女士們就係咁複雜，又要食甜品，又要怕肥，奈何愈邪惡的甜品就愈吸引。今次港式甜品店滿記就捉住女士們的心理，推出全新品牌 Sweetish ，並打造分別以健康同邪惡為主調的甜品。面對天使與魔鬼的誘惑，我依莉詩又會撐邊隊呢？
魔鬼 Pizza 超邪惡
食乜都好，相機食先才是王道。根據唔知乜定律，甜品愈邪惡亦愈吸引，就好似呢個魔鬼 Pizza 系列，由榴槤芝士 Pizza 為邪惡軸心，吸睛之餘，濃郁滋味，令人欲罷不能。
▲ 榴槤芝士 Pizza $48/個
榴槤向來都係令人又愛又恨的食物。呢個 Pizza 將清香的金枕頭榴槤果肉混合忌廉芝士，厚厚咁塗係 3mm薄的麥香餅底上，再灑上 mozzarella cheese，用料十足。
▲ 熱辣辣的 Pizza 不但散發出陣陣榴槤香，加上拉絲效果已經滿分。
▲ 因為用金枕頭，榴槤味唔算太濃，食落有淡淡清香金甜，同時有食到芝士的少少鹹味，非常配合，亦唔會太膩，一個人可以食半個呢！
▲ 士多啤梨棉花糖 Pizza $48/個
棉花糖可以話係甜品中的邪惡之最，焗到半溶的棉花糖鋪滿批底，再加上忌廉、朱古力醬同大大粒士多啤梨，層次豐富，滿口幸福感。不過我都要比定心理準備大家，棉花糖甜品向來都係令人有咬下去的衝動，不過真係唔食得多，因為真係甜到膩，如果想食，最多搵多幾個人一齊分享。
▲ 鮮雜果 Pizza $48/個
未必個個都接受到太甜的甜品，呢款以塗滿草莓、奇異果、藍莓及紅桑子的 Pizza ，除咗七彩繽紛，而且甜甜酸酸，好開胃。
▲香蕉榛子朱古力 Pizza $48/個
香蕉同朱古力永遠係絕配，呢個 Pizza 有香蕉、肉桂、碎果仁 同 朱古力醬，食落並無棉花糖 Pizza 咁甜，但就有濃厚的味覺衝擊。
▲ 焦糖蘋果 Pizza $48/個
薄餅表面塗上吉士及忌廉芝士的混合醬料，再排上片片肉桂蘋果、金寶脆脆及焦糖醬，金黃色的焦脆外觀令喜歡香甜蘋果的食客垂涎欲滴。
天使乳酪太健康
食完咁多邪惡甜品，係時候介紹番健康甜品。呢系列的乳酪樽同特飲不但以新鮮生果 mix 而成，款款都係低脂低卡、含豐富營養素，作為早餐、quick lunch 甚至下午茶都十分適合。
▲ 希臘乳酪樽 $42/杯
香蕉燕麥乳酪樽、彩虹雜莓乳酪樽、熱帶水果乳酪樽、陽光紅柚
4款希臘乳酪較普通乳酪有更高蛋白質及鈣質，乳糖亦較少，配合香蕉、雜莓等水果 及 高纖有營的奇亞籽，口感豐厚，而且有高度飽腹感。
▲ 健康有營飲品 $36/杯
另外一系列就係生果特飲，每款都由鮮果加入希臘乳酪打成，每杯約 200 至 260卡路里，有足夠營養之餘亦給予適當熱量。早上上班上學前及下午茶時段，飲用一杯清新的鮮果特飲，美味又飽肚。
轉打新派甜品
講番呢間新開的甜品店 ，不但一改以住滿記的形象，以年青飲食為主。餐廳設計更走簡約北歐風，淡淡原木色調，明亮舒適。不過餐廳只有 50個座位，唔算太大，宵夜時段可能要排隊呢！
▲ 餐廳只有 50個座位，唔算太大。
依莉詩：「榴槤 pizza 比想像中好食」
甜品店食 Pizza 已經好特別，仲要係榴槤芝士 pizza 就更重口味，好彩因為用金枕頭，榴槤味唔算太濃，我唔太食榴槤都覺得好好味，食左半個呢！至於天使系列方面，健康得嚟唔會話無味或者難入口。特別係抗氧奇蕉特飲，新鮮的香蕉同奇異果配合得好好，飽肚之餘得 230 卡路里，應該係好好的早餐。
美味指數 ★★★☆☆
Sweetish by HONEYMOON DESSERT YOHO MALL
地址：元朗形點二期 3樓 A315B 號鋪 (元朗西鐵站 F出口)
電話：23254049
營業時間：星期一至星期日(上午 11時至晚上 11時)
Leave a Comment