其實去到智能裝置世代，旅行更加方便 ! 等 Edward 教大家點樣 3 分鐘 plan 好行程，而且大家可以齊齊參與，唔洗做死一個人，正呀！
自由行除了訂好哂機票酒店同埋中間接駁交通，另一個重點自然就是 plan 行程啦！Google Maps 最新就推出了大家可以共同協作在同一個地圖上面 mark 低大家想去那些景點，然後仲可以加埋路線添，從此 plan 行程都可以係一個樂趣來！而家就教教大家點樣 2 分鐘內完成行程企劃啦！
Step 01：
其實呢一步係電腦或者流動裝置做都得，Edward 就覺得電腦方便好多，所以係電腦入面做啦！首先進入 Google Maps 網站，然後點按左上角的三橫線按鍵，之後選擇「您的地點」，然後再點按「地圖」，再選擇下面的「建立地圖」
Step 02：
入去之後首先點按左上角的「無標題的地圖」，然後在地圖名稱輸入你的旅程名稱，而下面說明就可以講多少少你旅程的 highlight 重點，之後點按「儲存」。
Step 03：
然後就可以開始加入圖層（大家當圖層係類別咁樣分開啦，點分就睇大家個人喜好了），筆者首先加入「機場」。
Step 04：
之後就在中間上面搜尋欄輸入機場名稱，例如：Heathrow Airport，之後就點按「新增至地圖」，咁就可以加咗入去架啦。
Step 05：
大家在地點旁會見到有一罐油漆，點按它就可以改變 mark 在地圖上標示的圖形或者顏色，又或者有一大堆「罐頭」圖案俾大家選擇，用來分門別類。
Step 06：
另外加入景點後，在詳情框中下方會有一個相機圖示，點按它就可以為你加入的景點加入相片或者 YouTube 影片。
Step 07：
如是者繼續加入景點及類別（圖層），大致上今次去英國睇波朝聖之旅就係去咁多地方啦！
Step 08：
之後在搜尋欄下方右三按鍵（Draw a line），點按它，然後按旅程次序點按之前 pin 在地圖上的地方，就可以形成一條行程路線圖了！如果要增加目的地，只要繼續按就可以。
Step 09
OK，如果想知道個路線有冇問題，可以點按左上角的「預覽」睇睇。
Step 10：
最後一步就是分享俾一齊去的朋友睇啦！只要點按「分享」，再在「邀請別人」空格內輸入對方電郵地址，最後點按「傳送」就可以了。另外，如果朋友都要加入自己想去的景點或者容讓他們更改行程，就應選擇「可以編輯」；如果你是唯一 plan 行程的人，就應選擇「可以檢視」，這樣他們就有得睇無得改，費事他們搞亂行程安排。之後大家就叫朋友 check email，之後點按「檢視 XXXX（地圖名稱）」就可以睇到個行程了。
好啦，plan 好行程，下一步應該做咩？當然今時今日好多地方都有俾遊客買，可供上網的 SIM 卡，咁大家就可以無時無刻都用到 Google Maps 睇番個行程啦；但問題是唔係度度都有俾遊客用的平上網 plan，有時真係想「慳得一蚊得一蚊」（尤其是去英國呢種高消費國家！！），又唔想拿住本實體地圖，點算？其實 Google Maps 都有離線地圖俾大家下載，只要出發前下載定，咁去到就算無網上，都唔驚撞失路或者睇唔番個行程啦。不過要留意的是，並非每一個國家的 Google Maps 都支援離線地圖擷取，如果真係無，咁就唯有去到有 Free Wi-Fi 的地方先睇行程了。筆者以下就以支援離線地圖的英國作示範。
Step 01：
要在手機或平板上開番個自由行旅程好簡單，只要開啟 Google Maps APP，之後點選左上角的三橫線按鍵，然後選擇「您的位置」。
Step 02：
之後點選番個地圖，就會自動開啟成個行程架啦！
Step 03：
之後就要將地圖下載落來了，同樣點按左上角的三橫線按鍵，今次選擇「離線區域」，之後點按右下角的「+」鍵。
Step 04：
如果你去的國家支援離線地圖，這裡就會出現上面第一張的畫面，以縮放手勢決定要下載的地圖區域（範圍愈細圖資愈詳細），然後點按「下載」，再將地圖命名，然後點按「儲存」。
Step 05：
地圖然後就會開始下載，視乎大家擷取範圍決定地圖檔的大小，愈大需時自然愈長！另外如果大家在「要開啟通知嗎」中選擇了「開啟」，當完成地圖下載時，手機會彈出提示通知你下載完成。
Step 06：
當下載完成後，大家在「離線區域」一欄中就可以看到地圖了。另外，地圖是有時限的，不過大家可以隨時點按「更新」update 地圖資訊。
Step 07：
為了測試離線地圖是否有效，筆者就在 Google Maps APP 中搜尋利物浦，並瀏覽從 Liverpool 的 Lime Street Station 火車站前往利物浦球隊的主場晏菲路球場要多久及路線應是怎行，最終看到是能夠成功找到地點兼規劃出前往路線的，證明離線地圖是 work 的！
畢竟去自由行不比參加旅行團，後者行程係就係悶少少，但勝在唔洗乜都自己準備一大餐；但前者係就係夠哂自由，但如果要為免行程掃興，事前功夫就真的要做到足！Google Map 今次推出這項服務，確實是大大方便了 plan 行程的「犧牲者」，亦令大家可以共同協作一齊 plan，唔單止唔會做死一個人，仲可以將事前 plan 行程變成各位團友溝通的最佳平台，確實一流。當然，要有一個輕鬆愉快又盡興的自由行旅程，要知道的東西又點會咁少？大家可以睇番筆者年初寫的文章，就知道仲要準備什麼了。在此先祝大家有個愉快的旅程吧！
連結：http://check.unwire.hk/2016/01/04/2016-travel-bible/top-news/
