講起方便隨身攜帶的手提電腦，各位 wire 民都可能會諗起 MacBook 系列，但對於好多日常使用或工作來說，Mac OS 始終未必能夠同公司電腦相對應，最大問題就是好多軟件都未必支援 Mac OS。Acer 今日就推出了全新 2-in-1 電腦 Switch Alpha 12，究竟呢部機係功能、便攜性以致效能上是否能夠滿足到大家日常使用的需要呢？
如 SP3 般多角度調校
好多時大家用手提電腦都未必會坐定定咁用，有時會坐高啲有時又會企喺度用，所以如果部機可以隨意調校唔同角度就好。Acer Switch Alpha 12 個支撐架就可以俾大家隨意調校，唔會好似其他機咁只有預設幾個角度，彈性更大總可以調校出一個適合自己的使用角度，可以更有效避免反光的問題。試過佢呢個自由角度調校設計，確實相當好用，尤其放上大脾使用，每個人的高度唔同，而家就可以更準確咁調校一個啱睇嘅角度，而且佢個支撐架加上防滑墊，放係大脾上面用會有防滑作用。
▲個支撐架可以作多角度自由調校，唔似其他機得幾個預設角度。
▲將成部機差唔多瞓平，就適合有時企喺度果時都依然睇得清個 Mon。
▲就算將部機放係大脾上面用，因為有防滑設計，部機都唔會四圍郁。
鍵盤打落順手仲吸得好實
呢類 2-in-1 產品其實設計時，理念在於會有一個可分拆的鍵盤，目的就是為了方便大家出街時可以拆走個鍵盤當平板電腦用。Switch Alpha 12 同樣有呢個功能，鍵盤同機身用上磁石相吸設計，今次佢個磁力仲相當之強，基本上只要將個鍵盤略為靠近機身即會吸實，完全唔會走位，仲唔洗擔心會甩。個鍵盤其實仲可以當埋保護套用，但由於部機拎上手其實都唔算輕，如非必要相信大家都未必會真係當 Tablet 用，會拆走個鍵盤的機會相信唔大。至於鍵盤本身的手感都叫做好好，就算用慣鍵盤打字嘅小編嚟講都唔洗點適應就已經可以上手，按鍵都算幾靜，搭飛機用都唔怕會嘈親隔離。
▲鍵盤同機身採用磁力連接，而且只要略為接近就會自動吸實。
▲鍵盤打字手感相當唔錯，鍵距夠、按鍵較大加上相當寧靜。
Touch Mon 加支筆未必咁有用
Switch Alpha 12 由於預計大家會用到佢個 Tablet Mode，所以個 Mon 都支援到 10 點觸控，但如果大家都只係會當佢 Notebook 咁用嘅話，相信會用到 Touch Mon 嘅機會唔多。至於跟機送的 Acer Active Pen 相對上就更加未必實用，講真會係部機上面用手寫或畫圖的機會更加之少，隨時枝筆唔見的機會更加大，除非大家真係經常會單手拎住部機再手寫或畫圖喇。
▲枝 Active Pen 可以插在鍵盤旁位置，但相信真正會用得著的機會唔多。
睇 4K 都唔窒
好早期呢類 2-in-1 機種，為了可以有媲美手提電腦的續航力同降低發熱量，因此好多都只有較低配置，唔好話用嚟打機，就算睇 2K 片都「窄窄地」。呢部 Switch Alpha 12 就配備了 Intel 第 6 代 Core i5 或 Core i7 處理器，加上有 8GB RAM 用落絕對流暢。呢類產品主要都是針對文書或簡單娛樂之用，實測播 YouTube 4K 片都相當流暢，前提下大家個 Wi-Fi 要夠快就無問題，所以佢個無線網絡除了支援 802.11ac 之餘，仲透過 2 條天線支援 MU-MIMO 可以加強接收同提升傳輸速度。部機整體用落都好快，因為佢用了 SSD，最高仲有 256GB，就算 128GB 型號，裝完個 Windows 10 之後，都仲有約 100GB 可用空間，已經足夠日常裝軟件或儲存資料用。
