今日，ASUS 係一年一度 Computex 2016 發布了旗下 3 款最新 ZenFone 3 系列，當中包括主打一般用家的 ZenFone 3; 適合追求高效能用家的 ZenFone 3 Delux， 同埋有主打大 Mon 用家的 ZenFone 3 Ultra， 唔知今次 ASUS 呢 3 款新機又有咩特別呢？
講到現時的手提電話，唔少廠商都會推出金屬殼作為旗艦機的賣點之一，確實採用金屬殼的手感絕對比膠好，而且給人的感覺更有保護，但可以留意到，就算是 Apple 的 iPhone 雖然都是採用金屬殼，但為了不影響訊號的接收，在天線位置依然會見到一條膠邊。ASUS 在 ZenFone 3 Deluxe 上就完全解決了訊號接收問題，採用一體式金屬外殼，而且成部機厚度只有 4.2mm，上手絕對夠薄又夠輕，而且就算單手使用都唔會有問題，適合各位 wire 民係繁忙時間又位坐時，邊搭車邊睇網頁或睇戲都仲有一隻手可以扶實。
至於 ZenFone 3 Deluxe 個熒幕，如果講解像度就未必可以同人鬥，5.7” 熒幕配 1080 x 1920 解像度，同現時其他的 2K 甚至 4K 熒幕仲差少少，不過 Deluxe 個熒幕明顯做得比較貼邊，熒幕同電話邊緣只有 1.3mm 距離，好處就是當單手操控時，用拇指就可以接觸到更大的畫面比例，加上動態對比就去到 3,000,000：1，睇戲或者睇相的效果會更好。
近期留意到唔少電話廠商都會以鏡頭作為主要賣點，始終效能上就算用上最頂級的處理器，對一般應用上來說的影響都不大，反而今時今日越來越多人習慣用電話影相拍片，對鏡頭的質素更著緊。ASUS 早前推出過的 ZenFone Zoom 就是其中之一，以鏡頭作為賣點。至於今次 ZenFone 3 Deluxe 雖然並未套用 ZenFone Zoom 的潛望鏡頭，鏡頭位置亦都由普遍的圓形改為正方型，鏡頭用上 Sony IMX 318，擁有最高 2,300 萬像素。由於鏡頭仍然是凸出設計，因此最外層為藍寶石玻璃，可以有效保護鏡頭避免刮花。
鏡頭解像度就算再高，其實都唔及對焦快同防震重要，ZenFone 3 Deluxe 就分別有 Tri-Tech 自動對焦技術，升級版 PDAF 配以第二代紅外線對焦，可以做到 0.03s 對焦速度，再加上自動追焦功能，對於拍片就更加方便。防手震功能同樣有大幅改良，當中的 6 軸感應配以 4 軸 OIS，可以大大減少大家影相時的手震問題，唔用腳架在較暗環境都唔驚「鬆郁矇」。針對拍片亦都有 3 軸感應去改善畫面震動，而且就現場見到的即時比較，防震效果比 iPhone 6s 仲要好，而微距拍攝都同樣出色，而且對焦速度確實相當快。
雖然話就話旗艦機的效能其實唔會差太遠，ZenFone 3 Deluxe 其實用上 Qualcomm S820 處理器，配以 Adreno 530 GPU 無論打機定睇片都會有相當好的表現，而且 ASUS 更表示其中一個型號更會配搭 6GB RAM，可惜小編上手試過 2 部都只是 4GB RAM 版本，但一般的操作都已經好流暢，當然要真正試過打機先知實際效果如何。連接介面方面，與之前的估計一樣都已採用 USB Type-C，但就保留了 3.5mm 算是有考慮過用家的實際需要。用得 Qualcomm 處理器，就可以支援 Quick Charge 3.0 技術，而指紋保安同樣是基本配置，指紋感應器設於機身背面，所以一般來說都會用食指作為解鎖，當解鎖後指紋感應器仲可以當作影相快門鍵，鐘意自拍的 wire 民應該會喜歡這個設計。ASUS ZenFone 3 Deluxe 又點賣？6GB RAM + 64GB 版本將會 $4,000 有找（USD 499），各位 wire 民心動了嗎？
