就算《妖怪手錶》係香港都播咗差唔多成年，地縛喵係小朋友界依然大熱。為答謝粉絲的支持，地縛喵決定帶同過百款日本直送的《妖怪手錶》精品，親身嚟到 MOKO 新世紀廣場同粉絲見面。今日我依莉詩就去咗同佢一齊跳妖怪操！
精品小朋友用品具多
其實《妖怪手錶》限定 POP-UP STORE 上年 5月係 NAMCO 都搞過，當時未必個個都知地縛喵係乜，但已經吸引了唔少粉絲。而今次的限定店位於 L3樓層，店面面積比上次細，不過都有過百款日本直送的精品，包括多款妖怪公仔、文具精品，以及床上用品，而當中大部份都針對小朋友設計，鍾意地縛喵的少女們就未必揀得啱了。
▲ 店面面積比上次細，不過都有過百款日本直送的精品售賣。
▲ 當中不乏床單、被袋，等小朋友進入《妖怪手錶》的世界。
▲ 聽講呢個書包係最新的款式，孭番學一定好威威。
▲ 呢套文具套裝今次特價發售，只係 $98 咋。買定做開學文具吧！
▲ 碗同杯都有特價，分別只需 $69 同 $39，機會難得。
▲ 另外仲有威斯帕大毛毛公仔同多個角色的公仔賣啊！
▲ 呵呵！我用咗半個鐘終於砌好地縛喵立體砌圖，原來一 D 都唔易砌架！
妖怪手錶迷你影相區
平時商場影相位都會係中庭，不過今次個影相位就係 L4 樓層，而且非常細，只有一隻迷你的立體地縛喵，而哥瑪先生、哥瑪次郎都係紙板，吸引力不算高。唯一可取的就是粉絲見面會唔需要係商場消費，只要係 4月10日、17日、24日及 5月1日 (逢星期日) 到呢度排隊就可以同地縛喵影相。
▲ 中間的地縛喵非常細粒。
▲旁邊的哥瑪次郎都是紙板。
▲ 如果哥瑪先生係立體應該好受歡迎。
依莉詩：「蚊型 Pop-up 吸小粉絲」
復活節同暑假中間來本都唔期望有咩大型展覽，今次呢個《妖怪手錶》展覽亦可以用蚊型來形容，只有迷你 Pop-up Store 同 迷你影相位，唯一可取就係無需消費都可以同地縛喵合照，相信都可以滿足到小粉絲嘅。
MOKO-妖怪手錶 不可思議大作戰
日期：即日起至 2016年5月2日 (中午12至下午10時)
地點：L3樓層及L4樓層
分享到 :
最新影片
