等到頸都長，海洋公園終於都鋪好晒 Wi-Fi 了，而且仲推出咗升級版的 Apps ，不但有實時導覽，仲可以預約景點，就等我依莉詩同大家率先試下啦！
免費 Wi-Fi 無限時
聽就聽咗好耐海洋公園會鋪 Wi-Fi，不過因為園區範圍大，又有室內室外的地方，遲遲都未正式推出。不過今日海洋公園主席孔令成表示歷時超過一年的 Wi-Fi 網絡鋪設工程已大致完成。園內設置約 400 個 Wi-Fi 熱點，同時間共支援超過 4 萬部流動裝置，承載量可達最高 1Gbps 的傳輸速率及穩定的訊號接收，能應付大量旅客同時使用。即係代表著我地可以係園內所有景點、餐廳、禮品店、劇場、遊人輪候區和園內課室等，使用無限時的免費 Wi-Fi，可以隨時打卡啦！而今日我去過海濱樂園做測試，除了一些員工通道，基本上公眾去到的地方都連到線，而速度都唔算太慢，應付到 Up 相，睇 Facebook 等的功能。
▲ 下次去海洋公園一定要認住呢 3個官方網絡登入名稱，包括：OceanPark Free WiFi、OceanPark Free WiFi Encrypted (密碼: opfreewifi) 同由政府資訊科技總監辦公室主辦「Wi-Fi.HK」計劃 的 Wi-Fi.HK via OP。
▲ 連線之後會出現條款同細則，接受後就可以無限時使用。
實時導覽關注保育議題
除了免費 Wi-Fi，海洋公園的 Apps 亦同時升級，只要連接海洋公園 Wi-Fi 同開啟海洋公園 Apps 就可以係指定的動物展館內，透過「實時導覽」功能觀看相關文字介紹、圖片、短片同聽語音導覽，從而更深入認識動物大使的有趣知識，啟發遊人關注保育議題。係 【海洋奇觀】、【亞洲動物天地】、【四川奇珍館】、【尋鯊探秘】、【海洋哺乳動物繁殖及研究中心】及【中華鱘館——長江足跡】中，我今次行了前 3 個，大致上對位都幾準，只要行到該景點就會有提示出現。
▲ 海洋公園 Apps 的介面幾乎完全改變了，變得比較似一個手機版網頁。
▲ 係「實時導覽」功能入面，暫時有【海洋奇觀】、【亞洲動物天地】、【尋鯊探秘】及【四川奇珍館】4 個展館，而【海洋哺乳動物繁殖及研究中心】及【中華鱘館——長江足跡】會係 3 月底先有實時導覽。
▲ 去到展館後，只要下載相關的資料就可以開始導覽。
▲ 每個展館入面都有多個景點，你行到邊，佢就會出現相關的資料，例如：動物的簡介、習性及保育等等。
▲唔同的手機會有少少誤差，不過位置大致上都準確。
預約通行證節省排隊時間
升級的 Apps 除了「實時導覽」功能外，仲新增了「預約通行證」功能，只要係 9 個指定景點中選擇 3 個想去的景點，程式會安排最佳遊玩時段及行程，節省排隊輪候時間。不過，因為我沒有門票的關係，所以試唔到比大家睇。
▲ 輸入門票編號之後就可以係【海洋奇觀】、【摩天巨輪】、【滑浪飛船】、【尋鯊探秘】、【南極奇觀】、【瘋狂過山車】、【熱帶激流】、【越礦飛車】及【極速之旅】中選擇 3 個，並由程式安排最佳遊玩時段及行程。
玩「動物大富翁」 贏豐富獎品
講咗咁多利用科技的新體驗，依家講下海洋公園有咩新嘢玩。原來 3 月 19 日至 4 月 17 日係「親親動物月」，所以海洋公園就同大富翁合作，搞咗個「動物大富翁」活動。只要係園內 17 個大富翁展版中，集齊一套相同顏色的大富翁展板合照就可以玩遊戲，獎品非常豐富，我就覺得親親企鵝活動最吸引啦！
▲17 個大富翁展版大多都係動物展館入面，比個提示大家，如果想套齊一套，就一定要去齊山上同山下啦！
▲ 套齊咗之後記得去抽卡攞禮物啊！
▲ 獎品唔單止有大富翁遊戲同紀念品，仲有海洋公園門票等等添！
▲ 園內餐廳亦推出以大富翁為主題的餐飲美食，呢個 Tea Set 全部都食得架，超特別啊！
春季限定活動認識珍貴動物
既然係「親親動物月」，當然要親親動物啦！只要俾 $160 ，小朋友就可以參加「奇趣動物小畫家」課程，近距離觀看小爪水獺的護理訓練示範同觀賞川金絲猴的趣緻一面。參觀過後，可在明信片上繪畫動物明信片留念。
▲ 小爪水獺細細隻超級可愛呢！
▲小朋友係觀察動物之後需要即時繪畫明信片，訓練佢地的觀察力。
依莉詩：「未試過咁認真行水族館」
我去過海洋公園好多次，甚至申請咗全年證得閒就行下，不過平時就算展館有幾多展板都好，除咗睇 D 動物叫咩名，其他都懶得睇，依家有語音導航齋聽就得。我覺得咁對小朋友都好，多咗個互動，佢地又可以從中學多 D 動物同保護知識。至於呢個 Apps 最正的當然係「預約通行證」功能，雖然我未真正試用到，但可以慳番部份機動遊戲的排隊時間，應該唔錯吧！
Leave a Comment