ASUS 一向在推出手提電話時，都會有一個型號是針對中低階用家，今次 ZenFone 3 就是主打 $2,000 樓下的市場。ZenFone 3 雖然是以平作為主要賣點，但機身前後都用上 2.5D 康寧玻璃，加上略為微彎的設計，上手較為圓滑。ZenFone 3 就會以玩「色」為主，除了主要的 Moonlight Sliver、Shimmer Gold、Aqua Blue 同 Sapphire Black 之外，更會有特別色如 Aqua、Nebula 同 Glaze 等，十分適合年輕一族選擇不同款色以迎合個人喜好。
熒幕方面為 5.5”但同樣支援 1080 x 1920 解像度，呢方面就未因為是入門機而有所縮減。鏡頭其實功能上與 Deluxe 相同，同樣有快速對焦同防手震，只是像素縮減至 1,600 萬，其實對於一般分享至 Facebook 或 WhatsApp 都不會有太大影響。機身背面主鏡頭之下，同樣配備指紋感應，在入門級機種配備指紋確實較為少見，同樣可以儲存最多 5 隻手指的指紋。售價方面，3GB RAM + 32GB 版本將會是 $1,900（USD 249）左右。
除了以上 ZenFone 3 同 Deluxe 這 2 款 5” 機種之外，今次更同時推出一款擁有 6.8” 熒幕的 ZenFone 3 Ultra，選擇 6.8” 機種都可能是喜歡用電話睇戲，對畫質可能會有更高要求，不過大家又唔好以為 6.8” 會用更高解像度，同樣只是 FullHD 級數，不過就加入常見在 4K UHD 電視的影像處理器，ASUS 稱之為 Tru2Life+，可以對每一個 Pixel 進行優化，令到整個畫面的對比同銳利度得到提升，小編試過用 Ultra 睇片，影像確實較鮮明立體，亦都較少出現「起渣」的問題，當然如果用到 2K 解像度就更吸引。
要講 Ultra 較特別的地方，除了 6.8” 熒幕就是其音效設計，它配備 Dual 5 Magnet Speakers 系統，除音效更廣闊更立體之外，在音量上亦都要比其他機大聲，就算在場內人多的地方，都有足夠的音量，就算同朋友一齊睇戲或者聽歌都無需擔心唔夠大聲。ZenFone 3 Ultra 更同時加入 DTS Headphone:X 技術，只要插入耳機就可以模擬出 7。1 聲道效果，外出睇戲就更有臨場感，加上支援 24-bit/192kHz 輸出，如果不是要追求絕佳音質或有「金耳朶」的話，這個設計已經夠玩。
如果大家覺得每日出街都要帶住叉電器好麻煩，唔帶又驚捱唔到成日既話，ZenFone 3 Ultra 就一部機攪掂晒，部機夠大所以可以用到 4,600mAh 電池，官方資料表示夠睇 11.5 小時電影或 Wi-Fi 上網 11.5 小時。除了夠長氣之外，萬一大家手上有其他流動裝置要緊急充電的話，ZenFone 3 Ultra 就可以化身做臨時「尿袋」，不過小編擔心這個用法最大缺點，是會加速電池老化問題，最終隨時得不償失。售價方面，ZenFone 3 Ultra 4GB RAM + 64GB 版本賣 $3,700（USD 479）。
要講手提電話，各位 wire 民第一時間未必會諗起 ASUS，確實 ASUS 以往在香港手提電話市場的策略都並非太過進取。今次 ZenFone 3 系列，Deluxe 雖然作為旗艦機，但售價仍然 $4,000 有找，至於主打入門級的 ZenFone 3 更是 $2,000 唔洗就有交易，其實預算不多又不想買中國品牌的話, Asus 是一個絕對好的選擇。至於 Ultra 小編就覺得定位已經大到不像電話，雖然唔少人都會鐘意大 Mon 的快感，打機睇片都確實更爽，但 6.8” 的手機用來通電實在有點觸目，最好配用免提吧!
相關影片:
