日前睇報紙 TVB 和環球唱片因為版權問題而再度鬧翻，TVB 要求環球就算雙方約滿後，依然可以在電視和網上平台繼續播放環球歌手上過的節目和版權。有些網民留言回應事件時笑謂「沒有了陳奕迅，TVB 還有羅鈞滿啊！」作為香港最大的電視台，到了今時今日還不改變，被網民嘲笑也不無道理。
筆者的長輩賦閒在家，不時以電視作伴，由下午的婦女節目到《愛.回家》都不放過，可算是電視汁都撈埋。筆者偶爾都會睇下 TVB 節目，為了和她有些話題，最近問長輩有冇睇《殭》，竟然話我 Out。原來她已經轉台睇 ViuTV，更識得在電腦翻看《跟住矛盾去旅行》。長輩話鍾意食飯時一次過連睇幾集，我以為長輩只是貪新鮮，會在 myTV 翻看劇集重播，原來她已經徹徹底底放棄了《愛.回家》。電視只會在股市開市時開著，睇下股評人講股，想睇其他節目就會開電腦去 ViuTV 網站慢慢揀。以前要我將翡翠台設定做電視機 1 號台，現在長輩的決定確實有點難以置信。
最近力谷 Live 直播的 Facebook，稍後將會推出新功能，透過記錄直播時觀眾留言和互動，讓網民在重溫片段時知道高潮和精華所在，避免沉悶和浪費時間，完全由觀眾的需要設想，香港有幾多電視台做得到？網上的娛樂選擇很多，電視台只是大眾娛樂的一種選擇。筆者未似某些激進網友般，叫 TVB 執_咗佢，畢竟沒有選擇的日子還歷歷在目，不過眼見一個歷史悠久，以往是 Trend Setter 的電視台，現在卻無法跟上觀眾的需求，有點唏噓而已。
分享到 :
最新影片
