之前我們都報導過 Casio 發佈了他們第一款 Android Wear 智能手錶 WSD-F10，雖然未有挾著 G-Shock / Baby-G 嘜頭，但單係「智能錶」呢三個字都已經夠「照」。但究竟上手用落係點？Edward 就即時從水貨舖入手，究竟 $4,780 買隻智能錶值唔值？以下 Edward 就同各位 wire 民分享一下。
WSD-F10 開箱直擊
這款 F10 智能手錶，香港 CASIO 仍然未引入行貨，暫時只有少部分國家已推出，而且主力只是在網上發售，所以抵港的貨源都唔多，今次 Edward 入手的正是日版，現在就先為 unwire.hk 讀者們帶來開箱直擊啦！
▲到手了！開箱吧！
▲翻睇盒背，已經見到 Made in Japan 幾個極吸引的字。
▲一打開盒就在左邊見到隻 CASIO WSD-F10 了！而右邊主要是介紹它有什麼功能。
▲再向下睇，就見到一包嘢同埋一個白盒。
▲「一包嘢」內自然是說明書啦。
▲另外白盒內的就是火牛及充電線。
▲火牛是 1A 電源輸出的，足夠為手錶充電。
▲拿起隻錶，unwire.hk 讀者可以見到是紅色設計，Edward 幾鍾意。
▲上面印有大大隻字 CASIO。
▲撕開包裝貼紙。
▲完成開箱了！
▲錶身右側有 3 粒制，分別是 TOOL（工具）、開關制及 APP（程式）。
▲而左邊就是充電頭及環境感應器所在位置。
▲充電線是採用磁吸式，一吸就可充電，而且都算 OK 實，唔 fing 就咁吊住的話是不會甩的。
▲另外店家亦入手了黑色版本，但Edward 就比較偏好「紅黑紅紅黑」的版本（當然橙色是最靚可惜店家無入貨）。
▲開電源了！可以先後見到 CASIO 同埋 Android Wear 大大隻字。
▲開始設定。
▲有中文介面，仲要係香港，正！
▲然後與筆者的 Samsung GALAXY S7 edge 配對（當然要事先在手機下載 Android Wear 的 APP 啦）。
▲之後手錶會與手機進行同步。
▲等待的時候，手機一邊會要求用家允許 Android Wear 讀取你的通知、個人資訊等，按下確定就可以了。
▲另外，如果不想手錶與手機在休眠時斷開連線，可以開啟這項功能，不過會比較耗手錶的電就是了。
▲此時手錶應該已出現此畫面。
▲在手機的 Android Wear 就可以見到此畫面，就代表設定成功了！
▲值得一提的是，手錶啟動後應該已接收到第一個系統更新，筆者建議各位 unwire.hk 讀者可以更新，應該是無伏的（不過最好接駁著火牛才進行更新）。
手工幾好錶面勁大！
其實之前有唔少品牌都推出過智能手錶，不過如果講靚仔同有型始終唔多，而 CASIO 一向都有推出運動型手錶，今次推出的 WSD-F10，Edward 戴上手第一感覺：錶面勁大！事實上，它擁有 1.32 吋的特大錶面，視覺上確實好震撼，尤其是對於喜歡行山的人來講，大錶面可以容易睇得清楚資料，實用性都好高。另外，錶帶相比 G-Shock 系列來講，似乎無咁硬，柔軟度較高，戴上手雖然比較大隻，但都幾舒服，而且都唔算太重（對男士而言）。但對於女士，尤其是手臂較幼的人來說，就可能會感到太重了。不過如果講到設計，Edward 就覺得缺少了 G-Shock / Baby-G 系列那種「潮」味，如果平常用來襯衫，似乎只是一般。
▲F10 錶面真係好大！睇字都幾清楚。
▲與同事的 Samsung Gear 2 比較，就可以見到 CASIO F10 錶面大到有幾誇張。
