Sanrio 的卡通人物點止得 Hello Kitty 同 蛋黃哥，其實 Kerokerokeroppi 都有唔少 Fans，Unwire 入面就有一個啦！一知道 Keroppi 進駐葵芳新都會廣場之後，同事就立即叫我依莉詩出動，帶第一手消息番嚟俾佢了！
今次 Keroppi 以露營為主題，所以整個營地都同佢一樣，充滿不同深淺色的綠，感覺好似置身於森林中，自由自在。
夏天係睇銀河最好的時候，Keroppi 同 密友 Keroleen 就齊齊係大堂中心紮營，圍住營火煮食，擺設好餐桌開餐，再席地而坐談天說地，時而抬頭欣賞滿天星，遠離煩憂，享受整個溫馨又甜蜜的晚上！
▲ 電燈膽 Keroppe 就攤係河流上的大荷葉，隨水漂流眠一眠！
情侶紮營夠晒浪漫，但一家人就最好坐露營車。另一邊廂 Keroppi 同朋友們齊齊登上時下最流行的露營車。好友 Ganta 享受由總廚 Kyorosuke 炮製的露營三文治，Keroppi 弟弟 Koroppi 就爬上車頂遠觀仿如世外桃園般的森林美景，感受野玩味道，度過令人身心舒暢的悠閒下午！
▲ 露營車車頭係大大個 Keroppi 頭，揸出街一定好有型。
▲ Keroppi 媽媽正為嘗試用猛烈的太陽煮蛋。
Keroppi一清早抵達大本營，係場後塔了5.5米高巨型避暑木屋，文青好友 Noberun 仲係入面一邊品嚐茶點，一邊開拓書中的黃金屋！
▲ Noberun 好專心咁睇書。
▲ 隻隻青蛙都咁似樣，未必個個都識分，場中就有人物介紹牌，介紹每一隻青蛙的名字、生日日期和嗜好。
除咗影相位，場的另一半有 3個遊戲等你鍛鍊手臂上的二頭肌之餘贏走可愛爆燈的別注版 Kerokerokeroppi 野外隨身袋。只要係商場以電子貨幣單一消費滿 $400，就可以兌換遊戲咭一張，累積滿指定數量印花就有架啦！
▲ 有 Teruteru 睇實你玩森林投籃，係咪醒目 D 呢？
▲ 釣多幾條魚加餸先！
▲ 累積滿指定數量印花就可以得到呢個靚靚野外隨身袋。
去 Camping 當然要做足準備！只要係指定彩妝及個人護膚商戶以電子貨幣累積消費滿 $1,500 就可以換領 Kerokerokeroppi 戶外野餐墊或 Kerokerokeroppi 迷彩雨傘，等你可以帶埋 Keroppi 去野餐。
▲ 橄欖綠及深啡色的迷彩圖案設計，為野營用品增添時尚感。
▲ Kerokerokeroppi 迷彩雨傘亦相當時尚，曝曬定落雨都無有怕。
旁邊更有 Keroppi 期間限定店，令大家係露營作樂的同時，亦能滿足購物慾！當中有不少去露營要帶不少的物資，例如背包、風扇，鴨嘴帽等等，相信粉絲們這個夏天也會透心涼。
▲ 兒童背包 $199.9/個
Keroppi 真係好少有展覽，雖然今次影相位唔多，有一半的地方都係遊戲區，不過露營車非常造型細緻，每罐汽水都有 Keroppi 圖案，十分可愛。而今次的商場禮品亦非常有型，我的死忠同事仲表示好想要添！不過 pop-up store 都係同平時 Sanrio 的 pop-up store 一樣，大部份精品都可以係普通 Sanrio 買到，所以不太特別。
Kerokerokeroppi Forest Camping
日期 ：即日至8月31日 (上午10時30分至晚上10時)
地點︰新都會廣場3樓天晶館