各位 wire 民如果見到 MacBook 出咗新版而買咗嘅話，當見到部機得一個 Type-C 介面都會好頭痛，雖然話 Type-C 將會取代現時嘅 Type-A 介面啫，但就連 iPhone 6s 跟機條 Lighting 線都仲係 Type-A 介面，要直接用 Type-C 就又要另外俾多 $188（1 米）或者 $288（2 米）。加上好周邊產品例如 USB 手指或者外置硬碟，都依然用緊 Type-A 介面，所以要更方便自己接駁唔同嘅周邊產品，買個 Type-C Adapter 已經喺必需。
MacBook 只得一個 USB Type-C 介面確實好唔方便，除咗限制咗可連接嘅擴充設備數量之外，最慘就喺唔可以向下兼容舊產品，就算 Apple 自己都有推出多款 Type-C 轉插，而唔少第三方廠商當然都有推出過。但究竟揀返 Apple 原廠嘅好定其他廠商出嘅好呢？今次小編就為各位 wire 民搵嚟在香港較出名的 MINIX NEO C 同 Verbatim 呢 2 款採用唔同設計嘅第三方 Type-C 轉插，同時與 Apple 原廠產品作唔同方面作。
1. 越多功能越貴
既然機身上得一個 Type-C 介面，咁揀 Adapter 就梗係越多功能就越好，如果唔喺一個轉插得一至兩個介面，咁好多時就可以要「駁上駁」，除咗麻煩之外，更會直接影響到當中嘅傳輸速度，如果駁 USB 外置硬碟仲隨時會出現唔夠電「推唔郁」嘅問題。
重度多功能外掛型 7 合 1
呢款 MINIX NEO C Adapter 擴充功能絕對可以大大提升使用 MacBook 嘅便利性，分別有 2 個 USB 3.0、microSD 同 SD 讀卡器、USB Type-C、HDMI 同埋 LAN，完完全全可以彌補 MacBook 在功能上嘅不足。
▲有 Type-C 可以照常幫 MacBook 充電，至於 HDMI 就方便接駁其他熒幕。
▲講功能真係無得輸，仲有 Gigabit LAN、2 個 USB 3.0、microSD 同 SD 讀卡器。
基本功能選輕便簡單
如果各位 unwire.hk 讀者覺得 MINIX 有條線唔夠靚仔又嫌太大嘅話，咁 Verbatim 呢款產品可能會啱大家心水。雖然擴充功能方面就只有 2 個 USB 3.0、Type-C、microSD 同 SD 讀卡器，但最大賣點就係同 MacBook 連接時中間唔會有條線，可以話同 MacBook 完美融合。連接後亦都可以緊貼 MacBook 機身，唔會出現條條揈情況。不過呢個設計，有個小缺點，就是在你插咭或插 USB 的時候，有可能整鬆斷開連接
▲由於可以與 MacBook 完美結合，功能上則有 Type-C、2 個 USB 3.0、MicroSD 同 SD 讀卡器。
Apple USB-C Digital AV Muiltiport 轉換器：唔同功能分開買
至於 Apple 原廠就分別有推出唔同嘅版本嘅轉換器，雖然大家可以跟據唔同需要而揀一款啱用嘅，以今次測試嘅 Digital AV Multiport 為例，就分別有 Type-C、USB 3.0 同 HDMI 輸出，如果講功能嘅話，Apple 原裝產品絕對輸蝕。
▲Apple 原裝轉換器功能就較少，只可以講勉強夠用，想同時駁外置硬碟同讀卡器已經唔得。
2. 注意連接外置硬碟問題多
可能電力不足推動硬碟
如果使用 USB Type-C 的 unwire.hk 讀者們，使用 USB 外置硬碟真的很頭痛，因為它未必有足夠電力供給硬碟。其中第一個「死因」在於 USB 線，有些轉接器的電力輸出偏低，只是剛剛能足夠推動硬碟，但如果你的 USB 線質素差，可能電阻大會讓硬碟推不動，若你有遇到同樣的問題不仿換線試試。第二死因是硬碟比較需要「足火」才能推動，要換一個輸出比較足火的轉接器才可。
充電中不能使用
