時光飛逝，舊區老化係一個無可避免的事實，不過如何令舊區重生，各個地方有著不同的做法。喜歡到澳門尋找隱世美食的朋友都可能去過關前街，這裡除了有牛什粥、豆腐麵、椰子雪糕等澳門傳統街頭美食，亦有神香、祭品、二手舊物和古董等傳統店舖，可惜隨著店主們年紀漸長，區內的店舖經常關門，街道間變得愈來愈靜。由上年開始，有公司決定以億元收購關前街附近共 12個舖位，一心打造成文創產品為主的商業區，今日小編就訪問了當中的創意總監 區德禮 (Eurico Ao)。
關前街遠在清朝的時候已經係重要的商業區，1688 年在此設立的「關部行台」，即是今天的海關，因此帶起了該區的發展。可惜好景不常，時至今日已經沒有太多人記得這一區。Eurico 表示「雖然呢幾條街好接近大三巴，仍屬旅遊區，可惜因好多鋪頭一星期只做幾日生意，變到成個區都好靜，缺乏人流。」正因為唔捨得讓呢區繼續老化，Eurico 希望注入新元素，打造成好有活力同正能量的商業區。
▲ 雖然關前街一帶已經開了十多間新穎的鋪頭，不過小編今日嚟到依然十分冷清。
現時已開業的店舖有 12間，當中一半自行經營、一半引入創業或品牌進駐。眼見每一間的鋪頭名都好童真，例如：包剪泵、扯大纜等，都係一 D 跨國界的小朋友玩意，Eurico 笑言「唔想係老街做更老嘅嘢，想將條街推到好繽紛，更年輕。所以我地會招攬想拓展業務的品牌進駐，例如售賣意大利玻璃工藝品、南非飾品、葡國香薰等有特色的店舖，同時亦商量好採用年青化的店名，令整條街變得更統一。」
▲ 呢度的店舖有本地年輕人創立，亦有海外品牌的成員，不過都離不開古怪的店舖。
▲ 店內的繽紛佈置，你可能估唔到佢係賣糖果。
▲ 係下一階段，Eurico 表示今年內會增加 4間食肆，其中一間更以杯麵為主題，打造成有得食有嘢買的地方。
呢幾年澳門政府唔再單靠賭業發展，同時希望打這不同的特式街道以分流旅客。Eurico 就覺得係好事，「澳門城區係一個好獨特的地方，充滿中葡特色，亦真正可以睇到人民的生活，旅遊唔一定只有賭場同杏仁餅。」不過，Eurico 坦言澳門於文創發展方面仍然屬起步階段，市民仍然係學習階段，需要慢慢培養。「據我所知澳門唔多呢類文創街唔多，係炮兵馬路有臺文創百貨，比手作人係個度 set up 小生意，租金只係幾百蚊，不過大部份的手作人都係由香港過嚟。」雖然澳門的手作人愈來愈多，不過手作人質素都好重要，Eurico 認為設計需要顧及用家感受之外，都要有自己的原創性同獨特性，現在可以發展的空間同機會都有好多。
▲ Eurico 認為要提高市民的文化素養，應該由區內的文化氛圍著手，所以關前街一帶的店舖售賣不少藝術品。
▲ 每一件藝術品都非常獨特，好似去了藝術館一樣。
係澳門出世、英國讀書，亦曾經係香港工作的 Eurico 認為三個地方的文創發展各有差異，「當然港澳的文創發展未有英國咁成熟，不過香港比起澳門已經走前好多，人的參與度都比較高。就好似澳門大部份手作人都係 part-time 性質，但香港已經有唔少手作人擁有自己的品牌。」雖然文創的發展有政府同商業的支持好重要，不過大家的創意同文化素養都唔可以少。Eurico 坦言「香港的發展始終都離不開商業模式，就好似 PMQ 慢慢只得倒模的活動，來來去去都係幾個知名的香港品牌，換湯不換藥。」最後，Eurico 笑言「雖然發展文創條路好漫長，但如果要容易賺到錢的話，開多幾間手信店，賣杏仁餅應該會仲好。而我目前就選擇咗專心係澳門做文創的計劃，希望令澳門變得更有特色同活力。」
▲ 活化關前街係一個長遠投資計劃，所以合約期基本兩年起。