今年 D 天氣奇奇怪怪，見呢排天氣熱得都穩定，係時候收被同換季。 不過對住陰晴不定的天氣，如果晒晒下被先落幾滴雨，咁就前功盡廢。 咁啱又俾我依莉詩發現 Panasonic 推出咗曬被寶，於是就決定借嚟試下。
相信唔少媽媽都覺得要放多夠嘢好阻訂，不過呢部曬被寶只有垃圾桶的 size ，唔算太大，加上好輕，單手都可以搬得郁，擺入衣櫃無問題，唔會晒位。而且佢有5種預設溫風吹送模式，可以係有限的地方焗羽絨被、羊毛被、棉被、鞋、衫等。係黃梅天慳番晾衫、晾被的位之所餘，冬天可以當暖風機用，落雨天可以吹乾鞋襪，好似幾實用。
▲ 曬被寶機身不大，很容易收納，而機身有個手握位，方便拎起通屋走。
▲ 機後有電線收藏位，唔用的時候可以收番入去，好整齊。
▲ 拉起上方把手，吹風咀就出來了，方便放入被入面出風。
▲ 機頂上面寫明了各衣物的建議烘焗時間，只要按模式就開始，時間夠會自動熄機，簡單到機械白痴都識用。
▲ 左右兩邊有隔塵網，得閒要清洗下。
收棉被係人件令人好麻的事，特別係最近時不時都落幾滴雨咁，又曬又收忙成日。呢部叫得曬被寶，主要功能當然係曬被，仲要放係床就焗得，唔洗另外搵位放。機身會製造暖風，再通過喉管同三面出風的噴嘴傳送到床褥同被中間，令暖風均勻散佈被褥內。只要 90分鐘就可以烘乾棉被，摸落去暖笠笠，就好似啱啱係陽光曬完咁，D 味焗晒出嚟。雖然佢無紫外線，未必殺到菌，不過烘乾的同時備有防蟎功能，可以殺死塵蟎，從而趕走致敏源，算係陽光不錯的代替品。
▲ 同普通暖風機最大的分別係佢個特製三面噴嘴。
▲ 主要將噴嘴放入床褥及被中間就可以開始烘被。
除咗曬被，暖風仲可以用嚟烘乾衣物同鞋襪。如果落雨天整濕咗對鞋，只要 5分鐘就可以清除鞋內濕氣了。不過，雖然話可以用嚟吹衫，但出風口唔大，而且係針對性，如果黃梅天洗咗機衫都唔可能一次過吹晒，最多都只係令室內濕度下降咁解。
▲ 出風口可以調較，以直接吹住鞋襪。
▲ 如果想快，可以拉出噴嘴直接吹鞋入面，方法就同用風筒差唔多，不過肯定成屋臭晒囉！
▲ 睇網上有人教可以將曬被寶放入衣櫃，利用緊密的空間烘乾衣服。不過我個衣櫃 (最整齊嗰個)太多衫了，根本放唔入。
呢部曬被寶其實係一部暖風機，只係因為多咗個噴嘴，所以可以用嚟烘被咁解。而呢個烘被功能又真係幾方便，唔駛再搵地方曬，係番張床就得。雖然烘的過程間房有 D 熱同有陣味，不過都好快散，而且操作的時間都好靜，就好似開咗風扇咁細聲，按個鍵去做其他嘢，90分鐘之後番嚟收被，方便好多。加上佢本身就係暖風機，冬天可以保持室內暖笠笠，夏天落雨又可以吹乾鞋襪，機身都算輕巧細小，就算多舊嘢放係屋企，都總算一年四季用得著。
售價: $ 1,880
查詢：2833 0955
相關影片 :