夏天又嚟到，芭蕉扇又係出動的時候。不過今次唔係講芭蕉扇，要係呢隻超強替代品 — 「冰火蛋」 ！睇開 unwire 的讀者可能都記得，上年我依莉詩已經介紹過一次。咁做咩又嚟呃稿費？知未係第二代加咗震動功能囉！
10秒極速熱變凍
呢部外型似足美容機的冰火神器已經出到第二代，除了輕咗少少，外型基本上同上一代無分別，而且制冷、制熱 同 充電功能都無變。三個唔同程度的製冷功能，最低可以降到 5度。只要按下制冷鍵，並選擇模式， 10秒左右就會到達預期溫度，相當快速。熱的時候放放係頸背幾秒就 Feel 到冰涼消暑。而製熱功能同樣有三個唔同程度，最高可以升到 56度。只要按下制熱鍵，並選擇模式， 10秒左右就會到達預期溫度，同樣快速。
▲ J-Cube 冰火神器有個把手位同一塊金屬板，外型似足一部美容機。
▲ 只有 208g ，咁就可以隨時放係手袋，看門口啦！
震動功能加強玩法
第二代冰火神器最大分別就係加咗震動功能，只要連續按開關兩下就會發出每秒 300下的震動。咁就可以係冷敷或熱敷的同時震動按摩，加強功效。另外，佢有 5200 mAh 移動電源容量，只要插入 OTG 轉接頭就可充手機一至兩次，可以隨時放係手袋，看門口。
▲ 隨機附送 OTG轉接頭、充電線、手繩、手提拉繩袋。
7大用途話你知
用途 1： 發燒當退熱貼
如果咁唔好彩發燒，唔一定要用小林退熱貼既，只要將冰火神器調校到 1級制冷模式，溫度大約會降到 15-18 度。咁就可以吸收身體的熱力，舒緩不適。而係呢個模式下可以連續使用 6 小時，咁就唔洗半夜起身換退熱貼啦！
用途 2 ： 收毛孔扮冰肌棒
原來冰火神器唔止外型似美容機，仲真係可以當冰肌棒用，只要調校到 2級制冷模式，溫度就會降到 10-13 度，同之前介紹過的 Panasonic 冰肌棒差唔多，同樣可以收毛孔。雖然金屬板的面積比較大，好難敷到 D 細節位，不過佢唔洗插線都可以連續使用 4 小時 40 分鐘，真係方便好多！
用途 3 ： 扭傷當冰袋
調校到 3制製冷模式的話，溫度就會降到 5-8 度，可以連續使用 3 小時 20 分鐘。如果不幸扭傷、牙痛，就可以用來當冰袋用，令收縮血管，暫時止痛。
用途 4 ： 導入爽膚水
雖然冰火神器唔似導入導出機，無離子同震動功能，不過當設定到 1級制熱模式的時間，金屬板會升到 38-40度，連續使用18小時。溫熱可以使毛孔擴張。塗完爽膚水之後，敷一陣就可以加快皮膚吸收啦！
用途 5 ： 冬天當暖蛋
既然會發熱，當然可以當暖蛋用， 2級制熱模式的溫度係 46-48度，仲可以連續使用 14小時。冬天出成日街都唔怕手凍凍啦！
用途 6： M痛當暖水袋
作為女仔，有時 M痛真係幾辛苦，用暖水袋用得個一陣又唔暖，冰火神器的 3級制熱模式可以去到 54-56度，咁隔住件衫都可以敷到，仲可以連續使用10小時，唔洗成日走去換水添！
用途 7： 運動後舒緩疲勞
▲夏天都有好多戶外活動，行完山、踩完單車對腳都會又酸又疼，呢個時候最新嘅震動功能就大派用場。每秒 300次的微震配合制熱功能可以按摩小腿，舒緩疲勞。
依莉詩：「加埋震動功能，抵玩過美容機波！」
原本冰火神器已經夠多功能，今次除咗制冷、制熱同尿袋之外，仲加埋震動功能，但價錢一樣真係幾抵玩。佢制冷同制熱都好快，差唔多 10秒就 feel 到，唔洗慢慢等，而可以校唔同的溫度配合震動就有更多用途，最好就係可以當埋冰肌棒同導入機用，一機多用。
售價 ：$599
查詢 ：JC Shop
地址 ： 觀塘創紀之城 5 期 apm 商場 L1-23 號 (3148 9455)、銅鑼灣 wtc more 世貿中心 408 號舖 (3102 2783)
分享到 :
最新影片
