咖啡唔單單係一杯飲品，更係生活態度。今日我依莉詩就去到新城市廣場的父親節活動，從認識全球百種咖啡豆開始，到親自炒咖啡豆、調配咖啡，學習何謂慢活生活。
事源父親節就到，沙田新城市廣場將會係 6月1日至19日期間舉行 【嚐說愛‧咖啡品味體驗】活動，父子檔可以免費參加【慢活咖啡體驗館】，從認識全球百種咖啡豆、身體力行自家炒咖啡豆、用舌尖與鼻尖品嚐咖啡、親手調配飄香咖啡、解構咖啡與朱古力的完美搭配，以至穿越咖啡時光隧道，見識經典古董咖啡烹調用具器材。至於好唔好玩，等我慢慢話你知啦！
第一站當然要認識一下唔同品種、產地、生長緯度、成熟程度的咖啡豆有咩分別。呢區就有個百子櫃放咗 90款不同的咖啡豆比父子們親自觀察一下咖啡豆的外型同香味。講到咖啡的來源，爸爸們應該會好有興趣，不過要小朋友一下過聽咁多唔認識的地方名，其實都幾難吸收，肯好有得畀佢地摸下、閒下，唔係都會幾悶。
▲ 生豆出自唔同國家同莊園，有 D 豆比較大粒，有 D 豆會比較青色。產地分別與經過不同處理都會令咖啡豆外表同香味有分別。
▲ 全世界的咖啡豆主要為兩類，分別係阿拉比卡同羅布斯塔，而市面上大部份都會加羅布斯塔，因為平 D 同咖啡味重 D 。
▲ 我地平時飲的原來只係咖啡豆的某中一部份。
作為精品咖啡，認識完咖啡豆之後就要學習如果揀走瑕疵豆。導賞員會逐步教大家如何分辨空殼豆、蟲蛀豆等等 16種瑕疵豆，以趕走咖啡中的霉味、草青味。小朋友揀好豆之後，導賞員會示範用家用炒豆機炒豆，不過…炒一次要成 8-12分鐘，小朋友係咪咁有耐性呢？
▲ 瑕疵豆主要分咗 16種，原來每一粒瑕疵豆都可能令咖啡變味。
▲ 導賞員會示範用家用炒豆機炒豆，不過過程都幾耐下架！
去到鑑賞體驗區，總算有 D 嘢可以試下。父子可以透過 SCAA 風味輪 同 Aroma Kut Matching 咖啡風味香水瓶配對，學懂以舌頭同鼻尖解讀不同咖啡的美。
▲ 呢個咁色彩繽紛的 SCAA 風味輪，睇落好有中學課本的味道。
▲ 幸好同時有得學習杯評咖啡 (Cupping) ，了解如何描述咖啡香氣、酸度、風味、濃度，有 D 嘢飲下，感受下。
沖泡呢一 part 我覺得係最好玩，因為可以學到虹吸、外樂壓、手沖等不同沖煮咖啡的方法，為辛勞不休的爸爸送上一杯親手沖泡的咖啡。不過，身型細小的我企埋去，高度都只係啱啱好，要小朋友埋去沖，恐怕有一定的危險，所以都係爸爸代勞好了。
▲ 張枱加埋 D 工具其實都幾高，小朋友應該要幾高先玩到。
咖啡未必個個小朋友都識欣賞，相反朱古力就大部份小朋友都鍾意食。呢區就可以探索咖啡與朱古力兩者的搭配所併發出的無限可能，讓甜美順滑與酸澀甘甜的味道凝住最心動的回憶。
▲ 唔同濃道的朱古力與唔同的咖啡豆原來可以有不同的味道。
▲ 除咗濃度，朱古力的味道都有好多分類，香料、水果、糖蜜、土質，非常高層次。
學識點欣賞一杯咖啡之後，呢度仲有得睇唔同時代的咖啡機，親身試試操作古董。
▲ 唔同年代的咖啡機有不同的外型同操作方法，可以親身去試下啊！
另一方面，只要係活動期間消費滿 $1500以上，就可以報名參加由本地手執牛耳的咖啡達人主理的五大主題藝作坊，內容涵蓋 2D及 3D立體拉花咖啡手藝、咖啡及朱古力搭配知識，還有咖啡杯皮套創作及 Coffee Art Jamming 等等。
▲ 而我覺得最吸引的應該係用咖啡渣繪畫，不同咖啡可以營造不同的色彩效果，而且香醇洋溢，係父親節卡的好材料。
▲ 另一個就係 3D拉花，可惜今日未有得學啦！
▲ 皮聽落係成年人的玩意，原來經過適當的指導，小朋友都可以製作一個別出心裁的咖啡杯皮套。
呢個體驗之旅同上次係太古城搞的 星巴克咖啡體驗之旅 2016 好似，所以好難唔去做比較。坦白講概念上兩者都唔錯，由學習揀豆到品嚐咖啡，令人明白到一杯咖啡都有好多層次。不過今次的目標係父子，唔好話小朋友，我地一次過聽咁多唔了解的國家名同分類都覺得頭痛，仲要等十幾分鐘睇炒豆真係幾悶。個人覺得知識上太多，小朋友未必吸收到。
日期：2016年 6月1日 至 19日 (星期一至四：下午 3時至 8時；星期五至日：中午 12時至晚上 10時)
地點：新城市廣場一期一樓 (近simplylife BAKERY CAFÉ)