最近數碼港喺中環舉行咗一場 Pitching Day，為一班 Startup「新鮮人」提供一嚐企喺台向近百人展示自己構思同埋說服投資者注資嘅機會。當日除咗有數碼港培育計劃成員，亦有數碼港創意微型基金嘅受助者同埋其他初創企業家參加，總共 10 間公司齊齊 Pitching 向投資者展示自己產品嘅潛力。
參加者來自不同領域
今次參賽嘅 10 間 Startup 分別嚟自數碼港創意數碼社區成員，好似「數碼港創意微型基金」、「數碼港培育計劃」、數碼港 Smart-Space 公司呀咁，而且佢地嘅業務更加覆蓋 FinTech、Smart Wear、O2O、物聯網、共享經濟及健康評估等唔同範疇。
評審陣容強勁
Pitching Day 邀請咗三位來自不同投資機構嘅負責人擔任評審團，佢哋分別係 Big Bloom Investment 嘅行政總裁兼聯合創辦人 Kyle Lam、Fundnel行政總裁兼聯合創辦人 Sam Ng 同埋 Fast LP 合伙人 Simon Kim。
三位評審喺 10 間公司輪流進行 3 分鐘 Pitching 之後向參加者逐一提問，等各個 Startup 負責人可以更清晰咁表達自己產品嘅優勢、商業模式同埋團隊能力。
優勝隊伍方案多元化
喺呢 10 間 Startup 輪流進行 Pitching 後，最後由研發偵測學童心理障礙嘅 LULIO、可以將普通電器「升呢」為智能電器嘅 Team Concepts 同埋研發智能手機匯款嘅 Yintran 獲得評審賞識成為當日嘅優勝者。
其他參加咗呢次 Pitching 嘅仲有研發文件加密簽署嘅 Authpaper、製作智能恆溫衣服嘅 Sport Sensing Asia、開發智能車位搜尋系統嘅 TingPark 等等公司，產品同業務範疇都非常多元化（小編對佢地嘅產品表示熱切期待）！當日完成 Pitching 後，各個隊伍仲同投資者、業界人士仲有特登嚟取經嘅創業家交流添，氣氛相當熱鬧呀！
其他參加者意見
AuthPaper 創辦人 Solon Li 覺得呢次 Pitching Day 係一次好好嘅機會展示新產品，聽取過評審意見之後更加了解到從投資者角度嚟講佢哋所關心嘅並唔係自己一直以為最重要嘅技術同埋應用層面問題，而係創辦人點樣評估自己公司同埋點賺錢，籌募、分配資金方面嘅理據等等，自己之前從來冇諗過呢方面嘅問題，下次再做 Pitching 時一定會針對呢 D 方面改善。
TingPark 創辦人 Jason 指出今次參加 Pitching 隊伍質素好高，而且嚟自唔同行業包括硬件開發公司，相比以往 Software 主導嘅本地 Startup 好唔同。Jason 認為，要喺 3 分鐘之內介紹公司時間比較趕，如果 Q & A 環節可以延長少少就會更加理想。佢發現現場觀眾嚟自四方八面，除咗投資者同其他 Pitching Team 之外，仲有唔少嚟「學野」嘅 Startup 公司，見到咁多人支持香港 Startup 絕對係一件好事。
Palapal 行政總裁 Andy 話今次 Pitching Day 環境同氣氛比較輕鬆，有助喺台上面嘅發揮，亦係一次好難得嘅機會同其他 Startup 進行交流。評審團比到嘅建議相當有用，可以幫助 Palapal 更有效計劃公司未來嘅發展方向。經過今次 Pitching 之後，Andy 話會喺下次 Pitching 時修改 Fundraising 方面嘅細節，因為喺較短時間籌集較少資金對於投資者嚟講會顯得比較吸引。
