今時今日好多人都會除左手機之外，為方便工作都會帶多部平板電腦出街，以應付一般上網或睇片需要。但當處理文書工作時，就會發覺虛擬鍵盤其實會拖慢工作進度。如果各位 wire 民好似小編咁要成日打好多字，或者會考慮買個藍牙鍵盤，確實藍牙鍵盤會比起虛擬鍵盤方便，但有用過就會覺得手感其實唔好，鍵距不足而且按鍵通常較細，大大影響輸入速度。
單手拿著都不算重
對於部份可能需要經常出外工作的用家，都會覺得帶住部 Notebook 相當重，如果同時要用平板電腦的話，每次都要帶電話、平板電腦、手提電腦，加上「尿袋」同叉電線，單單電子用品已經相當重。Venturer 11K 採用 2-in-1 設計，平時出街可以當 Tablet 用，部機用上 11.6” 熒幕，支援 1366 x 768 解像度，呢個設計有利有弊，打橫使用既話單手都唔會覺得重，但當打直用就會略為覺得「長」，但相對來說睇網頁就會好方便，因為每次可以睇到較多的內容，減少上下滾動既頻率。
▲平板淨重約 770g 同 12″ iPad Pro 差唔多，所以單手使用都唔會太重。
▲加埋鍵盤之後重量接近 1.4kg，但由於都會放係枱當 Notebook 用，所以都影響唔大。
▲部機雖然唔係用金屬外殼，但全負載時表面溫度都只係 33 度左右，上手都唔會覺得太熱。
支援 10 點觸控 放大縮小手指攪掂
好多時平板電腦都會直接在熒幕上進行操控，因此對熒幕的反應和支援觸控點數有直接關係。好多時平板電腦都會係室外環境下使用，11K 個熒幕就可以支援 10 點觸控，而且所有放大或縮小等動作，都可直接在熒幕上完成，對於要睇相就相當之方便。加上預載 Windows 10，可以透過當中的 Tablet Mode 令到用手指操控更方便，大大減少誤按的問題。
▲個 MON 既可視角度唔算太闊，約 45 度左右仍可清楚睇到畫面內容。
平板隨時變 Notebook
因為 11K 採用 2-in-1 設計，鍵盤同機身可以分開，十分方便攜帶，當要變做 Notebook 其實好簡單，只要將機身重新與鍵盤連接就可，而連接位採用磁石吸實，理論上唔易出現鬆脫或裝錯的問題。將熒幕連接鍵盤後，雖然佢個鉸位都可以作一定幅度的調整，但就未能打開至 180 度或 360 度。
▲採用磁力鉸位，基本上一接觸就會自動吸實唔會走位。
鍵盤手感好
用得 Notebook Mode 當然就因為想用佢個鍵盤加快輸入速度，試過佢個鍵盤鍵距適中加上按鍵大小同一般鍵盤相近，因此可以相當唔錯既手感，亦唔需要特別既適應時間。
▲鍵盤按鍵大小和鍵距適中，同普通鍵盤一樣可以快速進行文字輸入。
雙充電設計
平板電腦好多時一用就幾個鐘，或者大家甚至會忘記充電，當要用又發現「0 電量」就大件事，11K 官方資料顯示可提供 8 小時續航力，而實際使用則可以用到約 5 小時，都叫做應付到外出使用既需要。但大家都唔需要擔心，因為 11K 配備雙充電設計，除左可以附送火牛以 DC 充電之外，機身上亦同時有一個 microUSB 都可以為平板電腦充電，當然 microUSB 充電就一定會較慢，但作為應急之用總好過無得用，呢個設計相當唔錯。
▲可用火牛或 microUSB 充電，亦有 miniHDMI 接駁熒幕甚至電視。
有得插 microSD 擴充容量好 Easy
相信唔少 wire 民都會擔心平板電腦容量不足的問題，雖然有各式各樣既雲端儲存空間，但始終又要上網速度又慢，就算部機有 USB 俾你插手指或外置硬碟，出街果時用都好唔方便。11K 的其中一個優點就配備了 microSD 插槽，只要買張 128GB 甚至 200GB 卡，插落去就即時可以擴充容量又唔會多條尾。當然佢機身上亦都有一個 USB，真係要駁 USB 手指或外置硬碟都一樣得。
▲雖然只得 64GB 儲存空間，機身上有 microSD 卡槽，要擴充容量都好容易。
得閒睇全高清片
平板電腦除左用作工作，好多時都可能會用來聽歌睇片，11K 採用 Intel Atom 4 核心處理器同 2GB RAM，工作時開個 Browser 同 Word 都絕對無問題，試過播 1080P 影片亦都非常流暢，但 4K 影片就有點吃力，不過以 720P 熒幕睇 4K 其實意義不大，1080P 已經好足夠。11K 另一個優點是擁有 miniHDMI 輸出，對於上班一族只要一條 HDMI 線就可以駁 MON 或者 Projector。
▲喇叭設於機身背面，音量夠大夜晚睇戲聽歌都無問題，當然出街就用返 3.5mm 駁耳機喇。
VENTURER ELITEWIN 11K 售價：$2,588
由即日起至 5 月 15 日，於蘇寧購買 VENTURER ELITEWIN 11K，除左跟機送一年 Office 365 個人版之外，仲送你 Microsoft Bluetooth Mouse（價值$259）、Rez USB HUB 2.0 BLACK （價值$98）以及 USB 8GB（價值$56 PNY OTG）。數量有限，送完即止。
產品資訊請按此
Leave a Comment