早前有人穿制服扮飛機師被捕，不知是存心詐騙或是一種病態。其實人想得一些尊貴的 VIP 會籍，可能要長年累月花費金錢換回來，甚至需要別人推薦。如今在中國「乜都有假」的年代，你花數十萬換回來的 VIP ，別人花數百元就「買到」，真是讓小編嚇一跳。
酒店 / 航空 VIP 樣樣可買
其實一打 Keyword 就發現很多 VIP 咭可以買回來，以「常旅XX館」為例，佢係淘寶主要都賣各種唔同嘅會籍服務，而當中好多都係酒店、航空公司嘅尊貴會籍，售價由百零蚊嘅普通會員到七千蚊嘅酒店鑽石級會籍都有，仲保證必定可以升級或者可以用到 VIP Lounge，唔洗大家左儲右儲里數咁辛苦，不過搏唔搏得過就留返俾各位 wire 民自己決定喇。(免責條款 : 小編提醒各位 unwire.hk 讀者，此文章只作資訊式報導，如果要購買的話有可能觸犯法例，風險自行負責)
「線人」搭路 保証成功申請?
由於很多酒店或航空公司的 VIP 咭，都是聯繫著個人資料的，讓你不能使用別人的會員咭。所以大部份售出的 VIP 會藉都是透過「黑暗內鬼」幫你申請才能成功。價錢幾乎是「海鮮價」，通常都「面價」都是開大數，但如果跟淘寶店主聯絡的話，其實幾百元有交易。不過從這些不法途徑購買風險非常高，因為申請需時，你無法短期知道真假，萬一你忘記申請交易延時的話，很可能付了錢後 VIP 咭未到手，如果非實體咭的話會被視作虛擬貨品，淘寶是不會提供 7 天購物保障
高登帳戶有價有巿
除了 VIP 外，網上會員帳號都唔係想申請就有，好似高登討論區就係其中之一，很多網絡打手組織都為申請高登帳戶而煩惱，申請一個高登 Account 就必需要有香港常用的 ISP、電訊公司或大專院校嘅電郵先得，而且每個電郵只可以申請一個 Account
既然高登 Account 咁難有，點解仲會有咁多人想有，甚至會出錢同人買呢？講真好多人就算無睇過高登，都聽過高登或者高登仔呢個名，所以廠商要推產品，好多時放上高登點都會有唔錯嘅效果，就算俾人「派膠」都叫做有 Noise。之前 unwire.hk 都曾經訪問過一名專業網絡「打手」<這裡>，佢提到高登可以話係兵家必爭之地，收費更比其他論壇高，但要有效果較氣勢，就必定要有返咁上下 Account 係手。
如果各位 wire 民都想成為一個「真‧高登仔」又苦無辦法，但正所謂「淘寶咩都有得買，區區一個高登 Account 又點會冇」。今日，小編就喺淘寶搵到一個有賣高登 Account 嘅賣家，而且仲標明「高港高登會員 ISP 認證」，而且只需 459 人仔（約 HKD550）就有交易，真係買嚟自用送禮甚至當做生財工具都唔算貴。但如果真係買咗又會唔會有咩風險？小編即管扮買家嘗試同賣家聯絡，嘗試了解一下真偽。
即 Pay 即用絕無花假？
既然賣家標明「ISP認證」，即係佢應該有「方法」可以搵到大量合法嘅 ISP 電郵，不過當小編問賣家喺用邊間 ISP 嘅時候，過咗一陣對方先回應「不透入」（不透露），可想而知佢呢批高登 Account 都應該係「用佢自己嘅方法」搵返嚟。除咗唔透露係邊間 ISP 電郵之外，賣家仲表示呢批 Account 絕對「乾淨」，無俾人派膠亦都唔會有時限，亦都唔需要擔心會被人查封，仲表示已經有好多人幫襯過佢添，不過睇返淘寶個網頁，暫時只係顯示賣出一個，而存庫則仲有 58 個。不過建議 wire 民切勿入手，呢類帳號屬虛擬貨品，所以係唔會得到淘寶嘅 7 天無理由退貨保障，萬一個 Account 有咩問題，買家隨時追唔返果幾百蚊，亦可能因為使用別人資料而犯法。
其實由不正常途徑買到會員會藉有可能觸犯法例，提醒各會員勿購買這些來歷不明的 VIP 資格。
Leave a Comment