講到 Siri 各位 wire 民都應該唔會覺得陌生，自從 iPhone 4s 開始 Siri 就已經存在喺 iOS 之中，嚟到 macOS Sierra 終於都加入 Siri 呢個語音助手，而 macOS 版嘅 Siri 同 iOS 版又有冇咩唔同？現在就等辛尼同大家一齊試玩一吓，大家日後升級 macOS Sierra 之後就能夠即時活用。
有用開 iOS 嘅用家，都知道現時除咗可以透過長按 Home 制之外，更可以透過「喂 Siri」叫 Siri 出嚟。至於 macOS 版就暫時仲未可以用語音叫 Siri 出嚟，如果想用 Siri 就要設定鍵盤嘅熱鍵組合，不過目前廣東話就仲係得女性 Siri 可以揀，各位女 wire 民想聽男版 Siri 就只能夠選擇「中華人民共和國（男性）」，順便可以練埋普通話。
就算喺用咗好多年 iOS Device 嘅用家，隨時都未必有用過 Siri，因為唔少人都唔知道 Siri 可以做到啲咩，又或者唔知道應該點叫 Siri 幫手。macOS Sierra 版 Siri 除咗識得聽基本嘅指令之外，為咗針對 macOS 嘅需要，亦都加入咗一啲新功能，例如大家可以叫 Siri 幫手搵電腦入面嘅檔案、控制功能開關甚至喺控制 Apps 嘅動作。
電腦主要用途都喺工作為主，唔以得 iPhone 或者 iPad 咁主要用 Apps，所用得越耐，儲存嘅檔案就會越多，要搵起上嚟都幾麻煩。有咗 Siri 之後，大家只要同 Siri 講「幫我搵 XX 嘅 YY 嘅檔案」（XX 為位置，YY 則是檔案名），咁 Siri 就會顯示所有包含該關鍵字嘅檔案，試過速度都真係相當之快，就算中英夾雜都唔會有問題。
好多時用電話影完嘅相都會 Save 落電腦，一來可以多個備份，二來就方便用軟件「執執」先再放上 Facebook 或者 ig，但如果張相已經影咗一段時間，又唔記得放咗去邊嘅話，只要同 Siri 講「我想睇 X 月 Y 日影嘅相」，咁 Siri 就會喺相簿入搵出果日影嘅相，如果搵唔到嘅話，Siri 就會嘗試喺網上搵到果日嘅相片，對於平日會影好多相嘅用家一定鐘意呢個功能，唔洗再慢慢喺資料夾入面搵。不過 Siri 有時會聽唔清楚，結果佢會幫你上網搵咗先，水哥都試咗兩次先至開到。
如果用 mac 作為主要嘅工作機，咁一定會開咗好多唔同嘅資料夾，隨住用得越耐，電腦入面嘅資料夾數量真係多到嚇死人。如果返工果時俾老細問到某個客嘅資料，要逐個逐資料夾去搵就浪費好多時間。而家只要同 Siri 講「顯示 XX 資料夾」，咁就會打開該資料料，過程大約 2 秒左右就完成，絕對比人手搜尋快很多。
電腦唔單止用嚟做嘢嘅，唔少人都會聽歌或者睇片，電腦入面更可能已經儲存幾百首歌好多套片，有咗 Siri 幫手想聽歌就簡單咁講「我想聽 XXX 嘅歌」又或者「想睇 XXX 影片」，Siri 搵到電腦入面合適嘅歌或者片就會自動播放，而且就算講中文名都一樣記得到。
要應付各種唔同嘅工作需要，都必定會安裝唔同嘅 Apps，一時之間唔記得自己有無裝過嘅話，可以嘗試叫 Siri「幫我打開 XX」（XX 為 Apps 名），例如今次本來想睇 YouTube，就可以講「我想睇 YouTube」但搵唔到，咁 Siri 就會開 App Store 同埋自動列出所有同 YouTube 有關嘅 Apps，完全一隻字都唔洗打就可以 Download。
無論學生哥做功課定返工要搵料，都離唔開要問下 Google 大神，而家有咗 Siri 幫手，只要隨口講想搵啲咩佢都一樣幫到大家（想搵 XXX 嘅相），而且速度仲非常之快。不過大家就要注意，由於 Siri 用嘅搜尋引擎唔係 Google 而係用 Bing，所以搵出嚟嘅結果可能會同用 Google 有少少唔同。但大家只要同 Siri 講「用 Google 搵 XX」，咁 Siri 都好識做咁開個 Safari 再去 Google 度幫大家搵料。
控制電腦入面嘅功能好似「藍牙」或者「Wi-Fi」咁，只要對於 Siri 講「開藍牙」、「關 Wi-Fi」就得，之不過唔喺所有操控都得，就好似「熄機」、「清空垃圾桶」呢類較敏感嘅操控到最後都要用家手動進行。
