近期好興玩航拍機，近呢一兩年都愈見愈多唔同嘅航拍機出現，就連我有時去行山都成日見到有人玩航拍機。所以，我決定一係就唔玩，一玩就梗係玩最新出嘅航拍機。講嘅係 DJI 出品嘅 Phantom 4，Phantom 系列相信好多人都聽過，包括筆者我，但莫講話航拍機，遙控機我都未玩過。今日同點點就嚟到數碼港呢個好空曠嘅地方試玩喇。
講下啲基本資料先，Phantom 4 今次只係得一個型號，唔似上代 Phantom 3 分開 3 個型號，佢仲增加咗啲功能。第一個叫做 Active Track，即係佢追蹤住一個指定嘅目標影；第二個就叫做 Tap Play，即係你係個手機度點果個位就飛去果個位；第三個就係佢識得自動避障，亦係最西利嘅一個功能！我一陣就會試下玩架喇！
急不及待開箱睇
▲一去到我就急不及待開箱啦，因為我上網睇過話今次個盒係好方便大家帶出去架。勁似人地攝影師果啲搵食架生！
▲開咗盒就係咁嘅樣，啲螺旋槳未裝上去嘅，個遙控器比我想像中大。
▲要組裝嘅零件其實唔多，電池可以拆出嚟換，螺旋槳原來有啲方法裝：佢有分逆時針定順時針轉，目的係為咗轉幾大力都唔甩 (好似係)，我以為好複雜，原來兩三下手勢搞掂。
▲遙控駁住個手機，有啲咩功能都可以喺個 App 度搞。
▲個遙控器拎上手唔算重，連點點咁細粒嘅女仔拎上手都話 ok，我就覺得部機大概一本英漢字典咁重，我諗航拍機始終有少少重量好啲。
▲我決定趁佢齊齊整整嘅時候同佢影返張正常啲嘅相，以免一陣撞機唔識降落。
試玩場地大風 嚇得我騰騰震
▲由於我係新手嘅關係，要由型仔又有經驗嘅 Benny 指導一下點樣操作 Phantom 4。
▲點點又走埋嚟偷聽。
▲好，真係試飛！Benny 話航拍機同真飛機一樣，起飛同降落嘅時候都係最易出事，所以我面形都扭曲埋。
▲成功起飛！但海邊好大風，不過佢識得自動回復定位，我唔使操控佢都可以 Hold 住，可以俾我慢慢摸索點玩。
▲我都飛得唔差！
▲係咪發覺唔見咗架機呢？因為我飛咗佢出海，但係呢部機原來有弱點！就係佢係完全唔防水，雨水都唔防，即係 跌落海 落雨就 GG。同埋行緊果啲船都好易干擾。
▲跟住我試下佢個 Active Track 功能，我一路跑住咁去，直線跑佢就跟到，我開心跳起 BBQ 大結局都跟到，但係我一個轉身射個三家姐佢就跟甩咗喇… (影片後補)
▲到咗聲稱連遙控車都未玩過嘅點點：佢個樣話咗俾你知，佢好緊張，事關一到佢玩就好大風，起飛果下側咗一側，嚇到佢心都離一離呀.jpg！
▲跟手點點又試下呢個 Tap Fly 功能，呢張 Cap 圖姐，佢無真係飛到咁遠，我都驚佢無電…
▲但係點點之後又飛得幾好，佢夠膽郁得好快。
▲點點你做乜飛到咁遠…雖則我好眼力。但我離太遠都難以分辨前後，習慣都倒轉了…唱完歌。Benny 話，其實最好起飛時，架機尾要向住自己，咁佢移動就會按返你隻手郁嘅方向移動。係咪好複雜呢？其實即係你同個機望向同一個方向囉…
▲其實離遠睇，有時真係會睇唔到啲部機去咗邊，所以要靠部電話個鏡頭睇下自己飛到去邊。
▲飛到咁上下，準備降落喇！點點你降落得都好穩定！Perfect 池！
試玩後感：
水哥 – 如果有得揀用 Wi-Fi 定線去駁手機就更加好！
因為佢要用嚟錄影，其實無可避免要駁去手機，Phantom 3 就用 Wi-Fi 連接，但係 Phantom 4 只能夠用線駁住，但係兩者都無得俾人揀用邊個方式連手機，就有少少遺憾，應該有得比人揀架先係！
不過其他技術方面都好好玩，尤其佢個 Active Track 功能好似 Lily 果隻功能，用嚟影自己嘅活動都唔錯。
點點 – 識得自己停唔驚撞牆！
點點就話：「個遙控我覺得唔重手，拎上手都好舒服，不過拎得耐就唔知。雖然個控制桿好敏感，但係佢識得自己停係固定位置，咁我下一步想做乜就可以諗一諗先。同埋都容易上手嘅，兩支操控桿用法好簡單，一次就記得！」
是日 unwire TV 直播影片重溫
嗚謝 : OnTheGo 35860842
詳情：
上官網睇
相關影片:
Leave a Comment