▲再拿部 iPhone 6s Plus 的機背來比，仍然覺得好大。
▲值得留意的是，F10 是不能這樣平放在檯面的。
MIJ 值回票價？
可能有些 wire 民會話：嘩！成差唔多 5K 買隻智能錶，會唔會太貴呀？Edward 可以同各位 unwire.hk 讀者講：其他品牌筆者可能會嗌貴，但呢隻 CASIO 筆者覺得都算合理。首先，它是 MIJ（Made in Japan；日本製造），單是這一點已值一千幾百了吧？其次它的耐用程度確實很高，不但符合美國軍用級水平，擁有高防跌、防撞、防震、甚至可在不同極端環境下使用。此外，在防水上它不只是生活防水那麼簡單，而是可以戴著潛入水深最多 50 米的地方使用，對於喜歡玩潛水的用家來講，應該會幾 like！加上它內建了不少感應器，包括：高度計、指南針、氣壓計等，還可顯示日出日落以及潮汐漲退時間，這對於喜歡行山的 wire 民來講，應該是最體貼合用的隨身裝置。
▲MIJ 日本製造，相信是不少 wire 民心目中的質量保證！
▲F10 擁有防水功能，可以最深在 50 米水深內使用，平時用水龍頭沖水或者落雨個時用就更加無問題啦。
為運動愛好者而生！
正如筆者所言，CASIO 這款 WSD-F10 是為運動愛好者而存在，不只因為它設有多種感應器，而且還有不同的模式供大家選擇：單是運動模式來說，已有 3 種選擇：遠足、釣魚及踏單車，此外亦有不同的顯示方法，可以將多項資料顯示在同一個錶面上，令大家不用按來按去，一舉起手已經可以看到想睇的資料。加上前文提及的防水、軍用級耐度功能等，如果你是運動家或者行山愛好者，應該會覺得好好用。
▲按下 TOOL 鍵可以看到幾個模式：指南針、高度及氣壓。
▲另外如果下載了 CASIO MOMENT SETTER+ APP，還可以看到幾個綜合資料顯示介面，可以同一時間看到潮汐漲退及日出日落的時間。
▲筆者指攝了轉換顯示模式的影片，大家可以看到操作上十分暢順，動畫亦頗吸引。
▲不過要留意的是，在香港 Play Store 暫時不能下載，要下載就只能在網上找到 apk 再手動安裝（下載連結可按此）。
▲安裝後同樣會要求用家允許權限。
▲進入後大家可以自行設定喜歡的錶面設計，以及錶面上顯示的內容。
▲按鍵功能亦可自設，例如：APP 按鍵預設是顯示天氣。
▲出來的效果就是這樣。
▲但大家可以改做其他功能，例如：筆者就比較喜歡用來啟動不同的運動模式。
▲改動後，就可以叫出行山、釣魚及踏單車 3 個運動模式。
▲預備好後，點按 Start 就開始記錄，值得一提的是筆者覺得都算幾準，我開始了踏單車模式，然後在辦公室走來走去，但感應器知道我不是在踏單車，所以未有開始記錄，等了一會還關閉了此模式，可見它記錄的數據應該會比用手機內感應器記錄更準確！
▲另外，在這個 APP 內還可設定多項細項，例如：到達指定高度時自動顯示所在位置的高度，又或者感應到停止時自動顯示所在位置的高度，十分有趣。
特有省電功能正常使用兩日充一次電
既然為運動愛好者而設，相信大家都好關心電量。CASIO WSD-F10 的熒幕雖然大，但就設有雙層熒幕設計：設有黑白熒幕層及彩色熒幕層，前者用來顯示日期及時間，而後者就用來顯示較漂亮或顯示資料較多的錶面，又或者其他提示、短訊及目錄等。如果單純用黑白熒幕層顯示日期時間，不但在大太陽照射下都可以睇得到熒幕顯示，而且使用時間可增至 1 個月，但大前提是沒有接駁任何智能手機！至於一般情況下，根據官方資料表示，如只使用彩色熒幕層，使用時間仍最少有 1 日；如混合使用彩色及黑白熒幕層，就可增至最少 2.5 日；如單純用黑色熒幕層（即是影院模式），更可增至最少 3.5 日！這個使用時間，以 Android Wear 智能手錶來說，確實是不錯了！
