打機最重要就係爽，如果可以開齊 Effects 就仲好，咁當然喇要開齊嘅話將 Display Card 咁上吓都唔旨意會有好流暢嘅體驗，到時咪又係校返低，加上如果大家已經升級到 4K 熒幕，咁對顯示卡的效能要求就更加高。NVIDIA 早前就推出了採用新一代 Pascal 核心的 GeForce GTX 1080，不過賣街要成 $7,000 真係唔係好多人都捨得買，NVIDIA 近日就發布了另一款同樣採用 Pascal，但平一半的 GeForce GTX 1070，相信咁嘅售價或者會吸引到一班考慮升級的用家。
效能差 3 成但平一半喎！
就算幾鐘意打機都好，要用 $7,000 買張 GeForce GTX 1080 真係唔係個個都捨得，反而剛剛發布的 GTX 1070，就算是 Founders Edition 的 USD 449（HKD 3,500）來說，都可以叫做可接受範圍。其實同之前的系列一樣，在推出旗艦級型號之後，都會陸繼推出相對便宜的版本，就以今次的 GTX 1070 同 GTX 1080 比較之下，GTX 1070 的效能大約是 GTX 1080 的 70% 左右，所以計返性價比的話，GTX 1070 其實會較抵玩。
打機都一樣咁爽
各位 wire 民絕對唔洗擔心 GTX 1070 的效能，就算效能只有 GTX 1080 的 7 成功力，但要應付現時的遊戲以至 VR 都絕對唔會有問題，試過用 GTX 1070 玩 Rose Of The Tomb Rider，在最高設定加埋開齊 Effects 之後，都可以保持到 60FPS 以上，如果行佢入面個 Benchmark 平均 FPS 仲超過 70，如果要求唔太高嘅話，其實都可以玩到 2 ~ 3 年都絕對唔係問題。而且計返條數，買 2 張 GTX 1070 先等於 1 張 GTX 1080，但以一般行 SLI 效能可以提升 60 ~ 70% 來計算，其實用 2 張 GTX 1070 在效能方面絕對可以勁過 GTX 1080，咁當然耗電量所帶來的電費又係另一回事喇。
GTX 1080 可以玩水冷
買得 GTX 1080 相信都非富則貴又或者真係好鐘意打機，加上近幾代 NVIDIA 顯示卡，其實都擁有相當唔錯的超頻潛力，只要有一個較好的散熱方案解決熱量就得。講到要有最好散熱能力，水冷絕對是首選，而且各位 GTX 1080 用家都應該唔會介意俾多少少升級做水冷既。
Leave a Comment