依莉詩 :「如果 OCR 準確 D 就好」— PocketScan 手提掃描機評測

2016-03-16

Published by

依莉詩

以前做功課覺得手頭上的資料一掃就入到電腦就好了，原來已經不是夢。最近我依莉詩發現呢部手提掃描機，不單可以隨身掃描文件，仲會即時將文件轉化成文字。聽落咁勁，就一於試下先！

嬌滴滴隨身攜帶

呢部手提掃描機之前係 Kickstarter 集資成功，最近係香港都有得賣了。PocketScan 只有 85g，外形好似一部釘書機，唔算太大，握上手好易操縱。而充電一次可以掃描近 400 次，拎出街用都得，隨手掃描 past paper 同 notes，非常方便。

▲ PocketScan 同釘書機差唔多大，單手都可以揸實。

▲ 掃描的地方係下方，掃描的時候會發出白光，感覺好似光學脫毛機的燈頭。

▲ 用 USB 充電，充一次電可以用 400次左右，方便隨身攜帶。

▲ 隨機附送布袋同抹巾，等你拎出街都唔怕整花。

掃瞄相片唔怕反光

雖然依家想 send 文件俾人，影張相就得，不過影相始終要顧及環境光照過強或過弱，如果係光面的紙仲有可以反光。而用 PocketScan 就唔怕有呢個問題，只要係平面的地方，就可以即時張相片或者文件掃描成 400dpi 的圖片。

▲ 平時翻拍即影即有都會有反光位，用 PocketScan 就唔怕了。

▲ 雖然掃描檔同原相都有 D 色差同輪廓無咁明顯，不過整體上效果都唔錯。

翻譯易變亂碼

除此之外，掃描檔可以儲存成 JPEG、TXT、PDF 同 Word 檔，方便即時 send 俾比其他人，而且

仲有 OCR 辨認功能，可以辨認超過 30 種語言，只要對紙張上面的文字進行掃描，就可以轉換成為可編輯的文字，並利用 Google Translate 網站作輔助，輕鬆翻譯。不過我試過呢個功能之後發現， OCR 辨認功能仲係需要改進，翻譯英文準確度都算高，不過中文就會出現亂碼的情況。

▲ 我嘗試掃瞄「LINE FRIENDS」的字句，不過就顯示成「L’E FRIENDS」。

▲ 另外，我嘗試掃描一份中文的新聞稿，發覺全都是亂碼了，看來我還是不可以偷懶啊！

立體掃出奇怪效果

咪以為 PocketScan 只可以掃瞄平面，原來立體都一樣可以，只要有足夠的接觸面積，一樣可以掃瞄到，不過圖片就有 D 奇怪。

▲ 雖然張圖無實際用途，但都幾有趣丫！