上網成日都見到不同嘅 Iron Man 面具、機械配件等等，不過果啲都好普通，只能夠就咁戴係頭度，玩味唔夠。但係我今次睇到呢個就唔同喇，除咗外表做得極像真之外，佢個面具仲識得自動掀開，非常型格。同場仲加映 IronMan 左手盔甲，都係極具玩味，至於點解係左手？睇埋落去就知架喇。
主要用磁石做開關
當然，既然係玩味重，咁當然我哋要即刻試戴啦！點解佢會識得自己開關呢？原來個玄機在於磁石！面具右側有個感應位置，只要有磁石係側邊貼近，就會啟動佢開關，控制到面具嘅開合。面具方面分開 Mark 3 同 Mark 42 兩個型號，想買邊個真係完全睇個人喜好。
▲ 店主 Thomas 有賣兩款頭盔：Mark 3 同 Mark 42，相信要係資深戲迷先睇得出分別
▲ 頭盔合埋時係發光嘅！呢款係 Mark 3 頭盔
▲ 內籠係咁樣嘅！
「鐳射燈射到對面海都一樣睇到」
隻手都好像真，開合發炮位置幾可亂真，不過就無炮彈嘅。多咗個功能就係有一盞綠色嘅鐳射燈，店主 Thomas 話，盞燈可以射到對面海都睇到果一點，而我喺現場實試就由走廊頭射到去走廊尾都見到，至於係唔係真係射去對面海都見到呢？呢個就未知住。至於點解得左手而無右手？Thomas 就話喇，其實按照劇情，電影入面能夠隨時穿戴果隻都係左手嚟嘅，有細心留意 Iron Man 嘅朋友就知道喇！
▲ 炮彈位置可以彈起！不過前方有一盞綠色嘅鐳射燈，可以射到對面海都睇到！
▲ 你唔好以為要做到 Thomas 咁樣好容易，佢話，初上手都要練 4 – 5 個鐘先可以玩熟點樣操控，雖然佢得兩個大功能：著燈、同埋開合炮彈發射位。要戴上黑色手套，睇落就唔會話肉色咁唔真實。
▲ 掌心都識得發光，仲有幾級嘅光度可調較兼可發聲，做到戲入面「儲氣」果種氣勢。
入貨全因為供應商搵佢
Thomas 話，其實係供應商搵佢賣先嘅，因為見到佢熱愛玩具，又鍾意成日自己玩埋一份同一分享，所以就搵佢幫手賣。而對於 1:1 玩具，Thomas 都話其實有好大嘅互動性，你穿戴咗呢啲玩具上身，你會覺得自己成為咗個角色嘅一部份。
咁，間供應商又係邊間呢？Thomas 又無講喎，佢只係話，「係一啲細廠自己嘅出品，同埋玩玩具到底係追求質素定追求牌子呢？」嗯，你又啱嘅，好玩咪得囉，佢邊間廠邊個牌子又真係唔係影響太大。
後感：著出街玩一定型到爆！
我就覺得喇，假如我地能夠著住呢套衫出街玩，其實都咪話唔型。尤其係當其他人都唔知你個面具原來可以自動掀起，果一下你就好似一個真嘅 IronMan 咁。不過，夏天就唔好咁試，因為真係好熱，你應該未玩個頭已經濕晒。
相關影片:
