無線路由器基本上每個人屋企點都會有一隻，現時新推出的手機或平板，更可以支援更快的 802.11ac 制式，就算串流高清影片或下載大檔案都更快，唔洗再專登搵返條 LAN 線。市面上可以選擇的 ac 路由器售價都接近 HK$1,000 或更貴，如果同大家講只要人仔 149 就可以買到 ac 路由器，大家又有冇興趣？
又再以本傷人
小米一直以來所推出的產品例如小米手機都是以「性價比」作為賣點，而之前他們都有推出過多款路由器，好似小米 mini 等等。今日，小米就正式發布了全新 ac 級路由器「小米路由器 3」，先唔講佢接收能力和速度如何，但以人仔 149 推出，加上外型又真係好簡潔同好薄，4 月 6 日開始發售，各位有興趣的 wire 民請做好準備，因為相信又會引起一輪搶購熱潮。
1167Mbps 速度
以往揀路由器都可能以價錢行先，始終屋企條 LAN 線上網速度就唔快，但今時今日，唔少人都用緊 500M 甚至是 1000M，小米路由器 3 就宣稱擁有最高 1167Mbps 速度，加上 4 條天線設計，其中 2.4GHz 天線強度為 5dBi ，而 5GHz 天線更達到 6dBi，但相信用家未必可以自行更換天線。運作模式上，2.4GHz 同 5GHz 可同時運作，與現時大多數中高階 ac 路由器相似，天線最多可作 90 度旋轉，可以更有效設定成最佳使用環境以提升速度和穩定性。
唔止路由器咁簡單？
從現有資料來睇，小米路由器 3 仲內建 128MB ROM，仲話可以支援插件安裝，而且 Apps 仲支援遠端運作，莫非小米路由器 3 仲可以有類似而家部份路由器所提供簡單的 NAS 功能？從官網介紹來看，用家只要透過手機 Apps，就可以即時知道路由器運作情況，例如已連接的裝置、上過的網站與、連接時間和家長監控功能等等。除此之外，路由器系統更有一個 Apps 工具箱，當中包含了網頁加速、廣告攔截、一鍵 WiFi 加速等多達 10 種以上的額外功能。不過有一點是注意是，從外表上睇小米路由器 3 薄就相當薄，可能會直接影響到散熱效果，始終路由器都是 24 x 7 無間斷開啟，加上多人同時連接使用，萬一過熱便會影響到穩定性甚至造成意外。
七重安全保護
唔少人都可能會覺得現時上網越來越危險，隨時有機會被人 Hack 入盜取個人資料，小米路由器 3 更特別強調當中的安全性，包括防破解、防泄漏、防病毒、防惡意網站和防欺詐等，不過有關功能都是由百度安全所提供，信唔信得過就留返俾各位 wire 民自行判斷。
分享到 :
最新影片
