每年 Computex 其實都可以看到一個現象，就是當年或快將流行起來的玩意，場內就會見到好多廠商都會推出類似的產品，就好似前幾年流動裝置剛開始，就會有好多尿袋、充電線的產品，去年就會有好多穿戴式裝置，好似手帶和手錶等等。來到今年，不難估計當然是 VR 產品，可以看到場內各大主要品牌甚至是二線品牌，都有推出針對 VR 裝置，但其實大家用來用到都是果一套，又會唔會有廠商可以突圍而出？
終於唔洗搵人拎住條線
今年場內所有 VR 基本上都是採用 VIVE，始終以現階段來說，VIVE 始終比較成熟，亦有 Steam VR 作為支援，但有玩過的 wire 民都會應覺得玩的時候相當不便，因為有一組長長的電線由眼鏡位置延伸至電腦，由於戴上 VR 眼鏡後睇唔到周圍的真實環境，所以玩既的時候最好就有一個人負責拎住啲線，否則隨時仆死都未知咩事。今次 Computex 內，就分別有 HP、MSI 同 Zotac 推出可以孭上身的 Backpack PC，令到大家玩 VR 的時候可以更 Free。
4.5kg 其實唔算重
Zotac 這款 Magnus EN980 系統，設計上就是將一部 Mini PC 連電池「塞入」背囊，最大好處就是 VIVE 與電腦之間的連接線就可以大大縮短，當大家孭上呢部 Backpack PC 再配戴 VIVE，就可以更自由移動，確實比起現時的設計方式更安全方便。可能各位 wire 民會覺得成部電腦連電池會好重，根據 Zotac 表示，Magnus EN980 連電池的重量只有 4.5kg，小編試過其實比平時出 Trip 時的背囊還要輕，絕對唔會限制了移動的靈活性。
可以玩 3 個鐘左右
要跑得郁 VR 其實對硬件都有好高要求，Zotac 這款 Backpack PC 就用上 Intel Core i5-6400 處理器配 GeForce GTX 980 顯示卡，這個組合當中最耗電必定是 GTX 980，而官方表示充一次電，大約可以玩 3 個小時左右，其實以玩 VR 來說都算足夠，始終暫時大家都只是透過 VR 玩一些小遊戲，當日後有越來越多真正遊戲支援 VR 之後，再來解決續航力的問題。各位 wire 民又可能會覺得，就算唔重又叫玩到 3 個鐘，部機又會唔會好熱呢？經過測試，當玩完一段時間之後，背脊位置唔會感受到明顯的熱力，咁就同時可以避免玩得耐會因為過熱而令系統變得不穩定。
可以出街玩 VR？
當 Backpack PC 真正推出市場，又代唔代表大家可以出街玩 VR 呢？答案其實係仲未得，因為除了 VR 裝置同電腦之外，其實整個 VR 系統仲有一個感應器，用來判斷玩家各部份的移動，除非日後可以解決到移動感應器的問題，否則大家就算有 Backpack PC 都仍只能在室內玩 VR。
場內花絮
▲HTC 在 Computex 當然有 VIVE 供大家體驗一下，而這個 Birdly 將可以讓大家體驗到扮一隻雀飛行的感覺，由於雙手要拍動同埋有風扇營造氣流，玩落都幾真實。
▲除了 Backpack PC 之外，QNAP 就成功在 NAS 內運行 VR，當然大家現時屋企用緊果隻就唔得喇。該款 NAS 型號為 TVS-882 的 Core i5 版，特點在於入面有 1 條 PCI-E X16 插槽，只要再加上 AMD Radeon R7 / R9 級數的顯示卡就玩得。
▲至於另一款 VR 就可以讓大家體驗到「現代」跳傘，而且玩的時候仲會成個人吊起，有唔少試玩的人都會嚇一嚇，不過小編畏高所以就冇親身體驗喇。
分享到 :
最新影片
