雖然我依莉詩好鍾意幫指甲扮靚靚，但下下要去美甲店坐 2-3個鐘等美甲師畫花都幾花時間。如果自己黐貼紙又好易甩。今次就比我搵到部好嘢，聲稱最快 35秒就可以幫一隻手指畫花，可以絕對係愛換款的女士恩物。於是我就借咗嚟同公司啲同事一齊玩啦！
細細部似足多士爐
有留意的 wire 民都知道，之前我都介紹過一部可以印圖案係指甲的彩繪機，不過今次呢部 O2Nails 家用美甲彩繪機 size 細好多，只有四分三張 A4紙咁大，放係屋企或者 Office 都唔會太阻地方。如果話上次的 ArtPro Nail 高清數碼美甲彩繪機 係專業部，咁今次呢部就係家用版。原理當然同之前的差唔多，都係用 3色的墨水，好似噴墨打印機咁打印圖案係手指上。不過可能因為機身輕咗，打列的時候機身會有明顯震動，好彩的是手指已經固定好，唔會影響繪圖效果。
▲ 呢部O2Nails 家用美甲彩繪機 size 細好多，只有四分三張 A4紙咁大，放係屋企或者 Office 都唔會太阻地方。
▲ 原理就好似 迷你噴墨打印機咁，一舊墨有齊紅、藍、黃 3色。
▲ 機背有個 USB 頭，可以接駁 LED 燈機 ，方便油完底面油之後照燈。
▲ 好似 Nailla 美甲 LED 燈機 就係用 USB 連接，插埋落去就唔駛額外搵尿袋。
手機揀圖即時睇
O2Nails 家用美甲彩繪機可以做到咁細，某程度係因為全部用晒手機 Apps 經 WiFi 控制，無論想印 D 咩圖案都可以即時係 Apps 揀。除咗 Apps 內置的 600個指甲圖案，每一季都會有更新，真係只係揀佢 D 圖案都已經有選擇困難！而最正係可以直接印手機入面的相，超級方便！
▲ 不過現時只有 Andriod 版，iPhone 用家就要等等啦。
▲ 係手機 Apps 可以睇到手指係彩繪機入面的位置，仲可以編輯圖案的大小同旋轉，令圖案位置更加準確。
35秒印出清晰圖案
講咗咁耐，大家最關心當然係印出嚟既質素，呢部彩繪機聲稱可以印到 300 dpi 的品質，我同幾位女同事都測試過，發覺穩定性同細緻度都無專用級的咁高。如果印一 啲鮮色的圖案，好似卡通或者花紋都算清晰，不過要印粉色系的圖案或者相片的質素就一般，所以揀圖案都要有技巧，可能要試多幾幅先有好效果。至於時間方面，印一隻需要 35秒，雖然無專業級咁快，不過家用嚟講已經好夠。
▲ 比卡超印得都幾細緻，不過中間的水哥就有點朦。
▲ 預設的圖案基本上係最安全，唔會有失準的問題。
▲ 花紋都有唔錯的效果。
▲ 不過偶然都有失敗的例子，好似呢位女同事油底油的時候唔均勻，結果就印成咁。
依莉詩：「細細部簡易用，但價格親民 D 會更好！」
呢部 O2Nails 家用美甲彩繪機 size 比專業級的細好多，而且完全用 Apps 控制好易用。唔駛去美甲店都有畫花效果，雖然圖案印出嚟唔多穩定，唔係款款都咁清咁靚，不過我覺得已經好吸引。可惜要成七千蚊一部，我諗都係應該無乜人捨得買嚟家用，應該美甲店或開 party 用的機會比較多了。
O2Nails Mobile Nail Art Printer
售價：$6980
查詢：ArtProNail (9730 5202)
Leave a Comment