香港時間昨日凌晨，Apple 就係 WWDC 2016 大會上推出了全新 macOS 10.12 Sierra。配合 macOS 全新命名方式，其實都加入了不少全新功能，究竟新系統用落覺得點？有幾多新功能已經可以用得到？辛尼就係 MacBook 12” 上面裝咗 Developer beta 版，率先為大家試一吓最新體驗喇。
Macbook 用落都唔覺得變慢
每次 Apple 出咗新 OS，無論喺 iOS 定 macOS，大家最關心除咗新增功能之外，升完之後部機有冇慢咗先最重要。睇返今次 macOS Sierra，2009 年或以後嘅 MacBook / iMac 同 2010 年後嘅 MacBook Air/MacBook Pro/Mac mini/Mac Pro 都可以升級。至於今次評測用嘅 MacBook 12”，升級上 macOS Sierra 之後都無覺得慢咗，同時開住 iTunes 聽歌、睇 YouTube 片、App Store 下載程式再做文書處理都依然相當流暢，咁當然越舊嘅型號升級之後，都有可能個反應慢咗，情況就同 iPhone 4 用 iOS 9 一樣 。
中文輸入未見有變
至於中文輸入法方面，辛尼慣用嘅倉頡輸入法就無咩大問題，倉頡碼同選字表無分別，關聯字嘅編排亦都較聰明。不過 Safari 經常發生的超慢 bug 或突然出不到中文字的 bug 仍然存在。(識用一定用 yahoo keykey)
▲對香港人嚟講，中文輸入法真係好重要，macOS Sierra 個中文輸入法用落都好順手，連關聯字都無咩問題。
Universal Clipboard 唔洗同一個 Wi-Fi 都用到
macOS Sierra 其中一個新功能 Universal Clipboard，測試前以為要 iOS Device 同MacBook 要用同一個 Wi-Fi 先做到，但原來只要兩部機用同一個 Apple ID 就得，而且瀏覽器亦都無限制，試過用 Safari 定 Chrome 都一樣得。呢個功能用落其實都真係幾方便，試過複製相同字都無問題，不過影片就暫時仲未可以直接 Copy。但如果各位 wire 民真係要用呢個新功能，最好都係兩部機係用同一個 Wi-Fi，因為試過如果 iPhone 用 4G 嘅話，複製文字沒有影響，但相就相對要等較耐。
相關影片﹕
▲用法其實好簡單，只要選取想複製嘅文字，再好似平時咁揀 Copy。
▲想複製相片亦都係用相同嘅方法，配合埋有 3D Touch 嘅 iPhone 6s / Plus 就更加好用。
▲之後喺 macOS 入面任何軟件，只要揀選 Paste 就可以將文字同圖貼上，經測試用 Wi-Fi 貼圖會較快。
相關影片:
兩邊檔案修改即時 Update
辛尼初初用 macOS Sierra 搭 iPhone 6s＠9.3.2 做測試，但就只可以見到 Pages 嘅資料夾，咁唯有將手上嘅 iPhone 6s 升埋上 iOS 10 先可以見到其他資料夾，當中可以見到有 Desktop、Documents、Pages 同其他軟件產生出嚟嘅資料夾。如果係文字檔嘅話，可以直接喺 iPhone 上面做修改，結果仲會即時同步返 MacBook，連 Upload 嘅動作都唔洗做。至於相、片同歌方面，就要先下載就可以照睇照聽。至於刪除動作方面，大家就可以放心，iPhone 上面刪除嘅檔案，只會刪除 iCloud Drive 上面嘅檔案，macOS 本身嘅檔案就唔會有任何影響，呢點就可以避免唔小心刪除咗重要資料。
▲macOS Sierra 入面個 iCloud Drive 就會見到更加多嘅資料夾，當中包括咗桌面同埋文件。
▲iOS Device 要用嘅話，就同樣必需升級至 iOS 10 先可以見到所有資料夾。
▲以測試用嘅 Desktop 資料為例，用 iPhone 進入就可以見到所有在 macOS 桌面嘅檔案。
▲如果要喺 iOS Device 上面睇片或者聽歌，都要先從 iCloud Drive 下載就可以播放。
▲如果開啟好似文字檔呢類文書檔案，仲可以直接喺 iOS Device 上進行編輯。
▲最重要就喺會即時同步落 macOS，咁就唔洗再用好似 Dropbox 或者 Google Drive。
乜 app 都有 Tag 開相同 Apps 超慳位