▲F10 錶面是大，但其實在 Android Wear 智能手錶來講都算省電。
▲想再慳電啲，佢有款叫做「2Layers」的錶面，可以用黑白 mode 顯示時間日期，最長可以用足一個月先要充電（官方資料）！
▲不過錶面就只係得黑底白字同埋白底黑字揀，筆者覺得黑底白字睇落舒服啲。
▲效果就係咁，其實都好清楚！
▲不過佢嘅彩色熒幕層仍然是可以啟動的，只要按一下開關制就可以變番彩色跳字鐘，長按就可以叫出 Android Wear 目錄。
會唔會太大？男同事：正！女同事：咪搞！
其實 CASIO WSD-F10 望上去，正如 Edward 前文所言，第一個感覺就是：好大（個錶面）！但大家都知道，大唔大確實是因人而異，男、女用家亦各有不同意見。筆者就訪問了 2 位 unwire 男同事及 2 位 unwire 女同事，看看他們又覺得如何？
duncan：差電位似甩咗粒制
我覺得戴上手佢錶帶比我戴住隻 G-Shock 軟，感覺舒服。另外熒幕方面，係有少少大但男士來講可接受，而熒幕亮度方面，如果唔著睇落好舒服，著咗反而太光。設計方面，我覺得還好，但差電位做得太差，感覺好似甩咗粒制咁！至於氣壓計、高度計個啲，其實我比較少行山，最多都係跑步，好多功能都用唔著，最多都係用距離、速度個啲功能，用成差唔多 5K 去買覺得唔太值。
Aqua：錶面大睇得舒服
我一向鍾意行山，錶面大幾 like，睇得清楚又舒服。另外好多錶個鉸位都會頂住前臂同手掌交界個舊細骨，但 F10 就無呢個情況，戴上手幾舒服同平滑。
功能方面，指南針同高度計幾有用，可以知道行到幾高，仲有幾耐先到山頂；而指南針一郁就睇到方向，幾方便。至於氣壓計，係香港最高我行嘅山都係海拔 900 幾米的大帽山，無乜用，如果去到外國行海拔 4 千米以上的高山，先至用得著。但 F10 始終太貴啦，成 5k，唔捨得買。
Bowl：唔靚！唔會買！
我嘅評語好簡單：好大隻！好核突！唔會買，完！
妍嫣：太大啦！唔會考慮！
隻錶唔算太重，感覺幾好。但個錶面太大啦，個直徑同我手臂粗度差唔多，我扣都要扣到最入個格先至戴到，如果手臂再幼啲嘅女士根本唔洗戴！
另外佢有咁多 sensor，但偏偏無咗心跳偵測，好失敗囉！其實我戴錶主要都係睇時間，所以用開都係簡潔為主，呢款一來太貴，二來太多功能，好多都用唔著，始終我唔係專業運動員，投資幾千蚊買隻錶，唔值囉！
Edward 總結：錶面太大！運動員向！
測試了半日， Edward 確實有少少後悔入了手 CASIO WSD-F10。作為曾經是 G-Shock 支持者的我，戴上 F10 呢款錶，感覺真係太大，就算筆者是男士用家，雖然隻錶唔算重，仍然覺得「撐」唔起，好 bulky！至於功能方面，筆者平時都鍾意行山，但佢嘅功能感覺太專業了，我又未去到要挑戰喜馬拉雅山或者少女峰巔峰個種專業行山者，所以感覺與同事們一樣，要投資成近 5K 去隻錶度，真係好唔捨得。試完之後，筆者還是「乖乖地」去買番隻 G-Shock 算了，有讀者會肯接手嗎？LoL
售價：$4,780
查詢：L&T（ 2396 4488）
相關影片:
Leave a Comment