唔知有幾多讀者有 Keep 住睇港女寫週記呢？如果真係有，我諗你地一定知港女細個最鍾意打嘅機就係 Pokémon（次前講過：我細個打機認真過溫 TSA、那些年，我們有的電子娛樂，原來我講過兩次，可想而知港女個時真係好鍾意玩），所以今次 Pokémon Go 喺香港一上架，港女 唔會扮清高 梗係二話不說即刻變身成為小精靈訓練員啦。玩左三日，見到有鋪天蓋地的新聞，個個公園條條街都有人潮係度捉小精靈，港女先知道「 I’m not alone. 」原來玩 Pokémon 係一個咁大嘅集體回憶，咁多人心入面都有一個小精靈訓練員的靈魂！
呢幾日，港女去捉怪的時候發現到，除左同遊戲一樣真係有好多人企晒喺條路度，有人會無啦啦阻住你，有人唔知乜事喺度自轉之外，就係我同朋友仔都會一路捉一路哼住以前打機時嘅配樂（Sorry，並唔係陳浩民唱嗰首），行緊路就會哼住主角踩單車時播嘅歌，遇怪就會突然變成好緊張嘅對戰音樂，捉到怪就會一齊哼出成功的音樂～?哈哈哈，好小學雞。不如等港女分享幾首經典同埋我鍾意嘅配樂俾大家啦！（如果大家有咩好介紹都話埋俾我聽丫！）
純白鎮主題：呢個係第一關，雖然大家係呢度唔會逗留好耐，但一定唔會忘記呢段音樂。
黃金市主題：細個個陣係會特登飛去呢個鎮聽首配樂，真係好搞笑。
小精靈中心：我諗大家去得最多嘅地方都一定係呢度喇，所以點會唔記得呢首呢？同埋呢首係真係好聽嘅！
游水主題：港女以前好鍾意水系精靈，因為可以騎佢地出海，首歌又好聽～～
因為呢啲咁 無聊 細微嘅舉動，我先發現原來 小朋友記憶力真係好好 Pokémon 真係好深入民心，而且更無意間佔據左童年記憶嘅一個部分，我地亦都從來未曾忘記過。而家 Pokémon Go 出黎，一次過勾起晒以前好多回憶，港女都好慶幸有個咁美好的童年，唔知而家啲 00 後嘅童年係點架呢？佢地大個會唔會好似我地咁，有咁多集體回憶呢？