依莉詩：「無電即換超方便！」－ Olympus 運動 Action Cam : Stylus Tough TG-Tracker 評測

2016-05-25

提起 Action Cam 唔多唔少都希望可以防水防撞，不過好似 GoPro 咁就需要裝上外殼才能發揮功用。而今日 Olympus 推出的 Stylus Tough TG-Tracker 就聲稱可以防水、防撞、防跌，講到咁勁，我依莉詩就去咗海洋公園實試啦！

外型硬朗，防水防塵防撞

外型硬朗的 TG-Tracker 分別有黑色及熒光綠兩色，與大自然的顏色相襯，就足見佢運動相機的形象。官方聲稱 TG-Tracker 防水性能可達 30米、並可承受 100kgf 的壓力，就算係 2.1米高跌落地面亦沒有問題。此外，有別於一般電子產品最怕遇上溫差問題，TG-Tracker 在抗凍方面則達到 -10 度，即使係凍天雪地的環境下亦可正常使用。當然，我難以一次過上山下海進行測試，而拎上手， TG-Tracker 的殼的確有好堅硬的感覺，不過換來就係比超一般 Action cam 的體積大同重手。

▲ TG-Tracker 分別有黑色及熒光綠兩色，單看硬朗的外殼就知針對嚴荷的環境設計。

▲ 按鈕全部都置係機頂，方便單手控制。

超長氣拍攝，隨時可換電

平時用 GoPro 做採訪，最怕就係好快無電。而 TG-Tracker 不單聲稱擁有長達 90分鐘的攝錄時間，而且可以換電，咁只要帶多幾舊電就唔洗下下就住就住咁拍。萬一真係唔記得帶電都可以用 USB 即刻充電，雖然官方唔建議咁做，不過非常時期用非常方法嘛！而我今日短短續續拍了 20條 10-30秒的 FHD 片，TG-Tracker 仲有 2/3 的電，可見都算幾襟用。

▲ TG-Tracker 可以更換電池，咁就唔怕拍拍下唔夠電，錯過精神畫面。

▲ 附送的手柄唔只好似槍咁型，仲內置自拍鏡，相當貼心。

▲ 只要分開轉接器與手柄，就會發現接駁方式與 Go Pro 相同。即是說，轉會的朋友可以直接使用 Go Pro 的配件，而唔需要再購買。

廣角鏡頭攝錄更多影像

至於規格方面，TG-Tracker 所配備的 204 度廣角鏡頭（f/2.0）算是較為少見，甚至比我地雙眼見到的還要多，拍攝時就連身邊朋友的樣都可以睇到。而感光元件為 800 萬像素 CMOS（1/2.3），並配備 Truepic TM VII 影像處理器，可以拍攝最高 30 fps 的 4K 影片。因為係廣角鏡頭旁邊扭曲就必然，而係光線充足的情況下，拍攝相當清晰，不過係較暗的環境下影像似乎有不少雜訊。

▲ TG-Tracker 有一個 1.5 吋 LCD 螢幕，可以睇到拍攝緊的影像。

▲ 落水時為減少水中折射的影響，需要換上水中鏡頭保護套。同時亦需要更改拍攝的闊度。

▲ 雖然係較暗的環境下影像似乎有不少雜訊，幸好鏡頭上方有 LED 補光燈，提供足夠光線。

多個環境參數，記錄影像以外資料

比較有趣的是，TG-Tracker 內置現場環境感測系統，拍攝的同時會記錄緯度、方位、大氣壓力、海拔高度、溫度及加速數據。除了可以保留更加影像以外的回憶，TG-Tracker 亦會利用數據作相機的微調，例如感應到相機處於 50cm 深的水時會自動切換至水中白平衡及水中拍攝模式。

▲ 只要安裝相關的 App 就可以睇番拍攝時的環境資料。

▲ LCD螢幕會顯示指南針、水平儀同高度數據。