7 米高機動裝置！ Tsum Tsum Walk N’Roll Festival 登陸又一城

2016-07-18

Published by

Billy

話咁快又到暑假啦！又一城係即日起至 8 月 16 日舉行「Disney Tsum Tsum Walk N’Roll Festival」，一眾 Tsum Tsum 迷絕對唔可以錯過！今次除咗有影相場景同 P0p-up Store 之餘，仲有街機同貼紙機，亦都聯同 TOMICA 推出 Tsum Tsum 系列，活動相當豐富！

必影！7 米高 Tsum Tsum大型機動裝置

今次「Disney Tsum Tsum Walk N’Roll Festival」設有四大動畫機動場景，而當中最受觸目嘅當然就係 Tsum Tsum 鐘樓，主角米奇每半小時都會係鐘樓驚喜現身，為大家現場報時。除咗鐘樓之外，仲有搖滾劇場﹑劍球狂熱以及壽司嘉年華，每個裝置都相當可愛，呃 like 必影！

Tsum Tsum Walk N’ Roll Festival Pop-up Store

今次 Pop-up Store 產品量都相當多，多過百款，當中包括文具用品、飾品、家居用品、旅行用品及服裝等；亦都獨家首推 Disney Tsum Tsum DIY 系列，尤其係 3D 系列，一共有三十款 Tsum Tsum 配飾，除咗可以做獨立小配飾外，仲可以鑲入 Tsum Tsum DIY 系列商品上如時鐘﹑雨傘﹑水樽等等，打造獨一無二嘅 Tsum Tsum 商品！

Tsum Tsum DIY 3D 系列配飾，每個都可分體為前後兩個部分，以安裝在 DIY 3D 系列產品之上。售價為 $48/隻，全系列共 30 款，現已率先發售 22 款。

Tsum Tsum TOMICA專區

今次 Tsum Tsum TOMICA 專區除咗一般嘅 TOMICA 之外，當然就唔少得 Tsum Tsum 系列啦！除咗有以圓碌碌

Tsum Tsum 造型化身嘅玩具車買之外，旁邊仲會有個以奪目紅色吊橋設計嘅模型比大家觀賞。

Tsum Tsum 貼紙相機﹑自製姓名貼紙機

除咗機動裝置可以影相之外，係 L2 層都有另一名貼紙相機可以影相，每次 $40 ，而相框除咗有 Tsum Tsum 之外，亦都會有 Inside Out 嘅。小編試過，雖然話係貼紙相機，但其實相紙非常普通，而且影出嚟嘅質素麻麻，加上準備指示唔太清晰，結果小編影出嚟都幾幅都同一個姿勢，即使唔算太貴但都唔太推薦。不過隔離嘅自製姓名貼紙機，同樣價錢而且相當得意，字體選擇都有三款，印出嚟嘅質素都相當唔錯而且又實用，可以貼係簿仔，不妨可以考慮一下！

啊，最後結果只影得兩個 pose ，而且仲要影出嚟非常之暗，即使身為男仔嘅小編都要話：「貼紙相唔美顏點叫做貼紙相啊！」

同樣係 $40 蚊嘅自製姓名貼紙，相對地實用之餘，出嚟嘅效果都相當唔錯喎，而且有成 18 張可以用，性價比都幾高！

Tsum Tsum拍照專區、貼紙機及銅幣製作機

而係 G 層亦設有 Tsum Tsum 拍照專區，三大主角米奇、小熊維尼以及 Elsa 坐上爆谷造型列車同大家一齊影相！而且旁邊就有 Tsum Tsum「街機」，相信有係機鋪玩過嘅 Tsum Tsum 迷並唔陌生！依家只需要即場讚「Tsum Tsum Festival」及「Festival Walk 又一城」Facebook專頁並上載展覽相片，就可以打 Tsum Tsum 街機啦！