科技的進步，現今的小朋友都遠離電視，紛紛上網追最新的卡通，甚至批擊粵語配音「難聽」，到底粵語配音是否仍然需要呢？今次就訪問了 3位曾經為 TVB 、ATV 及 HKTV聲演過多套卡通片，而現在都是自由身的粵語配音員，了解一下粵配衰落的原因。
小時候不懂上網，相信唔少 80-90後都同我依莉詩一樣，睇經港版配音的卡通片長大。曾經每日返到屋企就立即開電視，蠟筆小新、美少女戰士、寵物小精靈等都係我們曾經討論過的內容之中，而背後一把把配音員的聲音亦是我們成長中的一部份。
經典配音 : 小新媽媽- 美冴
今次訪問的 3 位配音員中，最資深的就是譚淑英。你可能未聽過她的名字，但一定聽過蠟筆小新媽媽 — 野原美冴 嗰把既潑辣又響亮的聲線。譚小姐 1975年就由麗的電視藝員訓練班第一期出身，後因亞洲電視配音組解散而任職自由身配音員及領班。
經典配音 : 銀魂- 土方十四郎
要數到配音界的「靚仔聲」必定是黃榮璋 (章魚) 莫屬。他由 2004年開始在 TVB 配過無數男主角及男配角的角色，《日式麵包王》的河內恭介、《銀魂》的土方十四郎 及《衝鋒21》的小早川瀨那 都是代表作，直至 2012年離開無綫電視配音組，到現在是自由身配音員。
經典配音 :第三代蠟筆小新
至於王慧珠(Kimmy) 係第三代蠟筆小新，亦曾經係 HKTV 出任配音員，2013年任職自由身配音員。
(請耐心等候 Loading)
我們 unwire .hk 「玩新活.樂科技」當然要先路各位 wire 民探討一下香港的配音科技 ! 唔少人都覺得配音就是一班人坐在黑色的房內，一邊對著畫面，一邊讀對白。科技進步如高清電視或數碼頻道都跟他們扯不上關係，但其實配音科技都有「數碼化」。以前錄影帶時代得一兩條音軌，要一次過錄晒環境聲同對白。師傅會預先剪開一段段，配完一段再一段，如果中間要 NG ，就要對白同背景聲一齊重新錄過。
而數碼化之後音軌多了，讀錯一粒字都可以補，配音員亦唔需要幫手做效果，例如倒水、開門等，都係罐頭聲由另一組人做。章魚認為這個改變幫到他們加快完成工作，不過就令新人的技巧低咗。「依家就算 D 位唔啱，都可以幫你拉番，所以新人就會依賴咗，無咗個基本技巧。以前出嚟質素可能無依家咁好，但就養成一班前輩的配音技巧同質素好高。」譚小姐就覺得「以前如果新手守尾關就會震過貓王，因為緊張，直接影響水準，所以以前的表現無依家發揮得咁好。」看來配音界亦逃不過科碼化令成品質素好了，但新人質素下降的命運。
另一方面，因為音軌的增加，原本齊晒人錄音，俗稱「圍毆」的配音方式已經改變了。亦因為大家可以分開錄，好多時會出現男女主角不同場，配音員要對空氣交流的情況。譚小姐表示「以前日見夜見，飲茶會輪流霸位，關係融合好多。」
有科技的幫助，配音的卡通理應該質素提高咗，但又點解現在的小朋友好似沒有了以前我們睇卡通的熱情，甚至近一兩年粵配會遭受到如此的批評。Kimmy 認為「以前科技無咁發達，變咗大家都會鍾意一返屋企就開電視睇卡通，大環境令大家都鍾意追。」 章魚亦表示「現時 TVB 沒有了兒童時段，而且好少買一線卡通，變咗好多時追卡通都係上網睇。」就是當大部份人上網一早睇日版，聽咗原聲，之後再聽廣東話配點都係有差別。
