2016 年可以話係穿戴式裝置大行其道嘅一年，除左見到身邊一班朋友用緊智能手錶或者手帶嚟自我監測，做身體管理之外，仲有好多穿戴式裝置陸續上市。年初嘅 Mobile World Congress 2016 （世界行動通訊大會）就展出咗好多概念性產品出嚟，其中就有好多款係穿戴式裝置嚟添！
穿戴式裝置同一般嘅智能裝置有少少分別，佢可以係任何戴喺頭部、手腳或著喺身上面嘅裝置。而最特別嘅地方，在於穿戴式裝置入面嘅智能感應器，可以收集唔同生理數據或者即時地理位置等，再將數據傳送到手機或者電腦進行分析、演算，咁就可以反映出身體嘅真實情況嘞。以下就會介紹幾款發展潛力非常高嘅穿戴式裝置，唔知大家又會唔會有興趣買嚟試試呢？
今時今日智能手錶成為咗穿戴式裝置的代名詞，差唔多各大手機品牌都有推出，佢內建嘅基本功能包括時間、通話、顯示通知同心跳紀錄等等。而智能手帶主要為運動人士而設，大多數用嚟收集運動數據，例如距離、速度，又或者卡路里燃燒量等等。
「數碼港培育計劃」其中之一嘅培育公司 CWB Tech 都有做智能運動手帶，佢地嘅產品 Glance 內建數據分析功能，唔駛依賴手機都可以進行多方面數據採集同分析，了解用家嘅運動動作，向用家提供建議。Glance呢個產品仲係今年嘅「香港資訊及通訊科技獎」度，攞咗「最佳生活時尚（綠色‧ 健康‧ 創意）獎」金獎㖭！
專門為小童及長者而設嘅智能穿戴式裝置係市面愈嚟愈多，不過功能就離唔開追蹤地理位置、求救或者即時聯絡等，有部分仲可以提供「跌倒偵測」功能添，等看護、監護人可以第一時間收到通知，適時提供協助，老人家或者小朋友都好有用，特別係對醫療機構、老人院或者學校都算係一件幾有用的發明嚟。
智能眼鏡雖然講咗好多年，但係似乎仲未獲得用家嘅積極反應，有好多產品仲停留係概念性 prototype 階段，唔知幾時先可以正式推出。反而遲來嘅 VR headset 有更多嘅吹捧，unwire 早前有多位同事親身試過，視覺效果及娛樂性一流，可以突破傳統停留係平面顯示器嘅框框，既可以睇戲又可以打機，而且已經有專家研究緊點樣將 VR 應用喺醫療訓練方面，相信 VR 裝置可以喺短時間之內有爆炸性嘅增長。
早前已有品牌研發可以自動衡溫、保持濕度、可以通話、變色甚至防彈嘅智能衫，不過相信智能「衫褲鞋襪」仲需要一段時間先可以獲得市場認可，尤其係女裝。女孩子嘅穿搭五時花六時變，而且稱得上智能嘅衫褲鞋襪一定唔會平得去邊，對於鍾意裝扮嘅人嚟講，應該都唔會係首選吧？不過，如果智能衫褲鞋襪能夠有助運動員增強表現同埋訓練成效，對於他們嘅專業領域嚟講絕對係一個喜訊。
配備大量最新科技嘅電動車已經大行其道，而其實亦已經有廠商針對電單車開發出智能頭盔。使用者可以係投影屏幕上面睇到即時嘅交通資訊好似路況、導航資料、速度、油量、溫度等等，甚至係提供埋後視鏡頭、安全警告等等，戴咗上頭揸電單車相信一定會更加安全!
講到底，大部份穿戴式裝置都唔會單獨使用，只會用嚟感應同收集數據，想進一步就必須配合軟件或者智能裝置好似手機、平板、電腦一齊使用。就而家嘅方向嚟睇，將生活同智能技術合而為一嘅裝置，好似智能手錶、手帶已經成功跨出咗第一步，市場反應相當唔錯，睇嚟能夠同生活緊密聯繫嘅智能穿戴式裝置先至可以快速普及呢！