之前都介紹過 Sanrio 家族會係香港 3D 奇幻世界推出 三部曲，事隔幾個月，終於到第二部曲 － 西方童話。依家就等我依莉詩同 Summer 一齊帶大家睇下融入夢幻的童話世界啦！
8 大全新專區齊換畫
今次係 10個分區中保留了香港主題，而 Pop-up Store 換成了星空屋的佈置，所以真正的換畫只有 8個分區，分別變成 《愛麗絲夢遊仙境》、《綠野仙蹤》、《格列佛遊記》、《家傳戶曉童話》、《愛情童話》、《糖果屋》、《節日童話》同 3D立體互動，合共 28幅畫。除咗由中國神話主題轉做西方童話之外，Sanrio Characters 都有所改變，加入了蛋黃哥、肉桂狗 同 Little Twin Stars，令場景變得更夢幻。
▲ 10個分區中，有 8個分區換畫了！
▲ 一入到去就見到呢幅全場最大的畫，好似話係愛麗絲變大咗，比間屋困住啊！
真正要有人先完整的 3D畫
雖然話分咗 8個區，不過因為都係西式童話，而且感覺好一致，所以不用分那麼細吧！比起上一次中國神話，我覺得西式童話同 Sanrio 卡通人物更加夾，配合繽紛的畫面，出嚟嘅相就更吸引。另外，今次唔少畫都有半立體的裝置由 3D畫延伸，甚至有些畫沒有人係唔會完整到幅畫，呢兩方面令 3D畫更有視覺效果，亦比上次出色。上次影唔夠的朋友，今次再去都未嘗不可。
▲ Summer 要好似愛麗絲一樣被捲入兔洞了。
▲ 你可以披上紅斗蓬扮狐狸瞓係床得小紅帽啊！
▲ 拎起油掃就將白玫瑰油成紅色了。
布甸狗比重最高
雖然話今次有 8個卡通人物咁多，不過分配都係好唔平均，肉桂加同哈妮鹿都只出現一次，但布甸狗就因為今次生日，就老是常出現。如果係布甸狗的 Fans 應該好興奮啊！
▲ 扮演國王的布甸狗係咪好英俊呢？
▲ 係小人國入面，布甸狗變到好大隻啊！
▲ 係長髮公主入面，布甸狗變身肥王子。咁睇應該都幾難先爬到上露台啊！
情侶歐式背景晒合照
3D館除咗鴨仔團，都係唔少情侶打卡的地方，所以今次都有幾幅歐式的背景比大家影相晒恩愛。
▲ 係布甸狗噴水池下談心應該不錯吧！
親吻立體蛋黃哥
除咗 3D畫外，紅心皇后 Kuromi 同 青蛙王子 蛋黃哥 仲會跳出畫框，「活生生」咁係立體區同你合照，快 D 去錫啖蛋黃哥啦！
▲ 唔知錫完蛋黃哥會唔會變得勤力咗呢？
▲ 場內藏咗好多蛋黃哥係畫入面，如果數得出有幾多隻，再同職員講會有書籤做禮物啊！
依莉詩：「西式童話更夢幻」
今日我係 3D館的門口聽到有個男人話呢度太細，主題又單一，一 D 都吸引唔到佢，仲話遊客都唔會去咁話喎！呢度細同主題單一我都認同，不過吸引唔到佢大概係因為 Sanrio 卡通人物唔係佢杯茶吧，而呢間 3D館每隔幾個月就會轉一次主題，都係想吸引本地人嚟多幾次，我反而幾鍾意佢咁做，嚟到都係想輕輕鬆鬆影下相。如果太多唔識規矩的鴨仔團，我諗只會令人嚟過一次就唔想再嚟，咁就算佢轉再多主題都無用。
講番今次的主題，Sanrio 卡通人物同西式童話始終比較夾，所以今次的感覺應該會令粉絲更興奮，亦因為同上次的感覺好唔同，我相信上次去過的，今次都一樣會影得開心。雖然話今次卡通人物佔的比重都係唔平均，不過布甸狗的出現恰好中和到 Melody、Little Twin Stars 的童話感，甜而不膩。另外，今次唔少畫都有半立體的裝置由 3D畫延伸，甚至有些畫沒有人係唔會完整到幅畫，呢兩方面令 3D畫更有視覺效果。
HK3DM x Sanrio Characters 奇幻二部曲之西方童話
時間：10am – 8pm
地點：尖沙咀東加連威老道96號希爾頓大廈1樓
入場費：成人$120（星期一至五），$149（星期六、日及公眾假期）；小童及長者$100（星期一至五），$120（星期六、日及公眾假期）
分享到 :
最新影片