事實上，「睇卡通聽、聽原聲，D 卡通都係配落去之嘛！睇外語劇都話想聽番現場聲有分別，但卡通 D 公仔係唔識講嘢，都係配落去。」譚小姐認真地道。香港的配音員未必真的比日本差，或是未能表達到角色的真粹。奈何，香港好少原創卡通，大部份需要配音都有個原聲。章魚覺得「原聲永遠都係角色的第一聲，由出世果時把聲就係佢，好難有比較。」
亦因如此，Kimmy 配音時「我地會聽住原聲的聲線同語氣盡量去跟。」畢竟要角色的外型、性格、台詞這可是配音基本之中的基本，試問如果真係唔合格，電視台、電影公司又點會比卡通出街呢？
某程度上，大家曾經在各大討論區熱烈駁火的《Love Live!》或是「好難聽」式的批評，說穿了都是先入為主的概念。或許就是，好多時套卡通都未播，已經上網睇咗日本版，所以對粵配的卡通無咁有感情吧！
除了原聲會先入為主，對粵配聲線早已經耳熟能詳的角色，後繼的配音員亦相當大壓力。 作為第三代小新的 Kimmy 表示「小新算係我其中一個做得多功課的角色，因為一來大家都聽慣咗廣東話的聲，二來本身日本都有把聲，我想兩者取得平衡，所以真係有壓力。」
另一個崇尚原聲的原因，某程度與日本配音員聲優化，而香港配音業倒退有關。章魚表示「有時我地睇 D 好紅的配音員，可能只係把聲靚，而無乜講配音技巧，會甩嘴甩得好利害，只不過因為佢地名聲太大，好似四大天王求其唱一首歌你都會覺得好聽。」
然而，無何否認，日本的聲優好受到尊重，而且製作相對認真，無論時間、薪酬、劇本都同香港有一段距離。單單是配音的靈魂－劇本，原來大家都唔可以只係寫劇本當職業去糊口，只能靠配音員係工餘時間寫劇本，只能當外快。「試問咁低微的人工又點可以要求人搞盡腦汁寫精景的對白，寫一個好劇本呢？」
回望香港的配音業，譚小姐坦言「香港比較流水作業，大家收大排檔的價錢，做到普通餐廳的質素已經好有良心。」原本以前一套劇會有 13-15人配音，但因為預算問題變咗一個配音員要同時配幾個角色，隨時由 3歲演到 80歲，將人都用到盡。「依家除咗無線仲有得對片，其他所有錄音室都唔對片，一見到條片就講，唔會事先知道個劇情，唯有夾生食。好有經驗的配音員夾生食都有 60-70分已經好唔錯。」
雖然粵配愈來愈不受重視，不過譚小姐認為配音幾時都有需要，特別係俾年紀大的人，就算你有文化，識睇字，但都未必睇得切，而 Kimmy 更表示「特別係依家就更加要保護廣東話，因為我地都係講廣東話，有廣東話版本應該好合理。」事實上，唔鍾意配音版無問題，就好似你鍾意食 Pizza ，我鍾意食魚生，兩件事無乜抵觸。章魚亦相信「香港無論點都會有粵語，就算萬一普通話成官方語言，但廣東話點都會存在，始終 60-90後未死，都係會接受，只係擔心普教，令香港分化。」
縱使配音員係香港唔太受尊重，除了大電視台，大部份都係自由身，工作上無保障，人工追唔到通脹之餘不升反跌。不過他們 3位都一直不為金錢，浪費心力時間，以各自的方式，捍衛着粵配這一片粵語的淨土。
▲ 目前 Kimmy 是<覺醒配音組>的成員，嘗試以專業去諷刺時弊。
▲ 譚小姐同章魚分別成立<譚淑英配音工作室>及<章魚配音小組製作室>，培訓更多出色的粵語配音員外，更有興趣班讓有興趣的人了解粵配的工作。
