進入數碼時代，相信大部份 wire 民都已經習慣在手機或者電腦上面睇相。唔知大家已經幾耐沒有去過曬相？今日我依莉詩就訪問了 Showa Camera 昭和相機店主白茹，以及 PhotoStationHK 老闆 Edward Wu ，了解一下為何他們仍會對一張張實體相片有所執著。
相關影片﹕
即影即有散發獨一無二的味道
相比起數碼相片，年紀輕輕的白茹反而更加鍾情菲林的不穩定性做出嚟的驚喜。她由讀書時候開始接觸菲林攝影到後來因為收集的二手菲林相機及即影即有相機愈來愈多，決定同拍檔開鋪以公諸同好，「我覺得開菲林相機店比較有人情味，因為好多時客人會番嚟沖曬或者買相紙，我地會傾好多關於攝影的東西，有時仲會將影完的相送比我。」亦因為每一張即影即有都是獨一無二，白茹非常珍惜每一位客人送給她的相片，甚至放在店內的當眼處。白茹更笑說「以前影即影即有都會係一 D 好私人的場合，因為以前影完相都要拎去曬相鋪曬。如果唔想相片係中途被其他人見到就會用即影即有相機，所以好多色情行業都會用到。」直到現在，即影即有相機仍然相當流行，大家通常會在 Party 、婚禮等難忘的時刻用即影即有記錄獨一無二的時刻，希望有一張實體相片可以保存。
如何揀一部適合自己的即影即有相機？
要影出一張啱味道的即影即有，首先就揀一部適合自己的即影即有相機。而市面上的即影即有大致分成富士及寶麗來兩類，完全唔同的風格。白茹就建議揀即影即有前要先了解自己會在甚麼場合會用，「富士的相紙相對細張同易買，而且穩定性較高，通常會係開 Party、食飯、聚會的時候用，想影完即刻同朋友 share 。而寶麗來就會較適合專業的玩家，因為相紙比較有個性，會因應天氣變得偏藍或偏黃。就算係七八十年代，都係比較多藝術家或者攝影師會用。」
▲ 除了用途，還要知道自己想要甚麼 size 的相片，「因為每一部即影即有相機影出嚟的相 size 都唔同。好似寶麗來的相紙係正方型。富士多數就係直倒，所以要睇下自己鍾意用咩構圖。」。此外，白茹覺得相紙的價錢都是重點，「如果你預期要影好多可能會買富士比較合適，因為寶麗來相紙比較貴 ，每按快門之前都會諗清楚先再影。」
▲ 談到經典，白茹就最欣賞寶麗來的設計，「雖然係七十年代生產，但可以摺疊，相當有型。」
▲ 而富士算是近年比較流行的即影即有相機，其相片質素及穩定性都提升不少，不過白茹就覺得想用富士的相機影到比較有 mood 或者藝術感的相比較難。
▲ 至於近年即影即有界的新星 Lomography 就以玩味見稱，B快門、多重曝光、顏色濾鏡等功能增加了不少創作空間，白茹亦認為 Lomo’Instant Wide 可以使用大相紙相當吸引，但在操作上有一定的難度，要試下幾次先有好的效果。
▲ 事實上，現在的即影即有相機會多了好多功能，就好似新出的 Impossible i-1 不但外觀上多了一份現代感，上面的環型閃光燈更有美肌效果，而且可以用 Apps 控制光圈快門，已經不是按個掣影張相咁簡單。
▲ 甚至乎為了令即影即有更大眾化，寶麗來更推出了一些會即時印相之餘又會記錄數碼檔的相機，將之進一步數碼化。
▲ 而近年富士亦反過來推出了印在即影即有相紙上的迷你相片打印機，希望令即影即有文化帶來新衝擊，不過白茹就比較鍾意即影即有相機多，「因為用迷你相片打印機印相之前已經知道效果，會揀最鍾意果張先印出嚟，所以同心目中沒有有太大差距。而用即影即有相機影出來的構圖就只有一張，就算番影效果都唔會一樣，有更大的驚喜。」
SHOWA 昭和相機店 — 旺角西洋菜南街66號3樓 (E2出口Bodyshop對面豐澤旁入口)
Photobooth 留住果一刻的快樂
大家除了用即影即有記錄難忘時刻外，大家都會在不少大型聚會所放置的 Photobooth 影相留念。唔少 Photobooth 更有當日活動的特色相框及 Props，令相片更有特色同紀念價值。而本身是廣告公司老闆的 Edward 找到商機，於是在三年前引入服務，「Photobooth 可以一班朋友一齊自拍，係最方便同快捷的方法吸引人流。」至於為何大家都鍾意到 Photobooth 自拍，某程度上是因為可以即時印相，「雖然數碼時代一般都可能放上網分享，但有張實物，我地會放係當眼處，會記得當時的開心。」
▲ 一般婚禮上有攝影師揸機影完相即刻印番比你，但為何還要有 Photobooth 的出現呢？Edward 認為「Photobooth 唔係純粹有張相咁簡單，而係一種有氣氛的互動，大家係開席前兩三個鐘 group 埋班人拎 D 得意的 props 去玩同自拍，比起係大台影的相玩得更放。」
▲ 唔少人都知道 Photobooth 除了印相，亦可以透過 QR code 或者 上載到 Facebook 等方法取回電子檔。唔單止留住一張相片，更可以放上網與人分享。
▲ 原來 Photobooth 都有很多的變化，由早期用 web cam ，到現在用單鏡反光相機，而將來可能會利用 Kinect ，目標都是想相片質素有所提升。而公司的第一部就是由 Edward 自己一手一腳砌出來。
▲ 談到 Photobooth 會不會取代到即影即有相機，Edward 就認為「Photobooth 係一個 setup 咗的背景，要係一個固定空間去影。而即影即有就唔會受限制，所以性質唔同，可以互補不足。不過兩者目的都係一樣，都係想張重要一刻記住。」
電子檔不能取代一齊睇相的感覺
雖然我們都習慣了在 Facebook 或者 Instagram 睇相，不過由即影即有相機到後來的迷你相片打印機，甚至近年的 Photobooth，都會在大大小小的 Party 中出現，為我們帶來一張張的實物，留下當刻的快樂。再看看自己工作枱及銀包內的相片，你可以會會心微笑。這樣就證明了，我們還沒有忘記拎住一張張相片慢慢回味的感覺。你又多久沒有試過同屋企人一齊拎起相簿睇相呢？
分享到 :
最新影片
