「燃燒吧，我嘅小宇宙！」聽到呢一句就知係聖鬥士 5小強又復活啦！之前係日本秋葉原舉行的《聖鬥士星矢》 30 週年展未必個個粉絲都可以親身去睇，但今次 12 件 1：1 等身大的黃金聖衣來到香港啦！當然仲有好多香港版獨有既野賣添！依家就等我依莉詩率先帶大家去睇下呢個展覽有幾咁無敵啦！
香港獨家青銅聖鬥士
一去到時代廣場，未親眼見到黃道十二宮的「黄金聖鬥士」聖衣之前，你可能已經會被露天廣場的雅典娜女神深深吸引。佢係「聖域鐘樓」前所散發的仙氣十足，難怪聖鬥士會如此為佢賣命！再望上去 5米高射手座星座型態紀念像，以黃金閃爍的外型顯現同樣係全場焦點，而下方仲有 5位青銅聖鬥士等身大聖衣箱，一於發揮自己的小宇宙，試下孭唔孭得郁吧！香港獨家的展品當然唔止咁少， 5位聖鬥士主角：星矢、紫龍、冰河、阿瞬和一輝，更首次以 1:1 等身大的《冥王篇》神聖衣造型亮相，雖然同經典的《黃金 12 宮篇》風格有所不同，不過神聖衣系列每一個細節都非常講究，顏色亦非常豐富，粉絲們一定要去打打卡影影相啦！
▲「聖域鐘樓」每日中午12時起 12盞火會亮起，讓雅典娜女神仙氣倍增！
▲ 5位青銅聖鬥士：天馬、天龍、鳯凰、仙女及白鳥等身大聖衣箱放係聖域上，等大家發揮自己的小宇宙，試下孭唔孭得起！
▲ 旁邊的星矢著上射手座黃金聖衣高舉弓箭，相當有型！
▲ 另一邊 ， 5位聖鬥士主角：星矢、紫龍、冰河、阿瞬和一輝，以 1:1 等身大的《冥王篇》神聖衣造型亮相，彩色造型就好似係動畫跳出嚟一樣。
▲ 造型咁逼真的星矢係面前，係咪好想試下佢的「天馬流星拳」呢？
▲ 仙女座阿瞬雖然睇落有 D 似女仔，不過身上掛有的鎖鏈都好好型好有型架！
▲ 有「不死鳥」之稱的一輝，聖衣背著大大對翼，非常華麗。
▲ 黃髮的冰河修行地係西伯利亞，我諗佢一定係唔怕凍嘅！
▲ 據說紫龍的「廬山昇龍霸」可以令瀑有逆流，唔知嚟到香港又會唔會令大家銀紙回流呢？
日本原裝十二宮「黄金聖鬥士」聖衣
睇咗咁耐，終於到主角，呢 12個 1:1 大的黃道十二宮「黄金聖鬥士」聖衣係喺日本「秋葉原UDX」早前舉行的聖鬥士星矢30周年展運過來，十二宮中白羊座穆、金牛座亞魯迪巴、雙子座撒卡、巨蟹座迪馬斯古、獅子座艾奧里亞、處女座沙加、天秤座童虎、天蠍座米羅、射手座艾奧洛斯、山羊座修羅、水瓶座卡妙及雙魚座阿布羅狄，一字排開，金光璀璨。係咪好想試著下呢？
▲ 稱之為「最接近神的男人」處女座沙加，連獅子座艾奧尼亞都提醒星矢要注意沙加睜開雙眼時的強大力量。
▲ 而 12件聖衣中，金牛座的聖衣高達 2.1 米，相當巨型。
▲ 展館內不時以廣東話播出各12位黃金聖鬥士出絕招時的經典對白：「曙光女神之寬恕」、「廬山昇龍霸」、「積屍氣冥界波」、「幻朧魔皇拳」、「閃電光速拳」…咁熱血，童年回憶番晒嚟！
一次過睇 30年間聖鬥士 Figures
除咗 1:1 聖衣比你影相打卡睇過夠，同場更展出咗 30年間 Bandai 所推出的約250個《聖鬥士星矢》Figures ，無論係黃金聖衣定青銅聖衣，海鬥士定係冥鬥士等等，多款的造型Figures都齊集係度。如果以前儲唔齊，今次就可以一次過睇番晒了！另外仲有聖鬥士星矢 D.D.PANORAMATION 系列巨型情景。雖然每個角色都細細笠，但就重現番一幕幕經典的打鬥場景，值得回味。
▲ 30年間 Bandai 所推出的約250個《聖鬥士星矢》figures 可以一次睇晒，好滿足呢！
▲ 更有首次展出的星座形態及武器配件。
▲ 除咗 5小強，仲有女神雅典娜架！
▲ 一個個迷你聖衣箱超級可愛呢！
▲ 呢個聖鬥士星矢 D.D.PANORAMATION 系列巨型情景重現番一幕幕經典的打鬥場景，值得回味。
▲ 另外，仲有多幅日本展覽運過來的漫畫原稿。同樣值得欣賞。
排長龍買會場限定 Figures
睇完展覽，買精品是常識吧！今次的限定的商品相當吸引，包括香港限定的黃金天馬及黃金鳳凰聖衣神話 EX 及 日本限定的射手及雙魚座聖衣神話 EX 亦會以香港包裝推出，更有 12 款 Gold Cloth Object 及 Graphic Art Collection 等。我今日11點已經見到有幾百人排隊搶購了，各位粉絲要買就襯早啦！
▲ 這款跟日本星矢30周年展同款，但改用了香港展限定包裝的 OCE版人馬座 EX 聖衣 定價 $700。
▲而 OCE版雙魚座 EX 聖衣據說連日本都斷市($700)。
▲而身穿新生聖衣但以黃金塗裝的星矢，係會場限定包裝也值得收藏 ( $600)。
▲ 而未推出過金版的EX新生青銅鳳凰 $600，會場限定包裝也值得收藏。
▲ 只要買齊 17款會場限定的 file 仲會送女神雅典娜 file 添 ($40/個)！
▲ 另外仲有各種特別的精品啊！粉絲們記得帶夠彈藥出發啊！
依莉詩：「為星矢迷而設的展覽」
時代廣場的大型展覽好多時都捉住男士們的心理，由上幾年的高達到星球大戰展，而今次更係七八十後的童年回憶。呢個展覽的聖衣造工好精細，每一件都非常華麗，粉絲們應該會好滿意。而展館內播放的廣東話對白更令童年回憶番晒嚟！就算連唔係粉絲既我，都感受到果種熱血感覺及小宇宙既力量啊！
《聖鬥士星矢》30 周年展覽
日期：2016 年 8 月 8 日 至 8 月 31 日 (上午 10 時至晚上 10 時)
地點：銅鑼灣時代廣場露天廣場與地面展覽廳
分享到 :
最新影片