▲試播 YouTube 4K 影片相當流暢（雖然係 2K Mon），配合埋雙天線設計的 802.11ac 無線網絡，只要 Wi-Fi 夠快就可以睇。
無風扇都唔會「辣」大脾
各位 wire 民見到部機用到 Core i5 甚至 Core i7 處理器，加上部機連一把風扇仔都無，咁部機用落會唔會好熱呢？經過一段時間試用部機上網、文書同睇 YouTuibe，就算機身背面都只是微暖，未算得上「辣手」。根據官方資料表示，Switch Alpha 12 用上 Acer LiquidLoop 散熱技術，透過類似水冷方式散熱，所以就算無風扇都絕對唔會對系統穩定性造成影響。
▲單單部機就已經有 900g，所以單手拎住長期用其實都幾重。
無 HDMI 但有 Type-C
揀得呢類咁輕便的電腦，唔多唔少都會是為了方便出街見客果時用，好多情況下都會駁 Projector 或熒幕方便做 Presentation。呢方面 Switch Alpha 12 就未必太方便，因為廠商放棄傳統的 HDMI 而改用了更先進的 Type-C 介面，呢個改動相信未必人人都 Buy，始終現時有 Type-C 的熒幕真係少之又少，更加唔好講 Projector，如果要帶多個轉插既話咪即係唔方便，呢樣真係可圈可點。
辛尼評語：最平 $8,000 究竟抵唔抵？
Acer 今次推出的 Switch Alpha 12 試玩前都會有一定期望，就算最平版本都用到 Core i5 處理器同 128GB SSD，以一部機仔嚟講當公司文書機或出 Trip 都絕對夠用。不過今日見到部機只得 Type-C 無左 HDMI ，係公司要駁 Mon 既話就要用轉插，或者有錢換隻有 Type-C 嘅 Mon 喇，如果大家唔會駁 Mon 用既話，Switch Alpha 12 其實都算抵玩。
建議售價：$7,998 起
同場加映
13” Notebook 薄過一毫子
Aspire S 13
Aspire S 13 的最大賣點就係機身厚度只有 14.58mm，同個一毫子拍埋仲要薄，當然佢個鍵盤就無得好似 Switch Alpha 12 咁拆出嚟，拎上手亦都唔會覺得重同大部。規格方面亦都同 Switch Alpha 12 差唔多，只係 SSD 最高有 512GB，不過個 Mon 既解像度就低少少，只有 1080p 質素，但對呢類 13” 機嚟講都無乜太大影響。
建議售價：$7,498 起
可擴充打機 Notebook
Aspire F & Aspire E
如果各位 wire 民平時仲會打機的話，全新 Aspire F 或者會適合大家，呢部機只有一個規格，為了可滿足遊戲需要因此內建 NVIDIA GeForce GTX 950M 顯示卡，大部份遊戲只要將個畫面調整至中級或以下，都會有相當不錯的流暢度。另外，它更可以讓用家作少量升級，例如可將記憶體擴充至最高 32GB 以或者更換硬碟同 SSD，但重量就有 2.4kg 未必適合經常攜帶外出用喇。
建議售價：$7,398
至於另一個 Aspire E 系列亦都有 2 款新機推出，其中較高階的同樣會有 NVIDIA GeForce GT 940MX 顯示卡，但要進一步將畫質下調先會有流暢表現，配備 15.6” FHD 熒幕同埋 Core i5 處理器。至於較平價版本，就只會用返 Core i3 處理器的內顯功能，個 Mon 雖然都係 15.6” 但解像度只有 1366 x 768，主要用作文書、上網或者睇 YouTube 都足夠，售價相對就好吸引，唔洗 $4,000 就有交易。
建議售價：$3,998 起
分享到 :
最新影片
