唔少 wire 民都有網購的習慣，如果淘寶的話以前大家都會選擇直接由賣家運送到公司或者屋企，但隨住運費越來越貴，唔少人就會選擇集運，但始終都要有人收件先得。自從 7 仔提供領件服務之後，就唔少人都選擇自行到 7 仔取件，貪佢夠晒方便仲 24 小時都可以拎到。近日香港郵政推出一項全新服務叫「智郵站」，各位 wire 民可以自助到指定智郵站取件，部份地點同樣提供 24 小時服務，究竟呢個新服務點玩又難唔難用？
智能郵箱免寫地址
今次香港郵政推出的「智郵站」服務其實屬於「投寄易」的新增服務，目的在於方便大家可以更輕鬆方便收取郵件，至於使用方法其實同一般寄件無大分別，主要就多咗一個叫做 MCN 的領取郵件編號，之後大家就可以到預先選擇好的「智郵站」或郵局櫃位領件。
任何人都用到 無需額外費用
呢個「智郵站」服務完全免費，而且無論本地或海外投寄郵件都一樣可以使用，但當然要用「智郵站」就要揀返香港郵政的服務，乜乜順豐就真係用唔到，所以變相彈性唔太大，又或者網購時需要選擇指定的郵寄服務。睇落好似限制多多，咁究竟邊類情況會較適合使用呢？其中一種就係本地網購，以前大家都可能要到地鐵站約交收，郵寄又擔心無人收件，有咗呢個「智郵站」服務，就可以將貨直接寄去呢啲智郵站，咁就可以自己就時間先去拎。
申請 MCN 帳號教學
如果各位 wire 民真係想用呢個「智郵站」服務，就要先上網申請一個 MCN（領取郵作編號），就好似一個個人身份號碼，寄件同收件都會需要用到呢個 MCN，而且呢個號碼在首次完成啟動之後，每一年都要重新進行確認。
▲各位要先申請一個 ec-Ship 的帳號。
▲收到確認電郵再進行啟動程序。
▲再次登入 ec-Ship 網站，就可以申請註冊「智郵站」領件服務。
▲註冊時記得填寫正確通訊地址，因為要收取驗證碼。
▲收到確認信，就可以輸入地址驗證碼。
▲最後再進行手提電話驗證就完成登記 MCN。
申請過程勿心急，一切在於等
當大家在網上完成基本申請之後，就會收到一個 SMS 進行確認手續，但各位唔好以為咁就即時可以用，因為郵局仲會寄一封確認信，由申請到收到信大約要三個工作天，入面就會有一個最後的確認碼，收到信後要再次登入網站完成最後確認程序。以為咁就可以用到？仲未得住，因為大家仲要再等多 24 小時個帳先會真正生效（小編就因為等唔切所以就去郵局白行一趟），所以大家真係咁想用就最好預先申請定，臨急抱佛腳一定無可能！
▲為了方便之後領件，大家可以透過香港郵政流動 App 儲存 MCN 號碼。
可以叫對方直接寄去 MCN
好喇當大家經過成個禮拜嘅準備工夫，就終於可以開始用「智郵站」，其實同一般寄件嘅方法一樣，同樣都要填收件人個名同地址，不過係地址最底就要加返收件人個 MCN 同埋智郵站既編號，所以大家要收到件，就必定要必定要必定要（因為真係好重要）將自己個 MCN 同智郵站個 Code 俾對方，如果唔係就用唔到呢個服務，郵差叔叔只會跟返大家個地址去派件。同埋，經過小編的親身體驗，由於呢個服務仍然好新，基本上好多郵局的職員都未必可以從寄件地址就認得出要用「智郵站」，所以寄件之前最好就「提醒」一下郵局職員。
▲只要進入「智郵站」網頁就可以隨時更改智郵站或領件郵局，收件地址則可以參考網頁上的例子，最重要就是要填寫 MCN 一項。
咩先可以寄又有冇體積限制？
咁呢個「智郵站」服務又可以寄啲咩呢？根據香港郵政網頁顯示，「智郵站」服務主要都是針對較大型嘅物件，例如本地/入口普通郵件（只限郵包）、本地/入口包裹、易送遞郵件派遞服務（只限郵包）以及特快專遞服務郵件，郵件體積亦都唔可以超過 386 x 478 x 290mm，如果超過呢個體積，大家就要到附近的郵局領取，而特快專遞服務郵件就會送到郵件上的地址。
