LEGO 迷等了又等，香港第一間官方旗艦店終於係朗豪坊開幕。事前大家所講的「LEGO 放題」、「炒家末日」又係咪就係會出現呢？我依莉詩今日就潛入店內將謎團一一解開啦！
相信唔少 LEGO迷一早都知道香港呢間 LEGO 官方旗艦店會開係朗豪坊 12樓原來一間舊唱片鋪的位置，亦一直都傳店內面積會有 7,000呎。雖然要同外國的旗艦店比都預咗係細，不過估唔到最後，店內面積只有差不多 4,000呎，幾乎一眼睇晒，有點失望。
▲ 店內以黃色及白色作主調，入面放有多件裝飾，例如正門的 1米高經典 2×4 紅色巨型積木。
全球每一間 LEGO Store 都會加入本土特色的展品，就好似紐約旗艦店就展出了由 LEGO 砌成的 50 個街景充滿特色，唔少人都估香港的特色會係中環、尖沙咀等。雖然門外都有一幅 9.9呎 x 11.2 呎 ，合共用了超過 10萬粒 LEGO 砌成的維港馬賽克畫，不過最矚目的都是店內的大型旺角街景模型。由亞皆老街至山東街一段的彌敦道、一直砌到西洋菜街及砵蘭街。當中每一座建築物都為人熟悉，入面的人仔更說著不同的故事。就好似去街邊篤魚蛋、天台 BBQ 都一一呈現，仿佛自己就係當中的一員。
▲ 帆船可以話係香港的標誌。
▲ 俯瞰繁忙的彌敦道真係好想唱一句「街邊太多人與車…」。
▲ 呢個十字路口相信無香港人未去過吧！
▲ 雖然招牌都經過二次創作，不過又好似一睇就知呢度係某一間火鍋店。
▲ 旺角街道最大特色就係招牌，資深 LEGO 達人 Alex 於是將招牌加入 LED燈，嘗試呈現五光十色的效果。
▲ 你又認唔認得呢間半死的加州健身呢？
▲ 朗豪坊假日最多係乜？當然係人龍啦，好多品牌都揀呢度派 sample，話唔定有好嘢架！
▲ 初一未必個個都去拜年，但就一定知道篤魚蛋的味道。
▲ 呢個大型旺角街景模型由專業大師洪子健及另一位資深 LEGO 達人共用 70 萬粒積木，用了 8個月時間完成。遲 D 仲會係不同的節日加入不同的原素呈現唔同時期的旺角添！
至於 LEGO 迷心中最期待的「LEGO 放題」香港店一樣有。店內的「Pick-A-Brick」牆有超過 100個圓形櫃桶放滿不同顏色的零件。雖然價錢比起紐約店的 8美元/ 15美元高，小杯及大杯分別售 $119 及 $199，不過大大小小不同形狀都有，以後唔駛四處「撲件」咁辛苦。反而仲要苦惱點先可以放到最多 LEGO 呢！
▲ 100多個圓形櫃桶放滿不同顏色的零件，不過如果想攞高 D 的零件就可能要用梯了。
▲ 據聞一個大杯最多可以放成千件零件入去，睇嚟真係要慢慢砌先得。
除咗「Pick-A-Brick」牆，香港店當然唔少得外國大部份 LEGO Store 都有的「Build-A-Mini」，大家可以任意組裝不同的臉、衣服以及髮型等等，砌出屬於自己的 Minifigure。不過人偶的配件種類並唔多，好多紐約店有的配件呢度都無，想要搵啱自己的配件，或者要等佢定期換款，去多幾次，買多幾隻先得。
▲ $99 就可以買到 3隻屬於自己的 Minifigure，將一家大細帶返屋企。
雖然話依家大部份玩具都係俾大人玩，不過店內都有幾個細小的 Play Area 同 Play Table 俾小朋友玩，嘗試一下砌 LEGO 的樂趣。
▲ 小朋友可以將 LEGO 按顏色砌上牆。
既然有官方店，LEGO 迷最大的喜訊梗係新產品會全球同步發售，唔駛再捱貴貨。不過除咗限量版難買 D 之外，以我觀察大部份盒裝 LEGO 都係玩具反斗城價，水貨甚至有可能更平，所以尤其說是「炒家末日」，不如話係多咗一個選擇。
▲ 店內展示了不少砌好的盒裝 LEGO，睇啱就買返屋企挑戰吧！
▲ 雖然話係玩具反斗城價，不過如果依家唔買呢架橙色波子，出到去就未必係呢個價啦！
▲ 建築物的系列都幾齊，唔駛四圍搵。
▲ 就算今次並無出香港限量版的 LEGO 都唔駛失望，由 8月18日至 22日係店內買滿 $1888 都可以換一盒限量版 Box set。
▲ 由 8月 22日至 9月 30日係店內買滿 $818 都可以抽獎一次，得到神秘禮物。
▲ 如果係 8月 18日至 31日期間，買滿 $500，而包括一個匙扣仲可以免費係匙扣上面刻名添！
今次 LEGO 官方旗艦店大部份的設置都符合預期，最起碼大部份外國店有的，香港都有，只是店內面積只有差不多 4000呎，幾乎一眼睇晒，有點失望。不過對 LEGO迷來說最大的喜訊梗係新產品會全球同步發售。雖然大部份都係玩具反斗城價，水貨甚至有可能更平，不過總算多咗一個選擇。
LEGO 認證專門店
地址：九龍旺角亞皆老街 8號朗豪坊商場 12樓 1B鋪
電話：26132888
營業時間：早上 11時至 晚上 11時
