各位參加咗 One Piece Run 的朋友係咪都已經準備好出發呢？唔只跑咁簡單，香港首個為期一個月的大型《One Piece》主題嘉年華都係今日開幕啦！我依莉詩就率先去到現場試探軍情，話比大家知如何最有效率咁「玩吧！食吧！跳吧！」
▲「前進號」同「烈陽號」已經駛離「偉大航道」，停泊係香港島中環海濱區，連續 31日俾你入內玩餐飽。
相關影片:
1) 泳衣打底 避免穿會「飛脫」鞋子
呢個嘉年華講明會玩水，所以最好帶定套衫到場內更衣室換，避免著牛仔褲呢類濕咗會「十分有份量」的衣著。最後就著沙灘裝同泳衣打底，不過泳衣就唔好著「一件頭」個種，事關天氣太熱，好易焗到中暑。至於鞋方面就好重要，咪以為要濕身著拖鞋去實無死，滑梯要除鞋玩無問題，但阻礙賽又跑又跳，有個 model 一落場就爛拖鞋了，而我打算赤腳玩，不過充氣裝置曬得太熱，跳兩下就會生水泡了，所以最好就著波鞋同厚襪玩啦！玩遊戲時亦應該脫下飾物，唔好袋住電話、銀包、鎖匙等貴重物品或硬物，以策安全。
2) 先玩濕身滑梯熱下身
要玩得盡興，我建議一開始先換衫玩咗會濕身嘅滑梯先，因為濕身嘅滑梯要除鞋玩，所以呢個時間著拖鞋就最 feel。如果細膽嘅朋友可以先到大型「前進號」船型滑梯障礙賽熱下身，之後先玩會彈到飛起嘅「奈美沖天奪寶滑翔梯」同 高 9.6米的「魯賓百花繚亂滑水天梯」，咁就夠晒刺激又清涼。
第一站：前進號水手訓練區
第二站：奈美沖天奪寶滑翔梯
第三站：魯賓百花繚亂滑水天梯
3) 勇敢衝出入團障礙賽
玩完會必定濕身的遊戲可以先換番對波鞋，準備迎接 4 in 1 戶外障礙賽，拎限量獎牌。4關分別以 4位主角形象跟配色設計，當中有路飛「橡皮槍彈」拳頭陣、「狙擊王」烏索普的槍林彈雨、索柏「毛皮強化」彈彈球，「鐵人芬奇滑梯」，完成就可以得到獎牌1個，並登上《One Piece》頒獎台影相留念。要提提大家，障礙賽少D膽式同體能都唔得，所以要量力以為啊！
▲ 首個挑戰係路飛主題的橡皮槍彈拳頭陣，挑戰者要一邊走過獨木橋，再以靈活身手避過旋轉橡皮槍彈的攻擊。一唔小心就要硬擋一拳！
過關心得：最緊要睇清楚紅棒的轉向，一有機會就狂跑。如果跑唔切就要即刻跳起，唔係就會被撞到。我就狠狠地食左一拳，雖然唔痛，不過就暈暈地了。
遊戲難度：★★★☆☆
▲ 第二關係索柏的挑戰區，地面上有一顆一顆彈力十足的彈彈球，你要連爬帶跳，邊彈訪跑，盡力跑到終點啊！
過關心得：講真呢關其實唔難，只要每一下飛趴埋個波就得，不過因為d波唔多夠氣，好難企得穩，真係少D體能都唔得。
遊戲難度：★★★★☆
▲ 第三關亦係最難一關，烏索普就係自己的挑戰區佈下旋轉平台陷阱，一不小心就會失去平衡、天旋地轉！
過關心得：本身要由轉台跳去黃色地區已經好需要勇氣，而且係個轉台停得愈耐就會愈亂，所以計劃好路線之後就好一口氣跳上轉台再跳走，唔係就唔會再敢前進。
遊戲難度：★★★★☆
▲ 如果之前玩過晒濕身滑梯，最後一站可以話係小兒科！有型有款的爬上去吧！滑下去就完成最後一個挑戰區，向著終點進發奪取紀念金牌。
過關心得：如果玩完濕身滑梯，呢條一D難度都無，游繩上去瀡番落嚟就完成架啦！
遊戲難度：★★☆☆☆
4) 套圈圈遊戲超易中
玩完刺激的遊戲，不妨玩下攤位贏精品。 7個攤位按主角特色設計，路飛拋草帽、烏索普射擊、奈美導航、魯賓旋轉花、索柏藍波球、芬奇可樂、布魯克音樂遊戲等等。而我就覺得芬奇可樂最簡單，玩3次，3次都最少中細獎，可以話係百發百中。
▲呢個水槍 game 最難玩，就算射中個波都唔會跌。
▲呢個掟階磚就好講彩數，不過有 4次機會，都算抵玩。
▲眼界好既可以玩呢個，難得都唔太高。
▲草帽就講少少技巧，要斜斜地向上拋，但又唔可以太大力。
5) 太熱要飲杯抖一抖
雖然話玩好重要，不過暑假係戶外都要飲多D野補充水份。玩到咁上下記得去飲番杯沙冰涼下。
▲ 玩到攰記得去買杯野飲抖一抖啊！
▲飲杯沙冰簡直透心涼！搞笑的是一盒盒上面滿滿木魚花的是白魚蛋，而唔係章魚燒。
6) 入 pop-up store 避免中午曝曬
中午時分天氣好曬，未必個個頂得住，出發前除左要帶齊防曬、芭蕉扇、毛巾同水外，晏畫最好去 One Piece Stage 大舞台睇表演，又或者到旁邊紀品店，先試試各式《One Piece》主題美食跟特飲，再搶購AAPE x One Piece海賊迷彩tee、短褲、防水手機套、大型水槍 及「One Piece Summer Carnival」限定精品服飾、由東映動畫引入的精美《One Piece》紀念品。
▲Pop-up Store 係其中一個有冷氣的地方，避避中午個太陽就最岩。不過有幾位海賊王 fans 就表示產品比係街賣得貴呢。
▲cafe 的甜品好可愛架！
▲ AAPE x One Piece海賊迷彩tee、短褲、防水手機套、大型水槍，著晒上身應該好有型。
▲ 仲有唔少「One Piece Summer Carnival」限定精品服飾、由東映動畫引入的精美《 Piece》紀念品。
7) 買全日飛最醒目
至於收費方面呢，廣告成日話 $50，其實只係入場費，入到去每樣都要額外收費，所以如果想玩晒所以遊戲的年輕一族最抵就係買 星期一至五 $400元 或 星期六及日 $500 的全日票，可以全日無限次玩 4項戶外體感障礙賽遊戲、兩條大型滑梯，及「前進號」船型滑梯障礙賽。而細膽鬼或者帶住小朋友都可以買 $50 入場劵感受氣氛。最後提提大家，因為 7月10日（星期日）舉行的 One Piece Run Hong Kong 2016參加者，可在同日免費入場，所以唔係跑手就避免當日入場啦！
依莉詩試玩後感：「膽細 D 都唔敢跳！」
我因為出左D意外，又因為天氣太熱，結果玩完障礙賽已經成為第一個入急救站的人，所以在此要提提大家就足準備先好出發！至於好唔好玩，我覺得係正既！障礙賽就好似玩歷奇訓練咁，少D膽都唔敢跳，不過過到關就好有成功感。可惜因身體不適玩唔到 3條滑梯，不過有機會我會再去既！
One Piece Summer Carnival
日期：2016年7月8日至8月6日
開放時間：星期一至五 (14:00 至 22:00)、星期六日及公眾假期(11:00至22:00)
分享到 :
最新影片