▲記得留意郵件的大小，否則便要到郵局櫃位領取。
領取郵件方法
當寄件人完成寄件程序之後，大家可以做嘅就只有等，一般來說所需時間同平時寄件一樣，大約 2-3 個工作天就會送到指定的「智郵站」。當郵件成功存入郵件櫃之後，收件人就會收到一個 SMS，入面會有一個取件用的密碼，之後各位就可以到「智郵站」取件，只要輸入 MCN 同埋密碼，如果正確郵箱就會自動打開，大家就可以拎件走。不過小編實測拎件時又遇到問題，為咗測試系統的保安，於是首次先輸入一個錯誤密碼，第二次再輸正確密碼，可惜系統不斷顯示「MCN 或密碼錯誤」，就算搵郵差叔叔幫手都一樣無辦法，最後郵局打返嚟話入密碼的時候要好小心，因為只要入錯就有機會即時 Lock Account，要打上去等佢哋幫手 Reset 先得，仲話之後系統可能或者會加入密碼嘗試次數喎！
▲當郵件抵達智郵站，大家就會透過 SMS 收到用於領件的密碼。
▲大家再到已選取的智郵站，記得留意並非 6 個智郵站都是 24 小時開放。
▲先在熒幕上輸入 MCN 號碼或透過掃描 QR Code 都得。
▲再輸入 SMS 中的密碼，理論上就會開啟郵箱取件就走得。
唔記得拎咁點算？
雖然話「智郵站」好似好方便，只要拎住個 MCN 同密碼就可以取件，不過由收到SMS 開始計只得 4 日時間俾大家去拎，而且暫時 6 個「智郵站」入面，只係得 3 個提供 24 小時服務，萬一未能在期限前取件，該郵件就會送到「智郵站」附近的郵局，再過多 7 個工作日仍未領取，就會需要收取存局費，到最後甚至會被退回或銷毀。
▲暫時只有調景嶺、屯門及天水圍設有 24 小時自取服務，其餘 3 個地點只開放到晚上 11 時。
實際測試 : 超出預期地麻煩
香港郵政今次推出的「智郵站」睇落好似好方便大家拎件，唔洗再受到時間嘅限制，但經過實際試用之後，就發現仍然有好多不足的地方。
登記需時長 地點非 24 小時開放
登記程序比預期的長，要收 SMS 仲要再收信先確認到，之後仲要再等 24 小時先可以生效。「智郵站」地點亦未夠方便，暫時只有 6 個地點當中更只有 3 個是 24 小時開放，其餘 3 個則開到晚上 11 時，要吸引到大家用相信仲有好大改善空間。
服務太新 未有通知職員
可能是服務太新，依莉詩在觀塘郵局寄件時職員竟不知有這個服務，需要等候數分鐘找尋其他職員幫手
SCAN CODE 時手機不能放太近
阿 Gi 去到智郵站的時候頭幾次都 Scan 不到 Code ，最後幸好有郵差叔叔教路，要水平放在鏡頭前把手機打橫才可，現場當眼處沒有指示
Touch Screen 反應差， Backspace 變 Home 鍵
此機並非使用如手機那種 touch screen ，必需要用力按下才可。好處是手指甲長的女士們都可以按到，但真的很不靈敏，按到手指頭痛。然後輸入 code 時本來想按 backscape 刪除最尾的字元，怎料遊標跳到最左邊開始的地方..
打錯一次 Code 即鎖..
最後我們無論 scan QR 或 手動，都說我們的領取碼錯誤，就算到郵局找郵差過來幫忙亦無能為力，他建議我們致電到電腦部尋求協助，後來電腦部解釋我們頭一次打錯密碼所以戶口上鎖，必需要他們幫助才能開鎖。
▲大家要小心密碼輸入錯誤有機會鎖 Account，咁就要打電話到熱線求助。
相關影片:
分享到 :
最新影片
