。」Ricky Sir 反而覺得沒有了以前的多元化，「以前知識產權未普及，當中有唔少山寨品，由好粗糙到好精細都有。」而松木玩具設計師 Bacchus 更是鍾情山寨玩具，「我的美學觀某程度都係受鮮色的玩具影響，因為我特別鍾意儲開錯體玩具，例如錯體變形金剛、星球屈埋變成個籃球等。好鍾意果種錯誤，好似係被操控中搵到個性。」因此 Bacchus 所設計的玩具都有山寨玩具的影子。
▲ Bacchus 利用松木設計出多件療癒玩具，從控制「走晒樣」的人仔讓大家發洩。
▲ Bacchus 追求每一個玩具的關節的組合，「鞠躬」是他的得意之作。
雖然 60-80年代香港是世界工廠，Ricky Sir 收集的玩具都是香港歷史一部份，但係日本玩具同時亦是不少 70-80後的回憶。懷舊玩具市集搞手 Eddie 就表示「日本的動畫比較流行，所以 70-80後香港人都係睇日本卡通大。」亦因如此，阿豪收藏了不少六神合體、忍者小靈精、超人等等日本玩具，「見返忍者小靈精的紙牌就會諗起以前家姐點蝦自己。」而 Ricky Sir 亦覺得「70-80年代日本玩具設計得比較精準，插畫都出自大師手筆，安全性同用料嚴謹好多，所以慢慢取代了小朋友心目中的地位。」
▲ 阿豪最珍惜的就是這盒 70年代的六神合體玩具，「細個好鍾意睇呢套卡通，顏色鮮艷，而呢隻無再出復刻版，所以標價好高唔捨得賣。」
▲ 阿豪除了收藏自己的回憶，亦希望幫其他人去搵返佢地的回憶，所以會在市集出售日本玩具。
現在的大多數父母都只會買一些有教育意義的玩具給小朋友。Eddie 就懷疑「係咪大家的層次去得太高，太保護小朋友。我個仔係學校摺紙鎗，老師都唔俾。」事實上，60-80 年代物資沒有現在豐富， 不少小朋友都會動腦筋就地取材，自製有趣的玩具和遊戲，東南西北、橡筋繩等等應運而生。對於現時的小朋友愈來愈少接觸玩具，Ricky Sir 除了感到可惜，更覺得「其實細路仔咩都唔俾佢地都識得搵嘢玩，所以依家玩具愈整得精量俾佢，發揮的創意就愈低。」阿豪亦覺得「以前的玩具比現在簡單 ，無依家咁精緻，一拎起手就識玩，好容易就會玩得開心，如果講到有教育意義就複雜咗。」
▲ 60年代的玩具大部份都非常簡單，單單一架車，小朋友會自己整路軌，同兄弟姊妹鬥快。雖然談不上甚麼教育意義，不過就可以發展出他們的創意。
談到飛行棋、電子琴等玩具逐漸被手機或平板電腦 App 取代，各人都大感可惜，更認為「童真係人必需要」。Ricky Sir 覺得只是對著手機太單一，要跟著設定的方向行，不但少了思考，而且沒有了實物，沒有了觸感。同時，玩具是一個渠道讓小朋友學習現實的感知，過程中小朋友可以訓練到人與人之間的相處及耐性。Bacchus 記起「以前在公園玩陀螺，輸了會不斷研究組合，相當刺激，可惜現在的小朋友無咗一班人一齊玩的氣氛，社區性的聯繫都少了。」
▲ 雖然未知道少了玩具的觸感會否影響小朋友的成長，但肯定的是，少了玩具這個溝通渠道，小朋友與人相處的機會。
正當大家都開始忘記了玩具帶給我們的快樂，幸好仍然有這一班玩具愛好者走出來。今個星期 Eddie 就會聯同 Ricky Sir 舉辦一個懷舊塑膠玩具展 x 懷舊玩具市集。除了會展出 Ricky Sir 的塑膠玩具收藏外，還有鐵皮、煮飯仔、公仔紙、手雕木玩具發售。Eddie 更設計了小時候流行的「公仔紙」，讓大家懷緬童年。
▲ 當中的「公仔紙」保留了一些昔日的偈後語、俗語等，讓人回憶起上幾代人的說話文化。
懷舊塑膠玩具展 x 懷舊玩具市集
日期：2016年 8月 19 至 21日（星期五至日）
地址：觀塘道396號毅力工業中心10樓D室