第二個問題是，如果你 Adpator 接上了 USB Type – C 為 Macbook 充電時，反為沒有電去讀取硬碟。當我把 USB C 充電線散走，硬碟又再次成功連接。
3. USB 充 iPhone 有快有慢
由於 MacBook 的先天缺憾，所以當大家用緊轉換器又想叉電嘅話，就只可以透過轉換器上面嘅 USB 介面。 unwire.hk 發現原廠輸出比較高有接近 1A ，其他都是標準 USB 0.5A ，同時發現，有的會在 Macbook 充電時不能為 iPhone 充電
▲提供穩定 0.48A 輸出，插入 Type-C 可同時為 MacBook 及電話充電。
▲同 MINIX 一樣有 0.48A 輸出，不過當插入 Type-C 電源後，只能為 MacBook 充電，未能同時為電話充電。
▲原裝有時貴得有道理，Apple 呢款轉換器就可以有 0.85A 輸出。
▲至於呢款只有單一 USB 嘅轉換器，最高更有接近 1A 輸出，平均亦有接近 0.9A。
3.原廠速度唔一定快
用得轉換器，絕大部份都希望為 MacBook 加返 USB 以至讀卡器介面，咁究竟非原廠的產品在傳輸速度上會唔會有好大分別？以下就分別以 USB 3.0 手指、USB 3.0 外置硬碟與及 SDXC 記憶卡，分別抄入及讀取一個 1.6GB 資料夾，入面包含400 張相片，比較不同轉換器嘅所需時間。
USB 3.0 手指
▲除咗 Apple USB-C to USB 速度明顯較慢之外，其餘三款在讀寫速度上都幾乎相同。
USB 3.0 硬碟
▲外置硬碟方面，四款則都可以即插即用，唔洗額外插 Type-C 供電，至於速度上亦都差唔多。
SDXC 記憶卡
▲Verbatim 同 MINIX 喺 SD 讀卡器讀寫表現無大差別，不過要注意 Verbatim 要將 SD 背面向上插入。
4.大家都出到 4K 但其實畫質不一
唔少 wire 民揀得 MacBook 都可能貪佢部機夠輕夠薄方便拎出街做嘢，但有時要做 Presentation 嘅話，因為佢機身上完全無顯示輸出，要駁 Projector 就相當唔方便Apple 原裝 Type-C 轉換器同 MINIX 都有提供 HDMI 輸出功能，以下就比較一下兩者嘅輸出。
▲MINIX 整體亮度較 Apple 原廠轉換器更亮，尤其暗位更有層次，不過測試時出現過一兩秒突然黑畫面問題。至於 Apple 原裝轉換器十分穩定，就算長時間使用都唔會太熱。
5.有線上網出 Trip 旅行好好用
雖然 MacBook可以支援更快嘅 802.11ac 上網，但始終未必所有地方都有免費 WiFi，尤其外地旅遊工幹，就好多酒店依然只係得有線上網服務就算有 wifi 都是收不好速度超慢。今次測試之中，就只有 MINIX 同時有 Gigabit LAN，不過就要先到網站下載 Driver。以 500M 寬頻作測試，上下載速度分別有 470Mbps 同 310Mbps，當要下載大型檔案時就相當有用。
▲始終有線速度上一定會比 WiFi 快同穩定，不過用之前就要先裝 LAN Driver。
辛尼評語：原廠唔係最好但最 Stable
玩過幾款轉接器，就覺得無一隻是全勝，每一款都有自己的長短。例如多功能的一定是選 Minix 可是售價相對貴，方便就 Verbatim 唔使線。不過原廠 adapater 雖然貴同速度未必最快，但真的問題比較少，要安全的話買原廠會比較好
Verbatim USB Type-C 擴充器
建議零售價：HK$398 顏色：灰、金、銀
查詢：23141220 (Verbatim)
Minix Neo C 擴充器
建議零售價：HK$738
查詢： 31755678 (minix)
Apple USB-C Digital AC MultiPort 轉換器
建議零售價：HK$588
Apple USB-C 至 USB 轉換器
建議零售價：HK$148
分享到 :
最新影片
