吉卜力動畫的魔力可以話係紅片全世界，繼韓國舉辦的「吉卜力的動畫世界」特展之後，今個暑假登陸台北華山文創園區，規模仲要俾韓國更大。而我依莉詩就襯住七一假期飛咗去參觀啦！
攻略1：一早出發避免等全日
呢個展覽超受歡迎，所以要成功入場並唔係易事。你知啦，旅行無理由浪費係排隊度架嘛！幸好展覽以抽號碼牌、叫號入場的方式進場，只需上官網睇住去到幾多號再番去都得，等候時可以先去附近便利店食個早餐。所以我建議大家愈早去就愈好，最好就係八點半發放號碼牌前就去排隊抽號，事關沒有規定參觀時間，如果 D 人唔肯走，愈晏就要等得愈耐。而當日 9點開門，我 9點先去抽號已經要等 1小時了。另外，提提大家展區內無廁所，而展覽係唔俾行番轉頭，若想重新進場，需蓋手章並重新抽號碼牌，而我 12點左右睇完，見到只係入到 2000個，但抽號已經到 6000幾，可想而知蓋印再進場跟本無可能！
▲ 話說出發前已經收到消息要睇「吉卜力的動畫世界」特展就要排好耐隊，所以我就 9點已經到場拎飛。估唔到展覽一開就已經抽到 1618號了。
▲ 幸好可以上特展的網站睇排到咩 no. ，不過因為會因應場內情況，每次放行人數都唔同，有時 50，有時 200，所以預計等候時間唔多準，要不時重新整理頁面留意住啊！
攻略2：小型展品可互動
既然咁辛苦先入到去，當然一個展品都唔可以睇漏啦！展覽中的 23個經典場景分別在 9個展區，當中包括：紅豬、哈爾移動城堡、天空之城、魔女宅急便、龍貓、百變狸貓、幽靈公主、千與千尋 同 輝耀姬物語。而每一個場景大致分為三個部分，有結合光影、聲音、影像的大型造景、有可以互動的小型展品 同 牆上充滿共鳴的多句動畫的經典台詞。每一個角落都係由 20多位日本電影場景製作團隊親身到場人工手繪上色同校色，可見細緻度並非大型印刷品可以媲美！
▲ 每一個展區都有多幅小型立體畫，重現多個動畫場景。
▲部份仲有得互動架！好似呢幅就可以係鏡中見到自己變成婆婆。
▲ 一路行，牆上會有一句句動畫經典台詞，fans 一定超有共嗚。
▲ 雖然今次的展覽比較少展出手稿，不過到最後的 輝耀姬物語 手稿都好值得欣賞架！
攻略3：立體造景無需逐個排隊
只係睇小型展品，又點夠喉。大型立體造景可以話係今次主角，望住一個個人咁高的巨型立體的經典場景就仿如置身吉卜力的動畫世界入面，非常精彩。當然大家都忍唔住影相，不過有趣的事，當大家都好自律咁排隊的時間，場內的工作人員都會叫大家唔需要排隊。其中係一個原因係某些 類3D 造景經過相機之後已經沒有了眼中的震撼，另一個原因是排的隊睇出嚟都係一樣。特別係龍貓的樹洞，幾乎睇出來的都一樣，所以就算大家都乖乖排隊，你自己排一條就夠了。
▲ 每個龍貓的樹洞幾乎睇出來的都一樣，所以就算大家都乖乖排隊，你自己排一條就夠了。
▲ 另一個職員叫唔駛排隊的地方就係呢類一隻眼睇的 類3D 造景，事關相機影出來未必有親身睇的震憾。
▲ 至於呢個幽靈公主造景現場睇比係影相重要，因為每隔一段時間就會有立體動畫播放，經歷神奇一刻。
▲ 同龍貓等巴士的一幕背景有光陰同雨聲，十分有趣。
▲ 呢間千尋面前的湯屋充滿迫近感，就算要排隊都係必影。
▲ 傾斜的「天空之城」亦係必影位，只要企係腳步指示，朋友可以拍攝係螢幕中的你站在高處俯瞰城堡的錯視感。
攻略5：帶高 ISO 手機/相機影昏暗場境
入得場的都係想影多幾幅靚相，不過場內燈光都幾暗，只有造景射燈較光，但又唔俾開閃光燈或 LED燈，所以最好帶部少雜訊的手機或相機。如果要影埋人，最好開埋 HDR。
▲ 無臉男場景旁散落的東西都是立體的，但無臉男本身是用燈光投射，十分有趣。
▲ 係無閃光燈的情況下，夾硬影埋自己就係好怪。
攻略4：邊睇邊排 2大影相位
至於最熱門的兩個影相位就真係需要排隊，而且會有工作人員幫忙拍攝。魔女宅急便的場景唔算多人排隊，大約排 15分鐘就可以了，不過千與千尋的影相位就需要排 30分鐘。幸好可以邊排邊睇其他展品，唔會悶。
▲ 魔女宅急便的場景得條繩，好似唔多值得排咁耐。
▲ 同無臉男搭電車超緊張呢！
攻略6：必買雨遮做手信
展覽的最後一集當然係 pop-up store，雖然好多精品香港的橡子共和國專門店都有得賣，不過會場限量版精品就一定無架啦！
▲ 呢把龍貓遮落雨就會有花花現出嚟。
▲ 呢本展覽相冊有晒成個展的相，早知就唔洗影得咁辛苦啦！
攻略7：有時間睇埋附近展覽
去得旅行又點止睇一個展咁少，華山文創園區隔離仲有「反轉世界顛倒屋」同「Where’s Wally？」特展。如果早睇完吉卜力，應該啱啱好 10點開門可以入去睇呢！提提大家，顛倒屋都係要早去先得，因為我 12點出番嚟，顛倒屋已經要排 120分鐘了。
▲「反轉世界顛倒屋」去到 22/7 就完架啦，要睇就快啦！
「吉卜力的動畫世界」特展
日期：即日起至 9月18日
地點：華山文創園區
入場費：全票 NT350
Leave a Comment