GoGoVan 在今個月 6 日正式推行新計劃，向司機徵收長途單 8－9％的費用，變相收取佣金，引來部分司機不滿。有 GoGoVan 司機早前曾跟我們反映他們遇到的困難及問題，其對手 Call4Van 更因此在 Facebook 出文聲言要「起革命」，令不少公眾人士對 GoGoVan 印象改變。GoGoVan 被捧為香港的創業新星，坦言無想過公眾會對此有如此大的回嚮。今次 UNWIRE 直接與 GoGoVan 的創辦人之一林凱源（Steven）對話，了解他們對坊間種種指控的看法，同時亦向 Call4Van 創辦人符棨朝（Conrad）了解他們的回應（詳見另文）。
有九成單都是不收費
我們先從最多人關心的「司機付費問題」開始吧。GoGoVan 開業約三年，在香港的業務當中，一直都沒有向司機徵收任何費用，只靠不斷的融資支撐經營。今年 6 月開始實行付費計劃，向司機徵收長途單 8－9％的費用，這些長途單佔全部 Call 車單的一成左右，其餘九成仍然不用收費。司機認為， GoGoVan 是次收費是為了打擊「外掛」搶單，因為使用外掛要付費，GoGoVan 再收費就會增加其成本，藉此減少外掛的使用。
收費問卷調查獲 80% 支持
Steven 表示，其實要實行收費並不是一時三刻的事，因為當中涉及諮詢、研究、改程式等多個背後的程序，快極都要搞 4 個月，「我地年頭已經開始計劃實行收費，直至幾個月前外掛出現，本來係幫司機接單，後來演化到連外掛都要收費，咁啱撞正我地開始收費的時間，所以司機才有咁的錯覺，我地要打擊外掛。」他補充，在計劃收費之前，曾向 300－400 名司機了解意見，才研究收費制度，「我地做過 survey，聚焦小組入面有 80％都贊同收費，我地係 Plan 好晒做好 research 先開始收費。」
收費係要向投資者證明有商業價值
GoGoVan 的業務遍及東南亞多個市場，如新加坡、台灣、南韓及中國多個城市等，除了台灣之外，香港算是第一個正式實行收費的地區。Steven 認為香港區的市場夠成熟才開始在此實行收費，亦都是向投資者的一個交代，「我地如果繼續唔收錢，咁就冇商業價值，投資者就冇信心，（收錢係）要證明有商業價值。」GoGoVan 今年 6 月先開始正式「有第一蚊收入」，相對於他們從投資者獲得的幾千萬美元融資，可屬皮毛。Steven 表示，「如果要達到收支平衡，真係唔知過多 3 年都得唔得。所以就要繼續做融資，收支平衡到先唔使融資。」他估計，最理想的情況是在開業 6 年後，即在 3－4 年後，才可達至收支平衡，甚至有錢賺，但他也不敢太樂觀。
煽動其他司機走 自己得益
對於網上有司機發表不滿，因而留言洗版， Steven 表示理解，但深信那部分只佔少數，「上網見到的留言通常就係最唔開心，最想鬧人個啲，用得開心個啲司機係唔會出黎講野。因為呢一行就係多啲黎，密啲手，做多啲就賺多啲。佢地有話：『我咁得閒不如開多啲工，唔使做咩，寫留言』。」
反而認為上網愈鬧得多，就可能愈係重度用家，「做鍵盤戰士出口術好容易，上 Facebook 見到留言話 GoGoVan 好衰，但就冇諗過，佢地可能先係搵最多嗰個，一直就係度潑冷水等啲人唔用，自己就接埋支旗。」
監管網上留言：唔俾爆粗
至於有司機指 GoGoVan 刪除留言，Steven 承認有監管留言，「唔可以人身攻擊，唔可以爆粗，爆粗會刪除留言。」不過 Steven 話每次刪除留言都會帶來惡性循環，刪除留言後留言者會留更多粗口，更有甚會被罵文字獄、禁言，他無奈表示，「高登都（將粗口）變『向左右向右走』啦，Facebook 冇呢個功能，只可以隱藏或刪除。如果可以『向左右向右走』，都唔會咁麻煩。」
如果要賺錢 就唔會只得 8％
對於這個向司機徵費的模式，Steven 表示會不斷檢討，但暫時會維持一段時間，「剛剛推出已經俾人鬧到狗血淋頭，再加價就淋紅油啦。現階段都係想試下個模式係咪可行，而家 8－9％已經係目標價格，亦算係一個較溫和的付費。如果我地真係要賺錢，我地就要求所有訂單收錢，唔會只得 8％。」
除了司機的疑問及困難，Steven 亦開腔回應其對手 Call4Van 對 GoGoVan 的指控，詳情留意明天 unwire 的報導。
分享到 :
最新影片