去年叮噹的配音員保全叔離開我們後，大家都紛紛想找會以前的聲線。但原來係配音員眼中，經典的聲線未必能帶給他們名利。Kimmy 解釋「經典唔係咁易創造，聲音的價值唔會因為自己做得耐而升高，反而會問你有無把新的聲。」而章魚係 TVB 工作期間幾乎每次都配男1男2的角色，係別人眼中非常羨慕，然而「好現實，十年前初初入行會好希望配到某 D 角色，例如聖鬥士星矢入面一輝就最好，但後來發現係兩樣嘢。要搵錢，把聲愈普通，愈無人認到，但又有技術就最好，因為夠百搭，可以兼角。主角會有名氣，但可能好耐都無一套。」
既然經典唔易創造，我們就回顧下十套大家都曾經睇過的卡通吧！係咪睇相已經聽到聲呢？
多啦 A 夢係 1997年之前大家都叫做叮噹，點稱呼完全可以掩露年齡。故事內容唔駛多講，當大雄每次遇到問題都會搵叮噹用法寶解決。相信每個人兒時都希望有一個叮噹，帶俾我地無限希望。講到叮噹的配音員當然係保全叔。然而《STAND BY ME：哆啦A夢3D》電影預告片最後一句：「我唔可以再留喺度，真係要走喇！」一語成讖，以後我地只能睇番叮噹聲番呢把響亮的聲線。
蠟筆小新算係亞視最數一數二的卡通，野原美冴的配音員譚淑英就分享，「配小新時好似睇戲咁，配配下都會笑，因為佢係比成人睇的卡通，細個睇係享受唔晒入面的幽默感。小新好生活化，個陣我個仔同小新差唔多大，配配下我都覺得好似做緊自己。」不過，對比日版，原來港版為咗過電檢，好多對白都要改，某程度係失色咗。呢 D 都係大個先知呢！
美少女戰士最近 ViuTV 播返，內容講到迷糊的愛哭鬼月野兔與額頭上有著月牙印的黑貓露娜相遇後，竟變身成一個充滿愛與正義的水手服美少女戰士“水手月亮”！雖然係經型的少女卡通，不過相信係唔少少女的集體回憶。
而男仔就一定會睇《足球小將》，一場場的足球比賽非常熱血，當年有唔少男仔都因為想練成戴志偉的倒掛金勾而去學足球呢！
數碼暴龍雖然無停過，一路都有新版，不過始終都係覺得初代最好。11歲的少年八神太一同 6個朋友一齊參加了夏令營，卻被神秘地送到了一個多彩的數碼世界。記得果陣一人都有幾部暴龍機，係街係咁搖，搖到手都斷先到黑暗塔呢！
寵物小精靈定係依家叫的寵物寶可夢同樣都係原始好，比卡超、車里龜、小火龍…記得以前真係會背晒 150隻寵物小精靈的名架！唔講唔知，原來譚小姐係新寵物小精靈入面配武藏的角色呢！
百變小櫻最近再出連載漫畫，唔知你又 buy 唔 buy 小櫻同小狼變咗中學生，不過呢句「蘊藏住黑暗力量嘅鑰匙，係我面前顯示你真正嘅力量，.契約之下，小櫻命令你，立即解除封印！」的咀咒應該都刻咗係唔少女仔的心中。
至於一休和尚未必係令人好深刻印象的卡通，不過對配音多年的譚小姐來說，係一套最深刻的卡通，「我最鍾意一休和尚的媽媽，有時會配配下流眼淚，因為遇到感人的劇情，進入咗個角色，控制唔到個情緒。入面每一個故事都會帶到一個理念，好有啟發性。係以前的時代係一個好有質素的劇本。」
以前幾乎套套卡通都有主題曲，最記得果陣人人都唱住「爆炸好麻煩爆炸好麻煩」。雖然唔係主角，不過章魚係 BOM BOM 彈珠人太空戰士聲演大寶同大地彈珠人架！唔知大家又認唔認得出呢？
最後就係日式麵包王，入面的「太陽之手」熱血少年東和馬，從小立志，做出專屬於日本人的麵包。當中的吵吵鬧鬧好搞笑的呢！而章魚就係聲演河內恭介，「我最鍾意就係呢 D 開心，玩嘢的角色。」
屬於我地的回憶當然唔止 10套咁少啦！櫻桃小丸子、反斗小王子、Keroro 軍曹、超速YOYO、小魔女 Doremi 等套套都係經典呢！
