依家乜嘢都要智能，就連跳繩都要用 Apps 計數，咁考體育就無得走數啦！見咁得意，我依莉詩就借咗嚟跳番幾下。
著地自動計步數
SMART ROPE 智能跳繩係 Kickstarter 集資成功的產品，最近香港都有得賣了。外表上佢同一般膠質的跳繩無分別，長度分為 XS-XL (228cm-201cm)，不過繩中間就有 23粒 LED燈，而手握位有藍芽裝置以連接手機 Apps。跳起上嚟唔會特別重，同平時無乜分別，所以如果唔連接藍芽可以當普通繩咁跳。
▲ 智能跳繩外表上佢同一般膠質的跳繩無分別，不過就可以連接 Apps ，紀錄每日跳繩數據。
▲ 智能跳繩因為中間有條 LED燈，唔可以好似平時收繩咁打結，所以附送了一個繩包俾你收納。
▲用 USB 充 2小時電就可以使用 36小時，如果每日跳半個鐘，應該兩個月先要充一次電。
LED燈邊跳邊顯示
繩中間部份比較硬，藏有 23粒 LED燈。只要連接好手機，跳的時候會出現 4位數字的跳繩記錄。我諗正常人一日最多都係跳幾百至幾千下，4位數應該好足夠。呢個功能幾方便，唔洗下下睇住個 App 先知自己跳咗幾多下，不過我同幾位同事試過，發覺佢顯示嘅位置次次都唔太一樣，有時甚至係背後，根本睇唔到，要重新起步再調節位置。
▲ 跳繩的時候可以睇到自己跳咗幾多下。
▲ 不過有時佢會顯示咗去其他地方，需要重新起步再調節位置。
App 紀錄每日次數
只要將智能跳繩連接去手機 App 就可以知道自己每日跳咗繩的下數、時間，所消耗的熱量 同 目標量。你仲可以輸入個人數據，如年齡、身高、體重等，以制定每日需要的運動目標。如果你有智能手錶等其他 health care 產品，呢個 App 可以直接過數據，咁就可以更方便管理自己的運動計劃。不過我用咗幾部 Android 手機都連接唔到，唯有用 iPhone 先可以正常使用。
▲ App 的介紹相當簡潔。
▲輸入咗個人資料之後，佢建議我每日跳 3600下。(媽，我平時 100下都跳唔到啊！)
▲ 除咗顯示跳咗幾多下，仲會有時間，所消耗的熱量 同 目標量作紀錄。 
▲ 仲有圖表分析你一個星期、一個月或者一年的數據。
依莉詩：「自動計數唔會走數！」
呢條智能跳繩唔洗自己數跳咗幾多下又真係幾方便，不過索價近千元好似有 D 貴。如果平 D 可能會有唔少學校買嚟考體育，咁大家就一定無得走數了。另外，要正常顯示次數，只可以係普通直搖跳先得，如果想玩下花式跳交叉繩就顯示唔到了。至於 Android 手機連接唔到的問題，我諗可能要等 App更新先得了。
▲ 高過我嘅同事小明就覺得 M碼短咗少少，如果長多 3-5cm 就更好，跳得快時就會無咁易 CLICK 到。睇嚟幾個人唔同高度係唔可以共用啊！
售價：$880
查詢：JC Shop
地址：觀塘創紀之城 5 期 apm 商場 L1-23 號 (3148 9455)、銅鑼灣 wtc more 世貿中心 408 號舖 (3102 2783)
分享到 :
最新影片
