雖然好多人而家就算去旅行，都只會用拎 iPhone 或者手機影相，確實如果只係影下 Snap 嘅話，手機都好夠用，如果要有更好嘅質素又或者要影遠啲影清啲，一般手機由於都無光學變焦，夾硬拉大只會令到啲相又鬆又矇。Sony 今日就正式宣布RX10 II 嘅新版 RX10 III，當中最大升級絕對係佢支 24-600mm 鏡頭，真係影近又得影遠都絕對無問題。
一直以嚟 Sony RX10 系列定位其實比較尷尬，因為佢唔似 RX100 機身咁細，但又唔同 RX1 咁係 Full-Fram 機，不過今次推出嘅 RX10 III 或者都會吸引到各位 wire 民。今次 RX10 III 用咗最新嘅蔡司 Vario-Sonnar T*24-600mm F2.4-4 大光圈變焦鏡，而且今次仲用咗 8 片 ED 鏡片、1 片超級 ED 鏡片同埋 2 片 ED 非球面鏡片，用 ED 鏡片嘅好處就喺可以減低色散，同時令到影出嚟嘅相擁有較高對比度同銳利度。另外，鏡頭表面嘅 ZEISS T 鍍膜，就可以減少出現眩光同鬼影問題。
▲就算 24mm 支鏡都已經伸出唔少，當用盡 600mm 最好就用手扶住鏡身前方加強穩定。
▲三操控環設計方便，因為距離夠所以唔易轉錯，加上坑紋夠深唔易滑手。
▲機身頂部有多個自訂功能鍵，仲可以透過轉盤快速控制 ev 值，確實相當方便。
▲機身背面有 Movie 按鈕一按即可拍 4K 片，而底部嘅轉盤小編則覺得略為細小，用落未夠就手。
▲個熒幕今次可以作多角度調校，就算落咗腳架都唔會頂住，呢個改善就非常好。
RX10 III 最大賣點就喺 600mm 焦距，雖然 m43 機都可以裝長鏡擁有 600mm 效果，但細小機身配長鏡，會有「頭重尾輕」嘅感覺，令到操控上都無咁就手。至於 DSLR 機買一支長焦距嘅鏡已經唔少錢，如果去旅行用，連要同時帶埋定焦鏡、Wide 鏡等等，除非過關嘅時候有人幫手拎喇，唔係都真係幾重！另外，RX10 III 就算 Zoom 到去 600mm，佢嘅最短對焦距離只需 72cm，好處就係可以令到主體更大，用嚟打雀或者影演唱會就更好用，減少後期要再 Crop 相嘅不便。各位 wire 民或者都試過，進行超遠攝嘅時候，除非落腳架或者有「石膏手」，如果唔係好易會因為手震而令到張相好矇，RX10 III 就可以提供高達 4.5 級影像穩定，試過就算 Zoom 到最遠，拍片定影相都好穩定，但就要留意返 600mm 支鏡都伸長咗唔少，所以用一隻手輕扶支鏡會更穩定。
▲24mm 嘅拍攝效果，基本上遠處大廈嘅招牌已經睇唔清楚。
▲Zoom 到 600mm 之後，就可以清楚睇到招牌之餘，相都仲依然清晰。
雖然超遠攝確實好吸引，但其實會用到咁遠嘅情況都唔算好多，反而好多時去旅行或者一般影相，就好多時都會用到較近嘅距離或者微距拍攝。對於唔可以換鏡頭嘅 RX10 III 嚟講，最新焦距為 24mm，不過最特別就係今次嘅最近拍距離大大縮短到 3cm，對於旅行要影美食就好有用，試影嘅時候鏡頭幾乎可以貼住要影嘅主體，大家影食物嘅時候就要小心啲變咗「相機先食」！加上佢嘅對焦同快門都有提升，0.09 秒嘅對焦速度只要輕按快門就已經完全對焦，而 1/32000 快門加上每秒 14 張嘅連拍，對於打雀、運動或者一啲動感拍攝就非常有用，可以先影再慢慢揀，總會有一張中！
▲24mm 微距拍攝，配合 f/2.4 大光圈同埋快速對焦，淺景深效果相當凸出。
買得 RX10 III 都係為咗可以唔洗拎咁多支鏡，可以等自己輕裝上路，令次 RX10 III 都只係重 1,095g，雖然比起 RX10 II 嘅 813g 重咗，但講到焦距就真係無得輸。同時，今次 RX10 III 仲加入咗三操控環設計，等大家可以直接進行透過鏡頭進行對焦、變焦同埋控制光圈，而且每個操控環更有 25mm 闊，咁就唔怕會唔小心轉錯，加上每個環嘅坑紋都明顯加深，唔會咁易滑手，進行微調就更準確。
▲如果以一部有 600mm 焦距嘅相機嚟講，RX10 III 都唔算大部同重，就算女仔都一樣啱用。
建議售價：11,990
查詢：Sony（2345 2966）
