唐言無忌：串流睇《十年》

影碟店執完一間又一間，要在屋企附近街坊小店買 DVD、BluRay 真的不容易；很多人睇戲煲劇都轉向串流平台。不計非法的 Apps 或網站渠道，合法的串流平台如樂視、Netflix 一類，都提供了不少影視選擇，這也是租金高企以外，社區的影碟店買少見少的原因之一。

影碟店沒有人幫襯，執笠是必然的結果；朋友 T 偏偏不明箇中道理，早前打鑼問哪裡有影碟店，因為有小朋友突然要去屋企小住兩天，想買卡通片服侍幾歲的豆丁。虧朋友 T 經常玩手機平板，偏偏忘記了 Apple 和 Google 都有提供購買或租賃的服務，無論在手機、平板，還是電腦、電視盒子上觀看都可以。得到點醒，朋友 T 在豆丁小住期間，在 Google Play 租了《功夫熊貓》，小朋友對於可以在 Google 的龐大片庫中慢慢揀似乎非常滿意。

如果你也想試試 Google Play 租戲睇，由今日起金像獎最佳電影《十年》會登陸 Google Play（只限香港地區），無論未睇過還是想重溫，只要登入 Google 帳號就可以租或購買。對於不方便出面撲飛，入戲院觀摩這齣「最佳電影」的黃百鳴、林建岳、林小明、洪祖星、馬逢國等人可算是一個好消息，用手機匿埋在屋企廁所偷偷睇都無問題。