成日聽人講話化解食物危機的方法就係食蟲，咦～ 我唔食架！原來除咗蟲，植物蛋都係一條出路。今日美國食品科技公司 Hampton Creek 就嚟香港搞咗個發佈會，仲炮製出一系列植物蛋批、蛋糕、曲奇、意粉等美食。就等我依莉詩試下係咪有蛋味先？
植物蛋白取代雞蛋
去到現場，我第一時間更係去搵「植物蛋」的真身，點知現場只有一埋成品，搵唔到一隻「植物蛋」。原來「植物蛋」的意思係從豌豆、高粱和其它十幾種植物中抽取蛋白搭配成原材料，並取代蛋的功能，提供不含膽固醇，更健康，更經濟的食品。因為非基因改造，又唔係假蛋，所以「植物蛋」並唔係蛋樣！睇嚟我諗多咗！
對蛋敏感都食得的蛋糕
正因為植物蛋並無蛋的成份，所以對蛋敏感的人都可以安心食用，而 Hampton Creek 暫時係美國生產了 48 款植物蛋食品，例如 Just Mayo系列蛋黃醬、Cookie Dough 曲奇麪糰 同 Pancake Batter 麪糊等，將會係今年內進進軍香港市場。到時對蛋敏感的人都可以食蛋糕、曲奇啦！
▲唔講唔知，眼前的蛋糕係無蛋的成份啊！
▲食落去同平時的布朗尼無咩分別，口感同味道都一樣。
唔怕膽固醇放心食
雖然話雞蛋好有營養，但衰在有膽固醇唔食得多，而植物蛋既有蛋白質又無膽固醇，好岩鍾意健康或者素食人士。不過咁講，眼見暫時推出的都係甜品類的預拌粉同醬汁，就算無蛋，糖、牛油等的份量都唔少，食得多都係唔太好吧！
▲ Cookie Dough 曲奇麪糰可以就咁食或者焗成曲奇，不過都幾甜下。
▲曲奇食落有 D 似 Subway 出品，非常飽肚。
植物蛋黃醬得百佳有得賣
講左咁耐，香港暫時只有其中 3款（原味、辣味、蒜味） Just Mayo 蛋黃醬賣，仲要只得百佳同 Great Food Hall 先有得賣。點解一定係百佳呢？知未係李嘉誠有份豪擲投資 Hampton Creek 研發植物蛋囉！李氏力牆真係唔緊單，除左颱風，連將來糧食問題都可以解決埋。
▲植物蛋黃醬可以放入不同食物，代取蛋黃醬調味。
▲唔講其實唔知邊 D 用左植物蛋呢！
依莉詩：「又真係有蛋的口感！」
一聽到「植物蛋」開始真係驚驚地，以為係咩基因突變的物種，好彩只係係植物提取的蛋白質，可以放心食。試食佢地的成品，其實唔講仲以為係普通記招的小食，有蛋的口感，有蛋的味道。不過唔係蛋樣又有少少失望咁姐！
▲講到最似蛋我諗都係呢個豬柳強走豬柳，食落果然有蛋的口感，不過味道就比較重豆味。
▲ 呢個蛋撻睇落都似模似樣架，而食落煙肉味比較重，無乜蛋味。
Leave a Comment