依莉詩 :「清潔力無想像中咁勁」— 蒸氣潔淨機評測

2016-03-29

話說依莉詩成日係街市見到 D 蒸氣噴槍講到又可以消毒又可以去除污穢，一機多用好神奇咁，於是就借咗部 Smart Steam 多功能蒸氣潔淨機番嚟試下，睇下係咪真係咁勁先！

機身纖巧容易操作

呢部蒸氣潔淨機用法好似手提式蒸氣熨斗，利用噴出的高溫蒸氣將污穢溶解同進行消毒，更配有多個噴咀，以清潔衣物、瓷磚、地氈、玻璃等物件，變得更多用途。因為係手提式設計，為方便操作，潔淨機所配備的可拆式水缸只有 300毫升，不過我用了 15分鐘左右仍然有一半水，所以都好夠用。至於高溫蒸氣其實有一定危險性，如果唔小心掂到皮膚有機會熨傷，幸好潔淨機的開關同出蒸氣掣係分開，加上佢唔算太重，單手都可以輕鬆操控，咁就更加安全。

▲ 潔淨機附有 7個配件，可以配合不同清潔需要，無論衣物、瓷磚、地氈、玻璃，甚至廁所都用等。

▲ 300毫升水缸可以輕易可拆，方便隨時加水，而且潔淨機有缺水自動關機設計，確保安全。

▲ 開始潔淨機後等 30秒左右就會由紅燈轉成藍燈，代表已經預熱完成，可以輸出蒸氣。

高溫蒸氣瞬間消毒

潔淨機可以持續發出 10-15分鐘蒸氣，係無須使用化學劑的情況下潔淨殺菌，而我就用咗 Unwire 元老「西蘭花小姐」做測試，發覺拖過蒸氣的西蘭花小姐濕咗之外，乾咗之後無咗陣味，仲白淨咗添，

▲ 西蘭花小姐比我地玩得多，又唔會點洗，結果就搞到又鹹又臭，係時候用佢洗白白。

▲ 用潔淨機的蒸氣拖完之後即刻乾淨咗，又可以放心繼續同西蘭花小姐玩遊戲了。

蒸氣壓力清潔隙縫

另外，潔淨機每一下發出的蒸氣壓力達 1bar，能夠溶解污穢，清潔瓷磚、廁所等隙縫間的污穢。起初我以為會似街邊洗地的高壓噴槍咁，不過試完之後發覺並無我想像中咁利害，只有一些新整的水積可以清理，至於一些頑固的污穢仍然處理唔到，而且用蒸氣拖過的地方會有好多水，需要再用毛巾抹乾，感覺上除了用少了化學劑之外，係清潔的步驟上同平時分別不大。

▲ 接駁長毛刷頭就可以清潔隙縫，溶解污穢。

▲ 利用長喉管加上 L咀就可以輕鬆清潔廁所邊位。