港女琴日去左個講 Influencer Marketing （網絡紅人營銷）的活動，本來諗住偷下師睇下點先做到「網絡紅人」（笑），同大家分享下架嘛，聽完之後港女覺得有一啲更有趣的資訊可以講，咁「如何成為網絡紅人」都係擺埋一邊先啦～
琴日個活動引述左一本美國網上雜誌上年做的調查，調查發現喺一啲讀緊中學及大學的年輕人群體入面，YouTuber 比起明星更加紅，頭 10 位的紅人只係得 Bruno Mars 及 Taylor Swift 屬於明星級，仲要三甲不入；而調查入面最紅的頭三位人兄，都係經常直播打機的 YouTuber，佢地的收入仲非常可觀添。
因為喺美國有咁嘅情況，而且呢個趨勢逐漸蔓延至亞洲區，所以琴日的活動主辦人就話要做好準備應付呢個 Influencer Marketing 的發展，先行係港台中物色一啲有潛質的網絡紅人，到市場有需求的時候就可以佔盡先機喇。
活動完左之後，港女捉住主辦人吹左陣水，想了解多啲佢點睇呢個趨勢。佢話爆得出黎的網絡紅人喺全世界都有一個共通點，就係大部分佢地都係直播打機出身，唔怪得之上年阿 Ben 會爆左出黎啦…
SHOCK！
港女當然唔係卿姐啦，我梗係知咩係直播打機啦！！！我 Shock 的原因應該係因為港女及港女啲朋友仔都唔係幾打機，所以真心不太明白睇人打機有咩咁開心，同埋竟然會吸引到咁多人睇，仲要全世界都一樣囉，有冇 wire 民可以解釋下俾港女知打機直播有咩咁好睇？
雖然世界各地爆得出來的網絡紅人好多都係做差唔多的內容，主辦人話內容的表達手法係會有地區性的分別。佢舉例，台灣人比較鍾意一啲比較 矯情 感性的表達方式，如果創作的內容係以「動之以情」的方式傳遞的話，台灣人較受落。而香港的情況就有啲唔同，可能係社會大環境的因素，如果內容同時事扯上關係的話，爆的機會就會大啲。
哈哈，簡單啲黎講，即係話香港人鍾意睇抽水 Post 食花生啦。
不過，聽主辦人講，Influencer Marketing 都唔係可以取代晒其他營銷形式架，因為現時 Influencer Marketing 的主要對象係 15－30 歲的年輕人，有部分都未係有好多消費能力。但隨住網絡紅人愈來愈多，影響力愈來愈大，呢種營銷形式佔的比重應該會增多。
Leave a Comment