以前想玩紋身，但又唔使痛 / 之後後悔，通常就係買啲印水紙過下癮就算。而家科技進步，AR(Augmented Reality 擴增實境)又再次流行起嚟，而家有個手機 App 就係用呢個原理去令大家有得無痛「紋身」。
呢隻 App 名為 Ink Hunter，不過暫時「歧視」Android 同 Windows 用家，得 iOS 版本。佢嘅原理就係用 AR 技術，將你想紋嘅圖案，投射返落去幅相度，令你喺唔同角度都能夠睇到自己嘅紋身圖案係咩嘢樣。
Ink Hunter 雖然免費，但係功能都唔少。首先係可以自行匯入圖案，唔使受內置圖案限制，更有個性。不過佢嘅內置圖案庫都唔少，有啲貪新鮮想「紋身」呃 like 嘅人，都可以用個 App 睇定先，再決定紋唔紋啦。
▲首先，你要繪畫一個標記，等佢識別喺果個位置做AR，所以唔好以為我係化緊妝…
▲佢內置花紋類嘅圖案會比較似真．紋身，起碼會細緻啲。
▲ 你有創意嘅，可以自行整一啲圖案再放入 App 內，就可以獨特啲喇。
我知道一定有 wire 民覺得某啲部位就算無得紋，都可以試下掛。喂阿哥，呢個係科技網嚟架，我哋梗係為你試返科技嘢啦。如果你想「紋」嘅地方係手肘，咁佢就未必做到 preview 個效果，可能因為個記號太難認。
我試過畫咗兩個「標記」出嚟，但係佢就唔能夠兩個同時 Preview，始終未能做到雙重 Preview。不過人地免費嘅，我又無謂要求咁多啦。
▲如果遇到有兩個標記嘅話，佢就只能追蹤其中一個。
即使你決定影落去，發覺唔啱心水，其實仍然可以改嘅。因為佢係 App 嚟架嘛，而且仲有好多後製嘅工具，就算影出嚟呃唔到人，執一執都呃到下人。
▲佢內置有好多功能，對比度、光暗、模糊等功能應有盡有，而且你亦可以將圖案變換，不過當然效果無咁好。
始終 AR 技術喺手機都算係起步階段，所以我都係以玩下嘅心態出發，單單要畫個標記俾自己已經夠晒有玩味。想佢個 AR 再做得好啲，就可能搵人幫手揸機，咁樣就會有多啲角度變化，可以影到。