好多時為咗方便工作或者搵資料，都可能會同一時間開同一隻 App 幾次，例如去旅行搵地圖等等，但開多幾個地圖就會阻住晒成個畫面。現在大家就可以用 TAB 功能去簡化桌面，不過就只有部份 Apps 可以支援。呢個功能個諗法確實係唔錯，例如同時開 3 個地圖出嚟，同以前比較就只會佔用一個視窗嘅位置，而且可以快速進行切換，但可惜唔喺所有 Apps 都支援到，好似 iTunes、Music 呢類就唔得，咁又合理嘅，試問又點會同一時間聽幾首歌呀。
▲部份支援 TAB 功能嘅 App，可以在 Window 下面揀「顯示標籤列」。
▲之後就可以好似平時大家用開嘅 Browser 咁，只要按「+」就可以用 TAB 形式開多幾個又唔會令到桌面好亂。
YouTube 仲未支援畫中畫功能
講到畫中畫呢個新功能 macOS Seirra 終於叫做作出支援，不過其實用落同現時 iPad 上面嘅功能係一樣，都只可以對應到部份嘅影片網站例如 Viemo，至於香港人較常睇嘅 YouTube 都仲係未能夠支援，感覺上就對於香港 wire 民嚟講作用不大。
▲YouTube 仲未用到真係令人有點失望，好似 Viemo 咁當播放影片時就可以按右下角的 PIP 圖示。
▲影片就會獨立分割出來，咁大家就可以邊睇片邊執行其他程式。
▲仲可以自由移動到唔同嘅位置，亦都可以調整影片嘅大小。
搵唔重要嘅檔案幫你慳位
由於今次測試用嘅 MacBook 係全新安裝，所以未能真正試到 Space Optimization 呢個功能嘅實際成效，但從發佈會上見到，可以將 20GB 剩餘空間提升返 150GB。至於實際用嘅時候，佢會有一個視窗話俾大家知唔同類型嘅檔案已佔用嘅空間，之後就可以選擇性作檔案刪除，例如佢只會保留較常用嘅檔案或相，甚少用的就會放上 iCloud，當重新要用先 Download。另外，可以將已經睇過或聽過嘅歌同片嘅暫存檔直接刪除，對於成日上網睇片聽歌嘅 wire 民，用咗呢個方法可以釋放最多嘅空間。最後就是將程式安裝檔、重複檔案或者 Cache 等直接刪除，而垃圾筒內的檔案 30 日後亦會自動刪除！呢個方法好處就係佢會跟據返大家嘅使用習慣，同時又唔洗擔心邊啲檔案可以安全刪除，對於仲用緊 128GB 嘅用家嚟講，升級之後就可以先試用。
▲喺左面會列出唔同類型嘅檔案現時所佔用嘅空間，至於右面則是建議選項，可以幫大家釋放空間。
▲如果各位 wire 民鍾意經 iTunes 睇片嘅話，利用呢個功能就可以直接刪除已觀看嘅影片，可以釋放大量空間。
▲除咗片之外，相亦都係佔用空間嘅重要元兇之一，新功能就只會保留較常用嘅檔案或者相片，其餘就會上傳至 iCloud，當要再用時先從 iCloud 下載。
無得用「喂 Siri」
Siri 今次加入 macOS 家庭，基本上嘅用法都同而家喺其他 iOS Device 上面差不多，都只係用語音就可以叫 Siri 幫手搵資料，不過今次 Siri 仲可以做到搜尋功能，大家可以當係語音版嘅 Spotlight，要用嚟搵 macOS 入面的檔案資料就更加方便。不過唯一缺點就係冇得「喂 Siri」，必需要按 Siri 個 Icon 或者自己設定一個快捷鍵。想知 Siri 喺 macOS 入面嘅新玩法，就要睇吓另一篇詳細教學喇。
iMessage 好玩過 WhatsApp
新版本 iMessage 更獲得大幅度強化革新，究竟有何新功能加入？與我們常用的 WhatsApp、FB Messenger 又有何分別？當中包括相片網頁預覽/即時播片功能，同朋友溝通嘅時候仲可以加入對話 Bubble Effect 特別效果，而大家都好鍾意用嘅 Emoji 仲可以放大 3 倍咁大，想知更多 iMessage 有咩新玩法，就要睇下艾域為各位 Wire 民分享嘅試用後感吧<按這裡>。
辛尼評語：Clipboard 同 iCloud Drive 最實用
今次 macOS Sierra 嘅更新，可以話加入咗相當之多嘅功能，但如果講到最實用，就一定喺 Clipboard 同埋 iCloud Drive，始終呢啲功能對於大部份用嚟講會取經常用到。Space Optimization 相信亦都係重點功能之一，因為好多時換機都係因為唔夠位而唔係部機唔夠快。至於 Siri 同 iMessage 就相對上玩味成份較重，就好似 iOS 上面嘅 Siri 功能，講真小編真係絕少用，至於 iMessage 暫時香港黎講都未多人用。
Leave a Comment